Read Iloko John 6 Bible Online

John 6 - Iloko bible

John 6

¹Kalpasan daytoy, napan ni Jesus iti ballasiw ti Dan-aw ti Galilea (wenno Dan-aw ti Tiberias).

²Simmurot kenkuana ti nakaad-adu a tattao, agsipud ta nakitada dagiti nakaskasdaaw nga inaramidna idi pinaimbagna dagiti masaksakit.

³Simmang-at ni Jesus iti maysa a bantay. Nagtugaw sadiay agraman dagiti adalanna.

⁴Asideg idin ti Fiesta ti Paskua dagiti Judio.

⁵Inwaras ni Jesus ti panagkitana ket naimatanganna ti nakaad-adu a tattao nga umas-asideg kenkuana. Kinunana ken ni Felipe, “Panggatangantayo ngata iti makaanay a kanen dagitoy a tattao?” (

⁶Kinunana daytoy a pangsuot ken ni Felipe. Kinapudnona, ammo idin ni Jesus ti aramidenna.)

⁷“Saan nga umanay ti 200 a denario nga igatang iti tinapay a pagbibingayanda uray saggabassitda laeng,” kinuna ni Felipe.

⁸“Adda maysa nga ubing a lalaki ditoy a nagbalon iti lima a tinapay a sebada ken dua nga ikan,” kinuna ni Andres a maysa kadagiti adalanna ken kabsat ni Simon Pedro. “Ngem ania met dagitoy iti kastoy a kaadu ti tao?”

⁹

¹⁰Karuotan sadiay ket imbaga ni Jesus a pagtugawenda dagiti tattao. Nagtugaw dagiti amin a tattao. Aglimaribu dagiti lallaki.

¹¹Innala ni Jesus dagiti tinapay, nagyaman iti Dios, sana imbunong kadagiti nakatugaw a tattao. Kasta met ti inaramidna kadagiti ikan. Nangan dagiti tattao agingga a napnekda.

¹²Idi nabsogda aminen, kinuna ni Jesus kadagiti adalanna, “Urnongenyo dagiti natda ket awan ibellengyo tapno awan madadael.”

¹³Inurnongda ngarud dagiti amin a natda kadagiti lima a tinapay a saan a naibus dagiti tattao ket napno ti sangapulo ket dua a basket a nagikargaanda.

¹⁴Idi makita dagiti tattao sadiay ti milagro nga inaramid ni Jesus, kinunada, “Awan duadua a daytoy ti Profeta nga umay ditoy lubong!”

¹⁵Idi madlaw ni Jesus nga umay dagiti tattao a mangala kenkuana tapno pilitenda nga isaad nga ari, nagpakni manen nga is-isuna kadagiti bambantay.

¹⁶Idi sumipngeten, simmalog dagiti adalanna iti dan-aw.

¹⁷Limmuganda iti bangka, ket bimmallasiwda a nagpa-Capernaum. Rabiin, ngem di pay la dimteng ni Jesus kadakuada.

¹⁸Mangrugi idin nga agdawel ti danum, ta dimteng ti napigsa nga angin.

¹⁹Nakapaggauden dagiti adalan iti aglima wenno innem a kilometro idi makitada ni Jesus a magmagna iti rabaw ti danum. Kasta unay ti butengda idi umas-asideg iti bangka.

²⁰Ngem kinuna ni Jesus kadakuada, “Dikay agbuteng, siak ni Jesus!”

²¹Siraragsakda a nangilugan kenkuana iti bangka. Iti apagbiit, simmangladda iti disso a papananda.

²²Iti sumaruno nga aldaw, nakita dagiti tattao a nagbati iti ballasiw ti dan-aw a maymaysan ti bangka a nakapundo sadiay. Ammo dagiti tattao a saan a nakilugan ni Jesus kadagiti adalanna iti bangka. Dagiti laeng adalanna ti nagluas.

²³Nupay kasta, adda dadduma a bangka a naggapu idiay Tiberias a simmanglad iti asideg ti disso a nanganan dagiti adu a tattao kadagiti tinapay kalpasan ti panagyaman ti Apo.

