Read Iloko John 19 Bible Online

John 19 - Iloko bible

John 19

¹Kalpasanna, pinaala ni Pilato ni Jesus ket pinasaplitna.

²Nangaramid dagiti soldado iti korona a siitsiitan sada inkabil iti ulona. Kinagayanda iti kolor-ube ket inasitganda.

³“Agbiag ti Ari dagiti Judio!” kunkunada sada tinungpa.

⁴Rimmuar manen ni Pilato ket kinunana kadagiti tattao, “Adtoy, paipanko ni Jesus ditoy tapno makitayo nga awan panggapuak a mangikeddeng iti pannakadusana.”

⁵Rimmuar ni Jesus a sibabalangat iti siitsiitan ken siaaruat iti kolor-ube a kagay. Kinuna kadakuada ni Pilato, “Adtoy ti tao!”

⁶Idi makita dagiti panguloen a papadi ken dagiti guardia ti Templo, impukkawda, “Pailansam iti krus! Pailansam iti krus!” Kinuna ni Pilato kadakuada, “Alaenyo ngarud. Dakayo ti mangilansa kenkuana iti krus. Awan panggapuak a mangdusa kenkuana.”

⁷“Adda sagudayen ti lintegmi a rebbengna a mapapatay agsipud ta imbilangna ti bagina nga Anak ti Dios,” insungbat dagiti Judio.

⁸Idi mangngeg ni Pilato daytoy, ad-adda manen ti butengna

⁹ket nagsubli iti uneg. “Taga-anoka kadi?” sinaludsodna ken ni Jesus. Ngem saan a simmungbat ni Jesus.

¹⁰Kinuna kenkuana ni Pilato, “Apay a dika sumungbat? Dimo kad ammo nga adda pannakabalinko a mangwayawaya wenno mangpailansa kenka iti krus?”

¹¹“Awan koma ti pannakabalinmo kaniak no saan nga inted kenka ti Dios,” insungbat ni Jesus. “Isut' gapuna a nakarkaro ti basol ti tao a nangyawat kaniak.”

¹²Idi mangngeg ni Pilato daytoy, ad-adda manen ti gagarna a mangwayawaya ken ni Jesus. Ngem impukkaw dagiti Judio, “No wayawayaam dayta a tao, saannaka a gayyem ti Emperador. Ta kabusor ti Emperador ti siasinoman a mangibilang iti bagina nga ari.”

¹³Idi mangngeg ni Pilato dagitoy a sao, inruarna ni Jesus sa napan nagtugaw iti tugaw ti ukom, iti disso a managan “Plataforma a Bato.” (Iti Hebreo: “Gabata.”)

¹⁴Dandani tengnga ti aldaw idi sakbay ti Fiesta ti Paskua. Kinuna ni Pilato kadagiti Judio, “Adtoy ti ariyo!”

¹⁵Impukkawda, “Papapataymo! Papapataymo! Pailansam iti krus!” Sinaludsod ni Pilato kadakuada, “Kayatyo kadi a pailansak iti krus ti ariyo?” Simmungbat dagiti panguloen a papadi, “Awan sabali nga arimi no di la ti Emperador!”

¹⁶Kalpasanna, inyawat ni Pilato ni Jesus kadakuada tapno mailansa iti krus. Iti kasta, innalada ni Jesus.

¹⁷Rimmuar a sibabaklay iti krusna ket dimteng iti disso a managan “Lugar a yan ti Bangabanga.” (Iti Hebreo: “Golgota.”)

¹⁸Sadiay ti nangilansaanda kenkuana iti krus. Inlansada met ti dua a lallaki kadagiti krusda ket nagtengngaanda ni Jesus.

¹⁹Nangisurat ni Pilato iti pakaammo ket pinaikabilna iti krus. Kastoy ti naisurat: “Jesus a taga-Nazaret, ti Ari dagiti Judio.”

²⁰Adu a tattao ti nakabasa iti daytoy agsipud ta asideg iti siudad ti disso a nakailansaan ni Jesus. Naisurat ti pakaammo iti pagsasao a Hebreo, Latin ken Griego.

²¹Kinuna dagiti panguloen a papadi ken ni Pilato, “Baliwam ti insuratmo a ‘Ti Ari dagiti Judio.’ Kastoy ketdi ti isuratmo: ‘Kinuna daytoy a tao nga isu ti Ari dagiti Judio.’”

