Read Iloko John 15 Bible Online

John 15 - Iloko bible

John 15

¹Intuloy ni Jesus ti nagsao: “Siak ti pudno a puon ti ubas, ket ni Amak ti agay-aywan.

²Putdenna amin a sanga a di agbunga ken dalusanna dagiti agbungbunga a sanga tapno ad-adu pay ti bungada.

³Nadaluskayon gapu iti pannursurok kadakayo.

⁴Agtalinaedkayo kaniak ket agtalinaedak met kadakayo. No saankayo a maikamang kaniak, dikayo makapagbunga a kas iti sanga a saan a maikamang iti puon.

⁵“Siak ti puon ti ubas, dakayo dagiti sanga. Ti agtaeng kaniak ket agtaengak met kenkuana, adunto ti maibungana. Ta no awanak, awan ti maaramidyo.

⁶Ti saan nga agtaeng kaniak, maibelleng a kas iti sanga ket magango. Maurnong dagiti kakasta a sanga ket maipuorda.

⁷No agtaengkayo kaniak, ket agtaeng dagiti saok kadakayo, dawatenyo ti aniaman a kayatyo, ket maitedto kadakayo.

⁸No agbungakayo iti adu, maidaydayaw ni Amak, ket iti kasta, agbalinkayo nga adalak.

⁹Ayatenkayo a kas iti panagayat ti Ama kaniak. Agtalinaedkay iti ayatko.

¹⁰Kas iti panangtungpalko kadagiti bilbilin ni Amak ket agtaengak iti ayatna, agtalinaedkayo met iti ayatko no tungpalenyo dagiti bilbilinko.

¹¹“Imbagak daytoy tapno ti ragsakko adda koma kadakayo ket naan-anay koma ti ragsakyo.

¹²Daytoy ti bilinko: Agiinnayatkayo a kas iti panagayatko kadakayo.

¹³Ti katan-okan nga ayat nga ipakita ti maysa a tao isut' panangipaayna iti biagna para kadagiti gagayyemna.

¹⁴Ket dakayo dagiti gagayyemko no tungpalenyo ti ibilinko.

¹⁵Saankayon nga ibilang nga adipen, ta saan nga ammo ti adipen ti ar-aramiden ti apona. Ngem ibilangkayo a gagayyem ta impakaammok kadakayo ti amin a nangngegko ken ni Amak.

¹⁶Saan a dakayo ti nangpili kaniak, no di ket siak ti nangpili kadakayo. Imbaonkayo a mapan ken agbunga iti adu, ket manayon koma ti bungayo. Iti kasta, itedto ti Ama kadakayo ti aniaman a dawatenyo kenkuana iti naganko.

¹⁷Daytoy ngarud ti bilinko kadakayo: Agiinnayatkayo.”

¹⁸“No guraennakayo ti lubong, laglagipenyo a siak ti immuna a ginurana.

¹⁹No kukuanakayo ti lubong, ayatennakayo koma ti lubong a kas kukuana. Ngem saannakayo a kukua ti lubong. Pinilikayo a panawanyo ti lubong ket daytoy ti gapuna a guraennakayo ti lubong.

²⁰Laglagipenyo ti imbagak kadakayo: ‘Saan a natantan-ok ti adipen ngem ti apona.’ No indadanesdak, idadanesdakayto met. No tinungpalda ti saok, tungpalendanto met ti saoyo.

²¹Ngem aramidendanto amin daytoy kadakayo ta kukuakayo. Saanda ngamin nga ammo ti nangibaon kaniak.

²²Awan koma ti pakabasolanda no saanak nga immay ken nagsao kadakuada. Ngem ita, awanen ti pagpambarda kadagiti basbasolda.

²³Ti gumura kaniak, guraenna met ti Amak.

²⁴Awan koma ti pakabasolanda no diak inaramid iti imatangda dagiti banag nga awan sabali a makaaramid. Ngem ita, nakitadan ti inaramidko ket guraendakami a dua ken ni Amak.

²⁵Nupay kasta, mapasamak ti kastoy tapno matungpal ti naisurat iti Lintegda: ‘Ginuradak nga awan gapgapuna.’

²⁶“Umayto ti Mammagbaga—ti Espiritu ti kinapudno manipud iti Ama. Ibaonkonto kadakayo manipud iti Ama, ket agsaonto a mangpaneknek iti maipapan kaniak.

²⁷Agsaksikayto met iti maipapan kaniak, ta nakikadkaduakayo kaniak manipud idi damo.