²⁴Ngem idi makita dagiti tattao nga awan sadiay ni Jesus wenno dagiti adalanna, nagluganda kadagiti bangka a nangsapul kenkuana idiay Capernaum.

²⁵Idi masarakan dagiti tattao nga adda ni Jesus idiay ballasiw ti dan-aw, kinunada kenkuana, “Maestro, kaano ti yaaymo ditoy?”

²⁶“Ibagak kadakayo ti pudno: Sapsapulendak gapu ta nangankay iti tinapay ket nabsogkayo, saan a gapu ta nakitayo dagiti nakaskasdaaw nga aramidko,” insungbat ni Jesus.

²⁷“Dikay agbannog gapu iti taraon a madadael. Agbannogkayo ketdi gapu iti taraon nga agpaut iti biag nga agnanayon. Daytoy ti taraon nga itedto kadakayo ti Anak ti Tao, ta inted ti Dios Ama kenkuana ti yaanamongna.”

²⁸Iti kasta, sinaludsodda kenkuana, “Ania ti aramidenmi tapno matungpalmi dagiti paaramid ti Dios?”

²⁹“Daytoy ti kayat ti Dios nga aramidenyo: Patienyo ti imbaonna,” insungbat ni Jesus.

³⁰Kinunada ngarud kenkuana: “Ania ti maipakitam a milagro tapno mamatikami kenka? Ania ti aramidem?

³¹Nangan dagiti kapuonantayo iti mana idiay let-ang, kas nailanad iti Nasantoan a Surat, ‘Inikkanna ida iti tinapay a kanenda a naggapu sadi langit.’”

³²Kinuna ni Jesus, “Ibagak ti pudno kadakayo: Saan a ni Moises ti nangted kadakayo iti tinapay a naggapu sadi langit. Ni Amak ti mangted kadakayo iti pudno a tinapay nga aggapu sadi langit.

³³Ta ti tinapay nga ited ti Dios isu ti bumaba manipud langit a mangted biag iti lubong.”

³⁴“Apo,” kinunada kenkuana, “ikkannakami man a kanayon iti kasta a tinapay.”

³⁵Kinuna ni Jesus kadakuada, “Siak ti tinapay ti biag. Ti umay kaniak, dinto mabisinan, ket ti mamati kaniak, dinto mawaw.

³⁶“Ita, nasaokon kadakayo a nakitadakon ngem dikay met mamati.

³⁷Umayto kaniak dagiti amin nga ited ni Amak. Ket ti umay kaniak, diakto pagtalawen.

³⁸Ta bimmabaak manipud langit tapno aramidek ti pagayatan ti nangibaon kaniak, saan a ti pagayatak.

³⁹Ket pagayatan ti nangibaon kaniak nga awan ti mapukawko uray maysa kadagiti amin nga intedna kaniak, no di ket pagungarekto amin ida inton maudi nga aldaw.

⁴⁰Ta pagayatan ni Amak nga amin a makakita ken mamati iti Anak adda biagna nga agnanayon. Ket pagungarekto ida inton maudi nga aldaw.”

⁴¹Nagdadayamudom dagiti Judio gapu iti kinunana nga isu ti tinapay a bimmaba manipud langit.

⁴²Kinunada, “Saan aya a daytoy ni Jesus nga anak ni Jose? Am-ammotayo ti ama ken inana. Apay ngarud a kunana ita a bimmaba manipud langit?”

⁴³“Isardengyo ti agdadayamudom,” insungbat ni Jesus.

⁴⁴“Awan ti makaumay kaniak no saan nga allukoyen ti Ama a nangibaon kaniak; ket pagungarekto inton maudi nga aldaw.

⁴⁵Insurat dagiti profeta: ‘Isuronto ti Dios dagiti amin a tattao.’ Umay kaniak ti dumngeg ken makasursuro iti Ama.

⁴⁶Saanna a kayat a sawen daytoy nga addan nakakita iti Ama. Ti laeng naggapu iti Dios ti nakakita iti Ama.

⁴⁷“Ibagak kadakayo ti pudno: Ti mamati adda biagna nga agnanayon.

