Read Iloko John 18 Bible Online

John 18 - Iloko bible

John 18

¹Kalpasan ti panangisao ni Jesus kadagitoy, pimmanaw agraman dagiti adalanna ket binallasiwda ti waig ti Kidron. Adda hardin iti dayta a disso, ket nagturongda sadiay.

²Ammo ni Judas a mangliput kenkuana dayta a lugar agsipud ta masansan a sadiay ti paguummongan ni Jesus ken dagiti adalanna.

³Iti kasta, napan ni Judas iti hardin, ket nangikuyog iti bunggoy dagiti soldado a taga-Roma ken sumagmamano a guardia ti Templo nga imbaon dagiti panguloen a papadi ken Fariseo. Nagtagi-armas ken nagtagi-silaw dagiti soldado ken guardia.

⁴Agsipud ta ammo ni Jesus ti amin a mapasamak kenkuana, sinabatna ida. “Siasino ti sapsapulenyo?” kinunana.

⁵“Ni Jesus a taga-Nazaret,” insungbatda. “Siak,” kinunana. Agtaktakder iti ayanda ni Judas a mangliput kenkuana.

⁶Apaman a kinuna kadakuada ni Jesus iti “Siak,” napasanud ken natuangda.

⁷Sinaludsod manen ni Jesus kadakuada, “Siasino ti sapsapulenyo?” “Ni Jesus a taga-Nazaret,” kinunada.

⁸“Imbagak la ngaruden a siak,” kinuna ni Jesus. “No siak ti sapsapulenyo, palubosanyo a pumanaw dagiti kaduak.” (

⁹Kinunana daytoy tapno matungpal daydi sinaona: “Ama, awan ti uray maysa a napukaw kadagiti intedmo kaniak.”)

¹⁰Adda idi buneng ni Simon Pedro. Inasutna sana tinagbat ti babaonen ti Kangatoan a Padi, ket naisina ti akinkannawan a lapayagna. Malco ti nagan ti babaonen.

¹¹Kinuna ni Jesus ken ni Pedro, “Ibalaymo ta bunengmo. Ipagarupmo kadi a diak inumen ti kopa ti panagsagaba nga inted kaniak ni Amak?”

¹²Ti bunggoy dagiti soldado nga indauloan ti ofisialda ken dagiti guardia ti Templo ti nangtiliw ken ni Jesus. Rineppetda dagiti imana.

¹³Immuna nga indatagda ken ni Anas a katugangan ni Caifas, ti Kangatoan a Padi iti dayta a tawen.

¹⁴Ni Caifas ti nangbagbaga idi kadagiti Judio a nasaysayaat no matay ti maysa a tao para iti pagimbagan dagiti tattao.

¹⁵Simmurot ni Simon Pedro ken ni Jesus. Simmurot met ti sabali pay nga adalan. Am-ammo ti Kangatoan a Padi daytoy nga adalan, isut' gapuna a nakikuyog ken ni Jesus a simrek iti paraangan ti balay ti Kangatoan a Padi.

¹⁶Ngem nagbati ni Pedro iti ruar iti asideg ti ruangan. Iti kasta, rimmuar ti adalan nga am-ammo ti Kangatoan a Padi sana kinasao ti babai nga agbambantay iti ruangan ket pinastrekna ni Pedro.

¹⁷Kinuna ti babai ken ni Pedro, “Saanka aya a maysa kadagiti adalan dayta a tao?” “Saan,” insungbat ni Pedro.

¹⁸Agsipud ta nalam-ek idi, nagpuor dagiti adipen ken dagiti guardia iti paginudoan ket nagtatakderda iti lawlawna. Napan met nakiinudo ni Pedro.

¹⁹Inimbestigar ti Kangatoan a Padi ni Jesus maipapan kadagiti adalanna ken iti pannursurona.

²⁰Simmungbat ni Jesus, “Nagsaoak a silalatak kadagiti tattao. Masansan a mangisursuroak iti uneg dagiti sinagoga ken iti Templo a paguurnongan dagiti amin a tattao. Awan a pulos ti imbagbagak iti nalimed.

