Read Iloko John 3 Bible Online

John 3 - Iloko bible

John 3

¹Adda idi Fariseo nga agnagan iti Nicodemo, maysa a pangulo dagiti Judio.

²Iti maysa a rabii, napan ni Nicodemo ken ni Jesus. “Rabbi,” kinunana, “ammomi a maysaka a maestro nga imbaon ti Dios. Awan ti makaaramid kadagitoy a milagro nga ar-aramidem malaksid no adda kenkuana ti Dios.”

³“Ibagak kenka ti pudno,” kinuna ni Jesus. “Awan ti makakita iti Pagarian ti Dios malaksid no mayanak manen.”

⁴“Kasano a mayanak manen ti tao a nataenganen?” sinaludsod ni Nicodemo. “Mabalinna aya ti sumrek iti aanakan ni inana tapno mayanak manen?”

⁵“Ibagak kenka ti pudno,” insungbat ni Jesus. “Awan ti makastrek iti Pagarian ti Dios malaksid no mayanak iti danum ken iti Espiritu.

⁶Ti tao, ipasngayna ti tao; ket ti Espiritu, ipasngayna ti espiritu.

⁷Dika masdaaw no kunak kenka, ‘Masapul a mayanakkayo manen.’

⁸Agpuyupoy ti angin iti sadinoman a kaykayatna. Mangngegmo ti awerna, ngem dimo ammo ti paggapuan wenno pagturonganna. Kasta met ti mapasamak iti tunggal maysa a mayanak iti Espiritu.”

⁹“Kasano a maaramid daytoy?” sinaludsod ni Nicodemo.

¹⁰Kinuna ni Jesus, “Maysaka a maestro iti Israel ket dimo maawatan daytoy?

¹¹Ibagak kenka ti pudno: Sawenmi ti ammomi, ket ibagami ti nakitami. Ngem diyo patien ti pammaneknekmi.

¹²Ibagbagak kadakayo dagiti naindagaan a bambanag, ngem dikayo mamati. Kasano ngarud ti panamatiyo kaniak no sawek dagiti nailangitan a bambanag?

¹³Ket awan ti immuli sadi langit malaksid ti Anak ti Tao a bimmaba manipud langit.

¹⁴Kas iti panangibayog ni Moises iti sinan-uleg a bronse idiay let-ang, masapul met ti pannakaibayog ti Anak ti Tao

¹⁵tapno agbiag nga agnanayon ti siasinoman a mamati kenkuana.”

¹⁶Gapu iti kasta unay a panagayat ti Dios iti lubong, intedna ti Bugbugtong nga Anakna tapno ti siasinoman a mamati kenkuana saan a matay no di ket agbiag nga agnanayon.

¹⁷Ta saan nga imbaon ti Dios ti Anakna ditoy lubong tapno ukomenna ti lubong, no di ket tapno isalakanna.

¹⁸Saan a maukom ti siasinoman a mamati iti Anak. Ngem naukomen ti di mamati agsipud ta saan a namati iti Bugbugtong nga Anak ti Dios.

¹⁹Daytoy ti pakaukoman: Immayen ti silaw ditoy lubong, ngem gapu ta dakes dagiti aramid dagiti tattao, ad-adda nga ayatenda ti sipnget ngem ti lawag.

²⁰Ti siasinoman nga agaramid iti dakes, kagurana ti lawag ket saan nga umasideg iti silaw agsipud ta dina kayat a maipakita dagiti dakes nga aramidna.

²¹Ngem ti agbiag iti kinapudno, umasideg iti silaw tapno maipakita a mayannurot iti Dios dagiti aramidna.

²²Kalpasan daytoy, napan ni Jesus ken dagiti adalanna iti probinsia ti Judea. Nagyanda sadiay ket namumbuniag ni Jesus.

²³Namumbuniag met idi ni Juan idiay Enon, iti asideg ti Salim, ta adu ti danum sadiay. Napan kenkuana dagiti tattao ket binuniaganna ida. (

²⁴Saan pay a naibalud idi ni Juan.)

²⁵Iti naminsan, makisinsinnuppiat dagiti adalan ni Juan iti maysa a Judio maipapan iti alagaden iti pannakaugas.

²⁶Napanda ngarud ken ni Juan ket kinunada kenkuana, “Maestro, malagipmo daydi immay kenka iti akindaya a ballasiw ti Jordan, daydi imbagam kadakami? Mamumbuniagen, ket mapmapan kenkuana dagiti amin a tattao!”

²⁷Insungbat ni Juan, “Awan ti mabalin nga awaten ti tao malaksid no ited kenkuana ti Dios.

²⁸Dakayo met laeng ti makasaksi a kinunak, ‘Saan a siak ti Cristo, ngem naibaonak nga umay nga umun-una ngem isu.’

²⁹Ti nobio ti akinkukua iti nobia; ti gayyem ti nobio agsiput ken agdengngeg ket maragsakan no mangngegna ti timek ti nobio. Ngarud, naan-anayen ti ragsakko.

³⁰Isun ti rumbeng a maitan-ok, ket siak ti maipababa.”

³¹Natantan-ok ngem ti isuamin ti umay nga aggapu iti ngato. Taga-daga ti agtaud iti daga, ket sawenna dagiti naidagaan a bambanag. Nangatngato ngem ti isuamin ti umay nga aggapu sadi langit.

³²Paneknekanna ti nakita ken nangngegna, ngem awan umawat iti mensahena.

³³Ti siasinoman nga umawat iti mensahena, pasingkedanna a pudno ti Dios.

³⁴Ta ti imbaon ti Dios sawenna dagiti sao ti Dios, agsipud ta inted ti Dios kenkuana ti Espirituna.

³⁵Ti Ama ayatenna ti Anakna ket impaimana kenkuana dagiti isuamin.

³⁶Ti siasinoman a mamati iti Anak maaddaan iti biag nga agnanayon. Siasinoman a di agtulnog iti Anak, dinanto maragpat ti biag, no di ket agtalinaed kenkuana ti pannusa ti Dios.