⁴⁸Siak ti tinapay ti biag.

⁴⁹Nangan dagiti kapuonanyo iti mana idiay let-ang, ngem natayda met laeng.

⁵⁰Ngem saan a matay ti uray siasino a mangan iti tinapay nga aggapu sadi langit.

⁵¹Siak ti sibibiag a tinapay a naggapu sadi langit. No kanen ti siasinoman daytoy a tinapay, agbiagto nga agnanayon. Ket ti tinapay nga itedkonto isu ti lasagko. Wen, itedko tapno agbiag ti lubong.”

⁵²Gapu iti daytoy, rimsua ti panagsisinnuppiat dagiti Judio. “Kasano ti pannangted daytoy a tao iti lasagna a kanentayo?” kinunada.

⁵³“Ibagak ti pudno kadakayo,” kinuna ni Jesus kadakuada. “No saanyo a kanen ti lasag ken inumen ti dara ti Anak ti Tao, awan ti biag kadakayo.

⁵⁴Ti mangan iti lasagko ken uminum iti darak, adda biagna nga agnanayon, ket pagungarekto inton maudi nga aldaw.

⁵⁵Ta ti lasagko ti napaypayso a taraon, ket ti darak ti napaypayso nga inumen.

⁵⁶Ti mangan iti lasagko ken uminum iti darak agtaeng kaniak, ket agtaengak met kenkuana.

⁵⁷Imbaonnak ti sibibiag nga Ama, ket agbiagak met gapu kenkuana. Kasta met a ti mangan kaniak, agbiagto gapu kaniak.

⁵⁸Daytoy ti tinapay a naggapu sadi langit: Saan a kas iti tinapay a kinnan idi dagiti kapuonanyo ta natayda met laeng kalpasanna. Ti mangan iti daytoy a tinapay, agbiagto nga agnanayon.”

⁵⁹Imbaga daytoy ni Jesus bayat ti panangisurona iti uneg ti sinagoga idiay Capernaum.

⁶⁰Adu kadagiti adalanna ti nakangngeg iti daytoy. “Narikut unay daytoy a pannursuro,” kinunada. “Siasino ti umanamong iti sasawenna?”

⁶¹Nupay no awan ti nangibagbaga kenkuana, ammo ni Jesus nga agdadayamudom dagiti adalanna gapu iti daytoy. Iti kasta, kinunana kadakuada: “Maupaykayo kadi gapu iti daytoy?

⁶²Anianto la ketdin no makitayo ti Anak ti Tao nga umuli iti sigud a yanna?

⁶³Ti Espiritu ti makaited iti biag. Awan a pulos ti maited ti lasag. Espiritu ken biag dagiti insaok kadakayo.

⁶⁴Nupay kasta, adda sumagmamano kadakayo a di mamati.” (Sigud nga ammo ni Jesus no siasino dagiti saan a mamati ken no siasino ti mangliputto kenkuana.)

⁶⁵Kinunana pay, “Daytoy ti gapuna nga imbagak kadakayo nga awan ti makaumay kaniak no saan nga ipalubos ti Ama.”

⁶⁶Gapu iti daytoy, pinanawan dagiti adu a pasurotna ket saandan a kimmuyog kenkuana.

⁶⁷Iti kasta, kinuna ni Jesus kadagiti sangapulo ket dua nga adalan, “Ket dakayo, kayatyo met ti pumanaw?”

⁶⁸“Apo,” insungbat ni Simon Pedro, “siasino pay aya ti papananmi? Adda kenka dagiti sao a makaited iti biag nga agnanayon.

⁶⁹Ket ita, mamatikami ken ammomi a sika ti Nasantoan a naggapu iti Dios.”

⁷⁰“Saankay aya a sangapulo ket dua a pinilik?” insungbat ni Jesus kadakuada. “Nupay kasta, maysa kadakayo ti diablo.”

⁷¹Ni Judas nga anak ni Simon Iscariote ti kayatna a sawen, ta nupay maysa kadagiti sangapulo ket dua adalan, isunto ti mangliput kenkuana.