Read Iloko John 14 Bible Online

John 14 - Iloko bible

John 14

¹Kinuna ni Jesus kadakuada: “Saankayo a madanagan ken mariribukan. Mamatikayo iti Dios, ken mamatikayo met kaniak.

²Adu ti kuarto idiay balay ni Amak, ket innak mangisagana iti pagyananyo. Diak koma ibaga daytoy kadakayo no saan a pudno.

³Kalpasan ti ipapanko panangisagana iti pagyananyo, umaykayto alaen tapno addakayo met iti ayanko.

⁴Ammoyo ti dalan nga agturong iti papanak.”

⁵“Apo,” kinuna ni Tomas, “saanmi nga ammo no sadino ti papanam. Kasano ngarud nga ammomi ti dalan?”

⁶“Siak ti dalan, ken ti pudno, ken ti biag; awan ti makapan iti Ama no di magna kaniak,” insungbat ni Jesus.

⁷“Ita, ta am-ammodakon, am-ammoyo metten ni Amak. Manipud ita, am-ammo ken nakitayon ti Ama.”

⁸Kinuna ni Felipe, “Apo, ipakitam man kadakami ti Ama; umanayen dayta kadakami.”

⁹“Nabayagen a nakikadkaduaak kadakayo, Felipe, ngem dinak pay la gayam am-ammo?” insungbat ni Jesus. “Siasinoman a nakakita kaniak, nakitana metten ti Ama. Apay a kunam pay laeng nga ipakitak kadakayo ti Ama?

¹⁰Dimo kad patien nga addaak iti Ama ket ti Ama adda kaniak? Saan a naggapu kaniak dagiti insaok kadakayo. Ti Ama nga agtaeng kaniak, aramidenna dagiti aramidna.

¹¹Mamatikayo nga addaak iti Ama ket adda met ni Ama kaniak; no saan, mamatikayo gapu kadagitoy nga aramid.

¹²Ibagak ti pudno kadakayo: Ti mamati kaniak, aramidennanto met dagiti aramidek; wen, dakdakkelto pay ngem dagitoy ti aramidenna ta innak iti Ama.

¹³Aramidekto ti aniaman a dawatenyo iti naganko tapno maitan-ok ti Ama babaen iti Anak.

¹⁴Aniaman a dawatenyo iti naganko, aramidekto.”

¹⁵Intuloy ni Jesus ti nagsao: “No ayatendak, tungpalenyo dagiti bilbilinko.

¹⁶Agdawatakto iti Ama ket ikkannakayto iti sabali a Mammagbaga nga agtaeng kadakayo iti agnanayon.

¹⁷Isu ti Espiritu a mangipakaammo iti kinapudno maipapan iti Dios. Saan a mabalin nga awaten ti lubong daytoy nga Espiritu, agsipud ta saanna a makita wenno am-ammo. Ngem am-ammoyo, ta agtaeng kadakayo ket adda kadakayo.

¹⁸“Inton pumanawak, saankayto a panawan a kasla ulila. Agsubliakto met laeng kadakayo.

¹⁹Bassit laengen a tiempo ket dinakto makitan ti lubong, ngem dakayo, makitadakto. Ket gapu ta agbiagak, agbiagkayto met.

²⁰Inton dumteng dayta nga aldaw, maammoanyonto nga addaak ken ni Amak, ket addakayo met kaniak, kas iti kaaddak kadakayo.

²¹“Ti umawat ken mangtungpal kadagiti bilbilinko, isu ti agayat kaniak. Ti agayat kaniak, ayatento ni Amak; ayatekto met ken agparangakto kenkuana.”

²²Kinuna ni Judas (saan a ni Judas Iscariote), “Apo, apay nga agparangka kadakami a saan ket nga iti lubong?”

²³“Ti agayat kaniak, tungpalennanto dagiti saok,” insungbat ni Jesus. “Ayatento ni Amak, ket siak ken ti Ama umaykamto agtaeng kenkuana.

²⁴Ti di agayat kaniak, dina tungpalen dagiti saok. Saan a nagtaud kaniak ti sao a nangngegyo, no di ket naggapu iti Ama a nangibaon kaniak.

²⁵“Imbagak daytoy ta addaak pay kadakayo.

²⁶Ti Mammagbaga nga ibaonto ti Ama iti naganko, isu ti Espiritu Santo. Isuronakayto iti amin a banag ken ipalagipnanto dagiti amin nga imbagak kadakayo.

²⁷“Kappia ti ibatik kadakayo. Ti bukodko a kappia ti itedko kadakayo. Ngem saan a kas iti pannangted ti lubong ti pannangtedko kadakayo. Dikay madanagan ken mariribukan. Dikay agbuteng.

²⁸Nangngegyo ti imbagbagak kadakayo a pumanawak ngem agsubliakto met laeng kadakayo. No inay-ayatdak, agragsakkayo koma ta mapanak iti Ama, ta natantan-ok ti Ama ngem siak.

²⁹Naibagakon daytoy kadakayo sakbay a maaramid tapno inton mapasamak, mamatikayo.

³⁰Diak makapagbayagen a makisao kadakayo, ta umayen ti agturay iti daytoy a lubong. Saannak nga iturayan,

³¹ngem masapul a maammoan ti lubong nga ayatek ti Ama. Dayta ti gapuna nga aramidek ti amin nga ibilinna kaniak. “Ala, umaykayon ket pumanawtayo ditoy.”