²¹Apay a pagsaludsodannak? Agsaludsodka kadagiti tattao a nagdengngeg kaniak no ania ti imbagak kadakuada ta ammoda ti sinaok.”

²²Idi naisao ni Jesus daytoy, tinungpa ti maysa kadagiti guardia sadiay. “Apay a kasta ti panangsungbatmo iti Kangatoan a Padi?” kinunana.

²³“Paneknekam no adda dakes a sinaok,” insungbat ni Jesus. “No pudno man ti imbagak, apay a kabilennak?”

²⁴Iti kasta, pinaipan ni Anas ni Jesus a sirereppet pay laeng ken ni Caifas a Kangatoan a Padi.

²⁵Adda pay laeng ni Pedro nga agtaktakder sadiay nga agin-inudo. Kinuna dagiti dadduma kenkuana, “Saanka kadi a maysa kadagiti adalan dayta a tao?” Ngem naglibak ni Pedro. “Saan,” kinunana.

²⁶Nagsao ti maysa kadagiti adipen ti Kangatoan a Padi, ken kabagian ti lalaki nga insina ni Pedro ti lapayagna. “Saan aya a sika ti nakitak a kaduana iti hardin?” kinunana.

²⁷Naglibak manen ni Pedro, ket dagus a nagtaraok ti maysa a kawitan.

²⁸Nasapa pay laeng idi ipanawda ni Jesus iti balay ni Caifas ket impanda iti palasio ti gobernador. Saan a simrek dagiti Judio iti palasio ta dida kayat ti matulawan. Ngamin, no matulawanda, dida mabalin ti mangan iti pangrabii ti Paskua.

²⁹Rimmuar ngarud ni Pilato ket kinunana kadakuada, “Ania ti pangidarumanyo iti daytoy a tao?”

³⁰“Saanmi koma nga idatag kenka daytoy a tao no saan a nakaaramid iti dakes,” insungbatda.

³¹Kinuna ni Pilato kadakuada, “Alaenyo ngarud ket dakayo a mismo ti mangukom kenkuana kas mayannurot iti paglinteganyo.” “Saan a maipalubos kadakami ti mangikeddeng a mapapatay ti tao,” insungbat dagiti Judio. (

³²Napasamak daytoy tapno matungpal ti sinao ni Jesus idi imbagana no kasano ti ipapatayna.)

³³Simrek ngarud ni Pilato iti palasio sana inayaban ni Jesus. “Sika kadi ti ari dagiti Judio?” sinaludsodna.

³⁴“Nagtaud kadi kenka daytoy a saludsod wenno adda nangibaga kenka?” insungbat ni Jesus.

³⁵“Ipagarupmo kadi a Judioak?” kinuna ni Pilato. “Indarumdaka kaniak dagiti kailiam ken dagiti panguloen a papadi. Ania aya ti inaramidmo?”

³⁶“Saan a ditoy lubong ti ayan ti pagariak,” kinuna ni Jesus. “No ditoy lubong koma, makigubat dagiti pasurotko tapno saanak a mayawat kadagiti agtuturay a Judio. Ngem saan a ditoy lubong ti ayan ti pagariak!”

³⁷Isut' gapuna a sinaludsod ni Pilato, “No kasta, maysaka nga ari?” “Nasaomon,” insungbat ni Jesus. “Nayanakak ditoy lubong tapno paneknekak ti pudno. Dumngeg kaniak ti siasinoman nga adda iti pudno.”

³⁸“Ania kadi ti pudno?” sinaludsod ni Pilato. Kalpasan ti panangisao ni Pilato iti daytoy, rimmuar manen a napan iti ayan dagiti tattao ket kinunana kadakuada: “Awan panggapuak a mangikeddeng iti pannakadusana.

³⁹Ngem kas mayannurot iti ugaliyo iti Fiesta ti Paskua, wayawayaak kadakayo ti maysa a balud. Kayatyo kadi a wayawayaak ti ari dagiti Judio?”

⁴⁰“Saan nga isu!” impukkawda, “Ni Barrabas ti kayatmi!” (Maysa a tulisan ni Barrabas.)