Read Iloko John 8 Bible Online

John 8 - Iloko bible

John 8

¹[Nagawid dagiti amin a tattao, ngem napan ni Jesus idiay Bantay Olivo.

²Kabigatanna, nasapa a nagsubli idiay Templo. Inaribungbongan ti adu a tattao ket nagtugaw a nangisuro kadakuada.

³Inyeg dagiti mamaestro iti Linteg ken dagiti Fariseo ti maysa a babai a natiliwanda a makikamkamalala. Pinagtakderda iti sangoananda amin.

⁴“Maestro,” kinunada ken ni Jesus, “natiliwanmi daytoy a babai a makikamkamalala.

⁵Iti Lintegtayo, imbilin ni Moises a mapapatay ti kasta a babai iti pannakabato. Ania ti kunam?”

⁶Kinunada daytoy ta kayatda a maisao ni Jesus dagiti balikas a pangigapuanda a mangidarum kenkuana. Ngem nagrukob ni Jesus ket nagsurat iti daga babaen iti ramayna.

⁷Idi ulit-ulitenda ti saludsodda, timmakder ket kinunana kadakuada, “Ti awanan basol kadakayo ti umuna a mangbato kenkuana.”

⁸Nagrukob manen a nagsurat iti daga.

⁹Ngem idi mangngegda ti kinunana, saggaysada a pimmanaw. Immuna dagiti nataengan. Ni laeng Jesus ti nabati ken ti babai nga agtaktakder pay laeng iti sangoananna.

¹⁰Timmakder ni Jesus ket kinunana kenkuana, “Babai, sadino ti ayandan? Awan kadi ti nagbati a mangdusa kenka?”

¹¹“Awan, Apo,” insungbatna. Kinuna ni Jesus, “Uray siak, saanka a dusaen. Inkan, ket saanka nga agbasolen.”]

¹²Nagsao manen ni Jesus kadagiti Fariseo, “Siak ti silaw ti lubong,” kinunana. “Siasinoman a sumurot kaniak maaddaan iti silaw ti biag, ket dinto magna iti kasipngetan.”

¹³Kinuna dagiti Fariseo kenkuana, “Sika met laeng ti mangsaksi iti bagim. Saan ngarud a pudno ti ibagbagam.”

¹⁴“Uray no saksiak ti bukodko a bagi,” insungbat ni Jesus, “pudno ti ibagbagak ta ammok ti naggapuak ken ti papanak. Diyo ammo ti naggapuak ken ti papanak.

¹⁵Mangukomkayo kas mayannurot iti pagalagadan ti tao. Diak mangukom iti uray siasino.

¹⁶Ngem no mangukomak, umno ti panangukomko, ta saan a sisiak ti mangukom no di ket kaduak pay ti Ama a nangibaon kaniak.

¹⁷Naisurat iti Lintegyo a no agtunos ti pammaneknek ti dua a saksi, maawat a kas pudno ti ibagada.

¹⁸Saksiak met laeng ti bukodko a bagi, ket saksiannak met ti Ama a nangibaon kaniak.”

¹⁹“Sadino ti ayan ni amam?” sinaludsodda. “Saandak nga am-ammo,” insungbat ni Jesus, “ket diyo met am-ammo ni Amak. No am-ammodak koma, am-ammoyo met koma ni Amak.”

²⁰Insao ni Jesus dagitoy bayat ti panangisursurona idiay Templo, iti kuarto a nakaikabilan dagiti kaha ti daton. Ngem awan ti nangtiliw kenkuana, ta di pay dimteng ti oras.

²¹Kinuna manen ni Jesus kadakuada, “Pumanawakon, ket sapulendakto, ngem dikay makaumay iti papanak. Mataykayto a sibabasol.”

²²Iti kasta, kinuna dagiti papangulo a Judio, “Apay ngata a kunana a ditayo makapan iti papananna? Kayatna kadi a sawen a patayennanto ti bagina?”

²³“Taga-dagakayo, ngem taga-langitak,” insungbat ni Jesus. “Aggapukay iti daytoy a lubong, ngem saanak a naggapu iti lubong.

²⁴Isut' gapuna a kinunak kadakayo a mataykayto kadagiti basbasolyo. Wen, mataykayto kadagiti basbasolyo no dikay mamati a ‘Siak’ ti ibagbagak.”

²⁵“Siasinoka aya?” sinaludsodda. “Ti imbagak kadakayo manipud idi damo.

²⁶No maipapan kadakayo, adu ti masaok ken babalawek. Ngem pudno ti nangibaon kaniak, ket ibagak iti lubong ti nangngegko kenkuana,” insungbat ni Jesus.

²⁷Saanda a naawatan a maipapan iti Ama ti sinaona.

²⁸Iti kasta, kinuna ni Jesus kadakuada, “Inton maibayogyo ti Anak ti Tao, maammoanyonton a ‘Siak’ ti ibagbagak. Kasta met nga awan ti aramidek a sisiak, ngem sawek laeng ti insuro kaniak ti Ama.

