Read Iloko John 17 Bible Online

John 17 - Iloko bible

John 17

¹Kalpasan ti panangisao ni Jesus iti daytoy, timmangad sadi langit. “Ama,” kinunana, “dimtengen ti oras. Itan-okmo toy Anakmo tapno itan-oknaka met.

²Ta inikkam iti pannakabalin nga agturay kadagiti amin a tattao tapno ikkanna met iti biag nga agnanayon dagiti amin nga intedmo kenkuana.

³Ket ti biag nga agnanayon isu daytoy: ti pannakaammo dagiti tattao kenka, a sika ti kakaisuna a pudno a Dios, ken ti pannakaammoda ken ni Jesu-Cristo nga imbaonmo.

⁴Indaydayawka ditoy daga. Lineppasko ti trabaho nga intedmo nga aramidek.

⁵Ama, itan-oknak ita iti imatangmo, kas iti panangitan-okmo kaniak idi addaak iti dennam sakbay a naparsua daytoy lubong.

⁶“Impakaammoka kadagiti tattao nga intedmo kaniak ditoy lubong. Kukuam ida, ket intedmo ida kaniak. Tinungpalda ti saom,

⁷ket ita, ammodan a naggapu kenka dagiti amin nga intedmo kaniak.

⁸Intedko kadakuada ti mensahe nga intedmo kaniak, ket inawatda. Ammoda a pudno a naggapuak kenka ket patienda nga imbaonnak.

⁹“Idawdawatak ida. Saanko nga idawdawatan ti lubong no di ket dagiti tattao nga intedmo kaniak, ta kukuam ida.

¹⁰Kukuam amin a kukuak ket kukuak met amin a kukuam. Ket maidaydayawak kadakuada.

¹¹Ita, umayakon kenka, Nasantoan nga Ama. Awanakon iti lubong, ngem addada iti lubong. Aywanam ngarud ida babaen iti pannakabalin ti naganmo nga intedmo kaniak tapno agmaymaysada a kas kadata.

¹²Bayat ti kaaddak kadakuada, inaywanak ida babaen iti pannakabalin ti naganmo nga intedmo kaniak. Sinalaknibak ida, ket awan ti uray maysa kadakuada a napukaw, malaksid daydi tao a naituding a mapukaw tapno matungpal ti Nasantoan a Surat.

¹³Ita, umayakon kenka, ket sawek dagitoy ditoy lubong tapno adda kadakuada ti naan-anay a ragsakko.

¹⁴Intedko kadakuada ti saom ket ginura ida ti lubong ta kas kaniak, saanda a taga-lubong.

¹⁵Diak dawaten nga ipanawmo ida ditoy lubong, no di ket salaknibam ida iti Managdakdakes.

¹⁶Saanda a taga-lubong a kas kaniak.

¹⁷Pasantoem ida babaen iti kinapudno. Ti saom isut' pudno.

¹⁸Kas iti panangibaonmo kaniak ditoy lubong, kasta met ti panangibaonko kadakuada iti lubong.

¹⁹Gapu kadakuada, idatonko kenka toy bagik tapno mapasantoda met iti kinapudno.

²⁰“Saan laeng nga is-isuda ti idawdawatak. Idawdawatak met dagiti mamati kaniak gapu iti mensaheda.

²¹Ikarkararagko nga agmaymaysada amin. Ama, addada koma kadata, a kas iti kaaddam kaniak ken iti kaaddak kenka. Agmaymaysada koma tapno patien ti lubong nga imbaonnak.

²²Intedko kadakuada ti dayag nga intedmo kaniak tapno agmaymaysada a kas iti panagmaymaysata.

²³Addaak kadakuada ket addaka kaniak tapno naan-anay ti panagmaymaysada. Iti kasta, maammoan ti lubong nga imbaonnak ken kasta met nga ay-ayatem ida a kas iti panagayatmo kaniak.

²⁴“Ama, intedmo ida kaniak, ket kayatko a no sadinoman ti ayanko, addada met koma sadiay tapno makitada ti dayagko. Wen, ti dayag nga intedmo kaniak, ta inayatnak sakbay a naparsua ti lubong.

²⁵Nalinteg nga Ama, saannaka nga am-ammo ti lubong, ngem am-ammoka, ket ammoda nga imbaonnak.

²⁶Impakaammoka kadakuada, ket diak mamingga a mangipakaammo tapno ti ayatmo kaniak adda kadakuada ket addaak met kadakuada.”