Read Iloko John 2 Bible Online

John 2 - Iloko bible

John 2

¹Kalpasan ti dua nga aldaw, adda boda idiay Cana, maysa nga ili ti Galilea. Adda sadiay ti ina ni Jesus,

²ket naawis met ni Jesus ken dagiti adalanna.

³Idi naibusen ti arak, kinuna ti ina ni Jesus kenkuana, “Naibusandan iti arak.”

⁴“Babai,” insungbat ni Jesus, “saan a masapul nga ibagam ti aramidek. Saan pay a dimteng ti orasko.”

⁵Kinuna ti ina ni Jesus kadagiti agserserbi, “Aramidenyo ti aniaman nga ibagana kadakayo.”

⁶Adda alagaden dagiti Judio maipapan iti panagbuggo. Isut' gapuna nga adda innem a burnay sadiay nga aglaon ti tunggal maysa iti agarup 100 a litro.

⁷“Punnoenyo dagiti burnay iti danum,” kinuna ni Jesus kadagiti agserserbi. Pinunnoda ngarud dagiti burnay.

⁸“Ita,” kinunana kadakuada, “tumakokayo ket ipanyo iti agaywan iti padaya.” Kasta ti inaramid dagiti agserserbi.

⁹Idi naramanan ti agaywan ti danum a nagbalin nga arak, inayabanna ti nobio. Saanna nga ammo ti naggapuan ti arak (nupay ammo dagiti agserserbi, ta isuda ti timmako iti danum).

¹⁰Kinunana iti nobio, “Ugali dagiti tattao nga ipasango nga umuna ti kaimasan nga arak sadanto ipasango ti ordinario nga arak no adun ti nainum dagiti sangaili. Ngem sika, inyud-udim nga impasango ti kaimasan nga arak!”

¹¹Inaramid ni Jesus daytoy umuna a milagro idiay Cana, maysa nga ili ti Galilea. Impakitana ti dayagna sadiay, ket namati kenkuana dagiti adalanna.

¹²Kalpasan daytoy, napan ni Jesus idiay Capernaum. Kaduana ni inana, dagiti kakabsatna a lallaki ken dagiti adalanna ket nagyanda sadiay iti sumagmamano nga aldaw.

¹³Asidegen ti Paskua dagiti Judio, ket napan ni Jesus idiay Jerusalem.

¹⁴Iti Templo, nadanonna dagiti aglaklako iti baka, karnero ken kalapati, kasta met dagiti agsuksukat iti kuarta a situtugaw iti puestoda.

¹⁵Nangaramid ni Jesus iti pagbaut a tali sana pinaruar dagiti amin a baka ken karnero. Binalintuagna dagiti lamisaan dagiti agsuksukat iti kuarta. Inwarawarana ti kuartada.

¹⁶Kinuna ni Jesus kadagiti aglaklako iti kalapati. “Iruaryo dagitoy. Diyo pagbalinen a tiendaan ti balay ni Amak!”

¹⁷Nalagip dagiti adalanna ti kuna ti Nasantoan a Surat: “Ti panangipategko iti balaymo, O Dios, kasla apuy a sumsumged iti unegko!”

¹⁸Gapu iti inaramid ni Jesus, sinaludsod dagiti papangulo a Judio kenkuana, “Ania ti maiparangmo a milagro kadakami a mangipakita iti kalintegam a mangaramid iti daytoy?”

¹⁹“Rebbaenyo daytoy a Templo ket iti uneg ti tallo nga aldaw, bangonekto met laeng,” insungbat ni Jesus.

²⁰Kinuna kenkuana dagiti Judio, “Ania? Bangonem met laeng iti uneg ti tallo nga aldaw? Nabangon daytoy a Templo iti uneg ti uppat a pulo ket innem a tawen!”

²¹Ngem ti templo a sasawen ni Jesus isu ti bagina.

²²Isut' gapuna nga idi napagungaren ni Jesus, nalagip dagiti adalanna a sinaona daytoy. Ket namatida iti Nasantoan a Surat ken iti insao ni Jesus.

²³Idi adda ni Jesus idiay Jerusalem bayat ti Fiesta ti Paskua, adu ti namati kenkuana idi nakitada dagiti milagro nga inaramidna.

²⁴Ngem saanna nga intalek kadakuada ti bagina, agsipud ta ammona ti amin a tattao.

²⁵Saanna a masapul ti siasinoman a mangibaga kenkuana maipapan iti tao ta ammona a mismo ti panunot ken kababalin ti tao.