Read Iloko John 7 Bible Online

John 7 - Iloko bible

John 7

¹Kalpasan daytoy, sinursor ni Jesus ti Galilea. Dina kinayat ti agdaliasat idiay Judea, ta gandaten a papatayen dagiti papangulo a Judio.

²Umadanin ti pannakarambak ti Fiesta dagiti Abong-abong.

³Daytoy ti gapuna a kinuna dagiti lallaki a kakabsat ni Jesus, “Pumanawka ditoy ket inka idiay Judea, tapno makita dagiti adalam dagiti trabaho nga ar-aramidem.

⁴Ta awan ti tao a mangilimed iti aramidna no tarigagayanna ti aglatak. Yantangay ar-aramidem dagitoy, ipakaammom ngarud ti bagim iti entero a lubong!” (

⁵Uray dagiti kakabsatna dida namati kenkuana.)

⁶Kinuna ni Jesus kadakuada, “Di pay dimteng ti tiempok. Dakayo, kukuayo ti amin a tiempo.

⁷Dinakay mabalin a guraen ti lubong, ngem guraennak ta ibagbagak a dakes dagiti aramidna.

⁸Dakayo ti mapan makifiesta. Saanak a mapan iti daytoy a fiesta, ta di pay dimteng ti tiempok.”

⁹Imbagana daytoy ket nagtalinaed idiay Galilea.

¹⁰Napan met laeng nakifiesta ni Jesus idi nakapanen dagiti kakabsatna. Ngem saan a nagpadlaw a napan.

¹¹Bayat ti fiesta, binirbirok dagiti pangulo a Judio. “Sadino ngata ti yanna?” kunkunada.

¹²Adu ti saosao dagiti tattao maipapan kenkuana. Kinuna ti sumagmamano kadakuada, “Isu ket naimbag a tao.” “Saan,” kinuna met dagiti dadduma, “ta allilawenna dagiti tattao.”

¹³Nupay kasta, awan ti nagsao a silalatak maipapan kenkuana ta mabutengda kadagiti papangulo a Judio.

¹⁴Iti katengngaan ti fiesta, napan nangisuro ni Jesus idiay Templo.

¹⁵Kasta unay ti siddaaw dagiti Judio. “Naggapuan ngata ti adu unay nga ammo daytoy a tao, idinto ta di met nagad-adal a pulos?” kunkunada.

¹⁶“Saanko a bukod a pannursuro ti isursurok, no di ket agtaud iti Dios a nangibaon kaniak,” insungbat ni Jesus.

¹⁷“Ti siasinoman a mayat nga agaramid iti pagayatan ti Dios, maammoannanto no agtaud iti Dios ti isursurok wenno agsaoak iti kabukbukodak a turay.

¹⁸Ti tao nga agsao iti bukodna a turay, sapsapulenna ti pakaidayawanna met laeng. Ngem ti agtarigagay iti pannakaidayaw ti nangibaon kenkuana, napudno ket awan ti kinaulbod kenkuana.

¹⁹Saan aya nga inted ni Moises ti Linteg kadakayo? Ngem awan kadakayo ti mangtungpal iti Linteg. Apay a kayatdak a papatayen?”

²⁰“Agmauyongka!” insungbat dagiti tattao. “Siasino ti agpanggep a mangpapatay kenka?”

²¹“Maysa a milagro ti inaramidko ket nasdaawkay amin,” kinuna ni Jesus.

²²“Gapu ta imbilin kadakayo ni Moises a kugitenyo dagiti annakyo, kugitenyo ti ubing iti Aldaw a Panaginana (nupay saan a ni Moises ti nangirugi iti daytoy no di ket dagiti ammayo).

²³No maipalubos a makugit ti ubing iti Aldaw a Panaginana tapno saan a masalungasing ti Linteg ni Moises, apay a kaungetdak gapu ta pinaimbagko ti maysa a tao iti Aldaw a Panaginana?

²⁴Dikayo mangukom babaen iti makitayo. Mangukomkayo ketdi babaen iti nalinteg a panangukom.”

²⁵Kinuna ti sumagmamano a taga-Jerusalem, “Saan kadi a daytoy ti tao a kayatda a papatayen?

²⁶Kitaenyo! Agsasao iti publiko, ngem awan masaoda a maikontra kenkuana. Agpayson sa ketdi nga ammo dagiti agtuturay nga isu ti Cristo?

²⁷Inton umay ti Cristo, awan ti makaammo no sadino ti paggapuanna. Ngem ammotayo ti naggapuan daytoy a tao.”

