Read Iloko John 5 Bible Online

John 5 - Iloko bible

John 5

¹Kalpasan daytoy, napan ni Jesus idiay Jerusalem tapno dumar-ay iti maysa a fiesta dagiti Judio.

²Iti asideg ti Ruangan dagiti Karnero, adda pagdigosan a lima ti arkona. Maaw-awagan daytoy iti Betsata iti pagsasao ti Hebreo.

³Iti linong dagiti arko, agiidda ti adu a masakit: dagiti bulsek, pilay ken paralitiko. [Ur-urayenda ti panaggaraw ti danum,

⁴ta pasaray bumaba ti maysa nga anghel ti Apo iti pagdigosan ket kiburenna ti danum. Ti umuna kadagiti masakit a tumapog iti danum kalpasan ti pannakakiburna, maagasan iti aniaman a sagsagabaenna.]

⁵Adda idi sadiay ti maysa a lalaki a tallopulo ket walo a tawenen a masakit.

⁶Idi makita ni Jesus ti lalaki a nakaidda ket ammona a nabayagen a masaksakit, kinunana kenkuana, “Kayatmo ti umimbag?”

⁷“Apo,” kinuna ti masakit, “awan ti mangitapog kaniak iti pagdigosan apaman a makibur ti danum. Ta no irubrubbuatko pay laeng ti mapan, adda nakatapogen.”

⁸“Bumangonka,” kinuna ni Jesus. “Bagkatem ta iddam, ket magnakan.”

⁹Naimbagan a dagus ti lalaki. Binagkatna ti iddana ket nagnan. Aldaw a Panaginana idi mapasamak daytoy,

¹⁰isut' gapuna a kinuna dagiti pangulo a Judio iti lalaki a napaimbag, “Maiparit nga awitem ti iddam iti Aldaw a Panaginana.”

¹¹“Imbaga ti tao a nangpaimbag kaniak a bagkatek ti iddak ket magnaak,” insungbat ti lalaki.

¹²“Siasino daytoy a tao a nagkuna a bagkatem ti iddam ket magnaka?” sinaludsodda.

¹³Ngem saan nga ammo ti lalaki no siasino ti nangpaimbag kenkuana gapu ta adu ti tao iti dayta a lugar ket pimmanawen ni Jesus nga awan nakadkadlaw.

¹⁴Iti saan a mabayag, nasarakan ni Jesus ti lalaki idiay Templo. “Kitaem, naimbagankan!” kinunana. “Dika agbasolen, amangan no addanto dakdakes a mapasamak kenka.”

¹⁵Pimmanaw ti lalaki ket impakaammona kadagiti papangulo a Judio a ni Jesus gayam ti nangpaimbag kenkuana.

¹⁶Gapu iti daytoy, rinugianda nga indadanes ni Jesus agsipud ta nangpaimbag iti Aldaw a Panaginana.

¹⁷Kinuna ni Jesus kadakuada, “Agtartrabaho ni Amak agingga ita, ket masapul met nga agtrabahoak.”

¹⁸Gapu iti daytoy a saona, ad-adda manen ti pinget dagiti Judio a mangpapatay kenkuana ta saanna laeng a sinalungasing ti linteg ti Aldaw a Panaginana, ngem imbagana pay nga Amana ti Dios, ket iti kasta, impadana ti bagina iti Dios.

¹⁹Isut' gapuna a kinuna ni Jesus kadakuada, “Ibagak ti pudno kadakayo: Awan ti maaramid ti Anak a bukbukodna, no di laeng ti makitana nga ar-aramiden ti Ama. Ta ti aniaman nga aramiden ti Ama, aramiden met ti Anak.

²⁰Ta ayaten ti Ama ti Anak ket ipakitana kenkuana ti amin nga ar-aramidenna. Ipakitana kenkuana dagiti aramid a daddadakkel pay ngem dagitoy, tapno agsiddaawkayo.

²¹Ta kas iti panamagungar ti Ama kadagiti natay ket biagenna ida, kasta met a ti Anak ikkanna iti biag dagiti kayatna nga ikkan.