²²“Ti insuratko, naisuraten. Saanen a mabaliwan,” insungbat ni Pilato.

²³Idi nailansadan ni Jesus, innala dagiti soldado ti kawesna sada pinagkapat ken nagbibingayan. Innalada met ti tunikana. Awan saip ti entero a tunikana.

²⁴Kinuna dagiti soldado iti maysa ken maysa, “Saantayo a pigpigisen ti lupot, ta pagbibinnunotantayo no siasino ti mangtagikua.” Napasamak daytoy tapno matungpal ti kuna ti Nasantoan a Surat: “Nagbibingayanda ti kawesko, Nagbibinnunotanda ti tunikak.” Kasta ti inaramid dagiti soldado.

²⁵Iti asideg ti krus ni Jesus, sitatakder ni inana, ti kabsat ni inana, ni Maria nga asawa ni Cleofas ken ni Maria Magdalena.

²⁶Idi makita ni Jesus ni inana ken ti adalan a dinungdungngona, kinunana ken ni inana, “Babai, adtoy ti anakmo.”

²⁷Kinunana met iti adalan, “Adtoy ti inam.” Iti dayta nga oras, inyawid ti adalan ni Maria tapno agtaeng iti balayna.

²⁸Ammo ni Jesus a nalpas aminen. Tapno matungpal ti kuna ti Nasantoan a Surat, kinunana, “Mawawak.”

²⁹Adda maysa a burnay sadiay a napno iti suka. Nangipasagepsepda iti maysa nga espongha iti suka sada inkabil iti murdong ti sanga ti hisopo, ket inggaw-atda iti ngiwatna.

³⁰Idi maramanan ni Jesus ti suka, kinunana, “Natungpalen.” Nagdumog ket natayen.

³¹Agsipud ta Aldaw a Panagsagana idi, dinawat dagiti agtuturay a Judio ken ni Pilato a matukkol dagiti saka dagiti nailansa ken maikkat dagiti bagida kadagiti krus. Dinawatda daytoy ta dida kayat a mabati dagiti bangkay kadagiti krus iti Aldaw a Panaginana, ta naisangsangayan dayta mapasungad nga aldaw.

³²Napan ngarud dagiti soldado, ket tinukkolda dagiti saka dagiti dua a lallaki a kadua ni Jesus a nailansa.

³³Ngem idi dumtengda ken ni Jesus, nakitada a natayen isu a didan tinukkol dagiti sakana.

³⁴Nupay kasta, induyok ti maysa kadagiti soldado ti pikana iti bakrang ni Jesus, ket dagus a pimsuak ti dara ken danum. (

³⁵Daydi nakakita iti daytoy a napasamak, paneknekanna ti kinapudno daytoy tapno mamatikayo met. Pudno ti imbagana ket ammona a pudno ti sasawenna.)

³⁶Naaramid daytoy tapno matungpal ti kuna ti Nasantoan a Surat: “Awanto ti uray maysa a tulangna a matukkol.”

³⁷Kuna pay ti sabali, “Kitaendanto ti dinuyokda.”

³⁸Kalpasanna, dinawat ni Jose a taga-Arimatea ken ni Pilato ti pammalubos nga alaenna ti bangkay ni Jesus. (Maysa idi ni Jose a pasurot ni Jesus, ngem inlimedna ta mabuteng kadagiti agtuturay a Judio.) Impalubos ni Pilato. Napan ngarud ni Jose ket innalana ti bangkay ni Jesus sana impanaw.

³⁹Kimmuyog ken ni Jose ti maysa nga agnagan Nicodemo, daydi napan ken ni Jesus iti maysa a rabii. Nangitugot iti agarup 30 a kilo ti bangbanglo a naaramid iti mirra ken aloe.

⁴⁰Innalada ti bangkay ni Jesus ket binungonda iti linen agraman ti bangbanglo, kas ugali dagiti Judio no itanemda dagiti minatayda.

⁴¹Adda maysa a hardin iti disso a nakailansaan ni Jesus iti krus. Adda baro a tanem sadiay a di pay nausar.

⁴²Agsipud ta asideg ti tanem ken dandanin mangrugi ti Aldaw a Panaginana, sadiay ti nangikabilanda iti bangkay ni Jesus.