²⁸Idi madama a mangisursuro ni Jesus idiay Templo, kinunana iti napigsa a timek, “Pudno kadi nga am-ammodak? Ammoyo kadi ti naggapuak? Diak immay a naknakemko. Ti nangibaon kaniak isu ti pudno, ngem diyo am-ammo.

²⁹Am-ammok ti nangibaon kaniak ta naggapuak kenkuana.”

³⁰Gapu iti daytoy, pinanggepda a tiliwen, ngem awan mayat a mangtengngel kenkuana, ta di pay dimteng ti tiempo a mapasamak kenkuana daytoy.

³¹Nupay kasta, adu kadagiti tattao ti namati kenkuana. “Inton umay ti Cristo, agaramidto ngata iti ad-adu a milagro ngem ti inaramid daytoy a tao?” kinunada.

³²Nangngeg dagiti Fariseo ti sao dagiti tattao maipapan ken ni Jesus. Iti kasta, isuda ken dagiti panguloen a papadi imbaonda dagiti guardia ti Templo a mangtiliw kenkuana.

³³Kinuna ngarud ni Jesus, “Makipagyanak pay kadakayo iti bassit a tiempo. Kalpasanna, agsubliakton iti nangibaon kaniak.

³⁴Sapulendakto ngem didakto masarakan, gapu ta dikay makaumay iti papanak.”

³⁵Kinuna dagiti papangulo a Judio iti maysa ken maysa, “Sadino ngata ti papananna tapno ditayto masarakan? Mapanto ngata kadagiti il-ili dagiti Griego a yan dagiti naiwaraswaras a Judio ket isuronanto dagiti Griego?

³⁶Ania ti kayatna a sawen iti panagkunana, ‘Sapulendakto ngem didakto masarakan,’ ken ‘Dikay makaumay iti papanak’?”

³⁷Iti maudi ken kangrunaan nga aldaw ti fiesta, nagtakder ni Jesus ket kinunana iti napigsa a timek, “Ti siasinoman a mawaw, umay kaniak tapno uminum.

³⁸Kas kuna ti Nasantoan a Surat, ‘Agayusto dagiti karayan ti sibibiag a danum manipud iti puso ti siasinoman a mamati kaniak.’”

³⁹(Sinao daytoy ni Jesus maipapan iti Espiritu ti Dios a dandanin awaten dagiti namati kenkuana. Ta iti dayta a tiempo, saan pay a naited ti Espiritu, agsipud ta di pay naitan-ok ni Jesus.)

⁴⁰Adu kadagiti tattao a naitaripnong ti nakangngeg iti daytoy nga imbaga ni Jesus. “Pudno nga isu daytoy ti profeta!” kinunada.

⁴¹Kinuna dagiti dadduma, “Isu ti Cristo!” Ngem adda met nagkuna, “Saan nga idiay Galilea ti paggapuan ti Cristo!

⁴²Saan aya a kuna ti Nasantoan a Surat nga agtaud ti Cristo iti kaputotan ni David, ket mayanak idiay Betlehem, iti ili a nagnaedan ni David?”

⁴³Iti kasta, rimsua ti panagsusupadi dagiti tattao gapu kenkuana.

⁴⁴Kayat idi ti dadduma kadakuada a tiliwen ni Jesus, ngem awan uray maysa a nangsagid kenkuana.

⁴⁵Nagsubli dagiti guardia ti Templo kadagiti panguloen a papadi ken kadagiti Fariseo. “Apay a diyo inyeg ditoy?” sinaludsod dagiti panguloen a papadi ken dagiti Fariseo.

⁴⁶“Awan pay ti nagsao a kas iti panagsao daytoy a tao!” insungbat dagiti guardia.

⁴⁷Kinuna dagiti Fariseo kadakuada, “Uray dakayo, inallilawnakayo met kadi?

⁴⁸Adda aya naammoanyon nga agtuturay wenno Fariseo a mamati kenkuana?

⁴⁹Ngem mailunod dagitoy a tattao ta dida ammo ti Linteg ni Moises.”

⁵⁰Nupay kasta, nagsao ti maysa kadakuada, ni Nicodemo, a napan idi nakisao ken ni Jesus.

⁵¹“Segun ti paglintegantayo,” kinunana, “ditayo mabalin a dusaen ti maysa a tao no ditay mangngegan ken maammoan no ania ti inaramidna.”

⁵²“Taga-Galileaka met kadi?” kinunada kenkuana. “Sukimatem dagiti Sursurat ket maammoamto nga awan a pulos ti profeta a tumaud idiay Galilea.”