²²Saan a mangukom ti Ama. Intedna iti Anakna ti naan-anay a kalintegan a mangukom,

²³tapno padayawan dagiti amin a tattao ti Anak a kas iti panangpadayawda iti Ama. Ti saan a mangpadayaw iti Anak, saanna met a padayawan ti Ama a nangibaon kenkuana.

²⁴“Ibagak ti pudno kadakayo: Ti siasinoman a dumngeg kadagiti saok ken mamati iti nangibaon kaniak, maaddaan iti biag nga agnanayon. Saanton a maukom, no di ket nalasatnan ni patay ket simreken iti biag.

²⁵“Ibagak ti pudno kadakayo: Adtoyen ti tiempo a mangngeg dagiti natay ti timek ti Anak ti Dios, ket agbiagto dagiti makangngeg.

²⁶Ta ti Ama met laeng ti pagtaudan ti biag. Pinagbalinna met ti Anakna a pagtaudan ti biag.

²⁷Ket intednan iti Anak ti turay a mangukom, agsipud ta isu ti Anak ti Tao.

²⁸“Diyo pagsiddaawan daytoy, ta umayen ti tiempo a dagiti amin a natay nga adda kadagiti tantanem mangngegdanto ti timekna,

²⁹agungardanto ket rummuarda kadagiti tantanemda. Agungarto a maipaay iti biag nga agnanayon dagiti nagaramid iti naimbag ngem agungarto a maipaay iti pannakadusa dagiti nagaramid iti dakes.”

³⁰Intuloy ni Jesus: “Awan ti maaramidko iti bukodko a pannakabalin. Mangukomak laeng kas ibaga kaniak ti Dios, isut' gapuna a nalinteg ti panangukomko, ta saan a ti pagayatak ti aramidek, no di laeng ti pagayatan ti nangibaon kaniak.

³¹“No saksiak ti bukodko a bagi, saan a maawat ti saok kas pammaneknek.

³²Ngem adda sabali a mangpaneknek kaniak, ket ammok a pudno ti ibagana.

³³Nangibaonkayo kadagiti mapan ken ni Juan, ket pinaneknekanna ti maipapan iti pudno.

³⁴Saanko a masapul ti pammaneknek ti tao, ngem ibagak daytoy tapno maisalakankayo.

³⁵Sumsumged ken agranraniag a silaw ti kayarigan ni Juan, ket iti apagbiit, kinayatyo a linak-am ti lawagna.

³⁶Ngem adda agsaksi kaniak a nangnangruna ngem ni Juan. Isu dagiti aramidko nga impaaramid kaniak ti Ama. Dagitoy nga aramid ti mangipakita nga imbaonnak ti Ama.

³⁷Ket ti Ama a nangibaon kaniak, paneknekanna met ti maipapan kaniak. Diyo nangngeg ti timekna wenno nakita ti rupana

³⁸ket saan nga agtalinaed ti saona kadakayo, ta diyo pay patien ti imbaonna.

³⁹“Ad-adalenyo dagiti Sursurat agsipud ta ipagarupyo a masarakan kadagitoy ti biag nga agnanayon. Ket dagitoy met laeng a Sursurat ti agsao maipapan kaniak.

⁴⁰Ngem diyo met kayat ti umay kaniak tapno agbiagkayo.

⁴¹“Diak sapulen a padayawandak dagiti tattao.

⁴²Ngem am-ammokayo ket ammok nga awan ayatyo iti Dios.

⁴³Immayak iti turay ni Amak ngem didak inawat. Nupay kasta, no adda umay iti bukodna a turay, awatenyo.

⁴⁴“Agpipinnadayawkayo, ngem diyo met kalikaguman ti pammadayaw nga aggapu iti maymaysa a Dios. Kasano ngarud ti panamatiyo kaniak?

⁴⁵Diyo ipagarup nga idarumkayo iti Ama. Ni Moises a nangitalkanyo iti namnamayo ti mangidarum kadakayo.

⁴⁶No agpayso met laeng a namatikayo ken ni Moises, pinatidak met koma, ta nagsurat iti maipapan kaniak.

⁴⁷Ngem no diyo pinati dagiti insuratna, kasano ti panamatiyo iti saok?”