²⁹Kaduak ti nangibaon kaniak. Saannak a binaybay-an nga agmaymaysa, agsipud ta kanayon nga aramidek ti makaparagsak kenkuana.”

³⁰Adu ti namati kenkuana idi sasawenna daytoy.

³¹Kinuna ngarud ni Jesus kadagiti Judio a namati kenkuana, “No agtalinaedkayo iti pannursurok, dakayo dagiti napaypayso nga adalak.

³²Maammoanto ti pudno, ket ti pudno wayawayaannakayto.”

³³“Kaputotannakami ni Abraham,” insungbatda. “Ket uray kaano, awan pay nangadipen kadakami. Ania ti kayatmo a sawen a mawayawayaankaminto?”

³⁴“Ibagak ti pudno kadakayo,” kinuna ni Jesus kadakuada. “Siasinoman nga agaramid iti basol, adipen ti basol.

³⁵Ti anak agnanayon a kameng ti familia, ngem ti adipen saan.

³⁶Ngarud, no wayawayaannakayo ti Anak, pudno a siwawayakayton.

³⁷Ammok a kaputotannakayo ni Abraham. Nupay kasta, kayatdak a papatayen, agsipud ta diyo awaten ti pannursurok.

³⁸Sawek dagiti impakita kaniak ni Amak, ngem dakayo, aramidenyo dagiti insuro kadakayo ni amayo.”

³⁹“Ni Abraham ti amami,” insungbatda kenkuana. “No agpayso nga annaknakayo ni Abraham,” kinuna ni Jesus, “aramidenyo met koma dagiti inaramidna.

⁴⁰Awan ti inaramidko no di imbagak laeng kadakayo ti pudno a nangngegko iti Dios. Nupay kasta, kayatdak a papatayen. Awan ti kasta nga inaramid ni Abraham.

⁴¹Dakayo, ar-aramidenyo ti aramid ti amayo.” “Saankami a bastardo,” insungbatda. “Maymaysa ti Amami, ti Dios a mismo.”

⁴²“No agpayso met laeng nga amayo ti Dios,” kinuna ni Jesus, “ayatendak met koma; ta naggapuak iti Dios, ket ita, addaak ditoyen. Diak immay a naknakemko, no di ket imbaonnak ti Dios.

⁴³Apay a diyo maawatan ti ibagbagak? Gapu ta diyo maibturan a denggen ti mensahek?

⁴⁴Annaknakayo ti Diablo nga amayo, ket kayatyo a tungpalen ti pagayatanna. Mammapatayen manipud idi damo ket pulos a dina kanunongan ti pudno, ta awan kenkuana ti pudno. No agulbod, ar-aramidenna laeng ti natural kenkuana ta sigud nga ulbod ken ama ti amin a kinaulbod.

⁴⁵Sawek ti pudno, ket daytoy ti gapuna a didak patien.

⁴⁶Siasino kadakayo ti makapaneknek a nagbasolak? No ibagak ti pudno, apay ngarud a didak patien?

⁴⁷Ti agtaud iti Dios, denggenna dagiti sao ti Dios. Ngem saankayo a nagtaud iti Dios, ket daytoy ti gapuna a dikay dumngeg.”

⁴⁸“Saan kadi a pudno ti kunami a Samaritanoka ket adda demoniom?” kinuna dagiti Judio ken ni Jesus.

⁴⁹“Awan ti demonio kaniak,” insungbat ni Jesus. “Padayawak ni Amak, ngem dakayo, saandak a padayawan.

⁵⁰Diak sapulen ti pakaidayawak. Ngem adda sabali a mangsapul iti dayta ket isunto ti ukom.

⁵¹Ibagak ti pudno kadakayo: Dinto matay ti siasinoman a mangtungpal iti saok.”

⁵²“Ita, mapnekkamin nga adda demoniom!” kinuna dagiti Judio. “Natay ni Abraham kasta met dagiti profeta, ngem kunam a dinto matay ti siasinoman a mangtungpal iti saom.

⁵³Natay ni Amami nga Abraham. Kayatmo a sawen a natantan-okka ngem ni Abraham? Ania ti panangipagarupmo iti bagim?”

⁵⁴“No idaydayawko ti bagik a mismo,” insungbat ni Jesus, “awan serserbi dayta a pammadayaw. Ti mangidayaw kaniak isu ni Amak a kunayo a Diosyo.

⁵⁵Saanyo nga am-ammo, ngem am-ammok. No kunak a diak am-ammo, ulbodak a kas kadakayo. Ngem am-ammok ket tungpalek ti saona.

⁵⁶Nagragsak ni Abraham nga amayo ta ninamnamana a makita ti aldawko; nakitana ket naragsakan.”

⁵⁷Kinuna dagiti Judio kenkuana, “Kasano a nakitamon ni Abraham, idinto ta awan pay 50 a tawenmo?”

⁵⁸Kinuna ni Jesus, “Ibagak ti pudno kadakayo: Sakbay a nayanak ni Abraham, addaakon.”

⁵⁹Nagpidut dagiti tattao kadagiti bato a pangubor ken ni Jesus, ngem naglemmeng ket rimmuar iti Templo.