Read Iloko John 16 Bible Online

John 16 - Iloko bible

John 16

¹“Imbagak daytoy kadakayo tapno diyonto tallikudan ti pammatiyo.

²Pagtalawendakayto kadagiti sinagogada. Umayto ti tiempo nga ipagarup ti pumatay kadakayo nga aramidenna daytoy a kas pagrebbenganna iti Dios.

³Aramidendanto dagitoy kadakayo ta didak am-ammo, kasta met ti Ama.

⁴Ngem imbagak daytoy kadakayo tapno inton dumteng ti tiempo a panangaramidda kadagitoy, malagipyonto a naisaokon kadakayo.” “Diak insigsigud nga imbaga dagitoy kadakayo, agsipud ta addaak pay idi kadakayo.

⁵Ngem ita ta innakon iti nangibaon kaniak, awan kadakayo ti agsaludsod no sadino ti papanak.

⁶Ket ita ta imbagakon kadakayo, agladingitkayo.

⁷Ngem ibagak ti pudno kadakayo: Pagimbaganyo met laeng no pumanawak, ta no diak pumanaw, dinto umay kadakayo ti Mammagbaga. Ngem no pumanawak, ibaonkonto kadakayo.

⁸Ket inton umay, paneknekannanto kadagiti tattao ti lubong nga agbiddutda maipapan iti basol, maipapan iti kinapudno, ken maipapan iti panangukom ti Dios iti lubong.

⁹Nagbiddutda maipapan iti basol, agsipud ta saanda a mamati kaniak.

¹⁰Nagbiddutda maipapan iti kinapudno, agsipud ta mapanak ken ni Ama ket didakto makitan.

¹¹Nagbiddutda maipapan iti panangukom, agsipud ta naukomen ti agturay daytoy a lubong.

¹²“Adu pay ti ibagak kadakayo, ngem diyo pay kabaelan nga awaten ita.

¹³Ngem inton umay ti Espiritu ti kinapudno, idalannakayto iti naan-anay a kinapudno. Dinto agsao iti bukodna a pannakabalin no di ket ibagananto dagiti mangngegna, ket ipakaammonanto kadakayo dagiti mapasamak.

¹⁴Itan-oknakto, ta idanonnanto ti kayatko nga ibaga kadakayo.

¹⁵Kukuak amin a kukua ti Ama. Daytoy ti gapuna a kinunak nga idanonto ti Espiritu ti kayatko nga ibaga kadakayo.”

¹⁶“Iti saan a mabayag, didakton makita. Ngem kalpasan met la ti bassit a tiempo, makitadakto manen.”

¹⁷Kinuna ti sumagmamano nga adalanna kadagiti kaduada, “Ania ti kayat a sawen daytoy? Imbagana nga iti saan a mabayag, ditayton makita, ngem kalpasan met la ti bassit a tiempo, makitatayto manen? Kinunana pay, ‘Agsipud ta mapanak ken ni Amak.’”

¹⁸Iti kasta, nagsisinnaludsodda, “Ania ti kayatna a sawen ti ‘iti saan a mabayag’? Saanmi a maawatan ti ibagbagana!”

¹⁹Gapu ta ammo ni Jesus no ania ti kayatda a saludsoden kenkuana, kinunana kadakuada, “Agsisinnaludsodkayo kadi gapu iti saok nga ‘Iti saan a mabayag, didakton makita, ngem kalpasan met la ti bassit a tiempo, makitadakto manen’?

²⁰Ibagak ti pudno kadakayo: Agsangit ken agdung-awkayto, ngem agragsakto ti lubong. Agladingitkayo ngem agbalinto a ragsak ti ladingityo.

²¹Agdanag ti babai no agpasikalen, ta dimtengen ti oras a panagsagabana, ngem no maipasngaynan ti ubing, malipatannan ti rigatna gapu iti ragsakna ta nayanak ti maysa a maladaga ditoy lubong.

²²Kasta met kadakayo: Agladingitkayo ita, ngem makitakayto manen ket agragsakkayto. Wen, addanto rag-o nga awan ti siasinoman a makaikkat kadakayo.

²³“Inton dumteng dayta nga aldaw, saanton a siak ti pagdawatanyo. Ibagak ti pudno kadakayo: Ited ti Ama ti aniaman a dawatenyo kenkuana iti naganko.

²⁴Agpapan ita, awan pay ti dinawatyo iti naganko. Agdawatkayo ket umawatkayto tapno naan-anay ti ragsakyo.”

²⁵“Pangngarig ti inaramatko a nangibaga kadagitoy kadakayo. Ngem dumtengto ti tiempo a diak aramaten ti pangngarig ket agsaoakto a silalawag kadakayo ti maipapan iti Ama.

²⁶Inton dumteng dayta nga aldaw, agdawatkayto kenkuana iti naganko. Diak ibaga nga idawdawatankayto kenkuana.

²⁷Ay-ayatennakayo a mismo ti Ama, agsipud ta ay-ayatendak ken patienyo a naggapuak iti Dios.

²⁸Naggapuak iti Ama ket immayak ditoy lubong. Ita, panawakon ti lubong ket agsubliak iti Ama.”

²⁹Kinuna dagiti adalanna, “Kitaem, dimo inusar ti pangngarig, ket nalawag ti panagsaom.

³⁰Ita, maawatanmin nga ammom amin. Saanmo a masapul ti uray siasinoman nga agsaludsod kenka. Daytoy ti gapuna a naggapuka iti Dios.”

³¹“Mamatikayo itan?” kinuna ni Jesus.

³²“Umayen ti oras, ket dimtengen. Mawarawarakayto amin. Agawidto ti tunggal maysa iti balayna ket baybay-andakton nga agmaymaysa. Ngem iti kinapudnona, saanak nga agmaymaysa agsipud ta adda kaniak ti Ama.

³³Imbagak daytoy kadakayo tapno adda talnayo iti pannakikaduayo kaniak. Parigatennakayto ti lubong. Ngem papigsaenyo ti nakemyo! Naparmekkon ti lubong!”