Read Iloko John 9 Bible Online

John 9 - Iloko bible

John 9

¹Bayat ti pannagna ni Jesus, nakitana ti maysa a lalaki a bulsek manipud pannakayanakna.

²Sinaludsod kenkuana dagiti adalanna, “Maestro, siasino ti akimbasol iti pannakayanak a bulsek daytoy a tao? Basolna kadi wenno basol dagiti nagannak kenkuana?”

³“Awan ti pakainaigan ti kinabulsek daytoy a tao iti basolna wenno iti basol dagiti nagannak kenkuana,” insungbat ni Jesus. “Bulsek daytoy tapno makita kenkuana ti pannakabalin ti Dios.

⁴Masapul nga aramidentayo dagiti ipaaramid ti nangibaon kaniak ta aldaw pay. Dumteng ti rabii ket awan ti makatrabaho.

⁵Bayat ti kaaddak ditoy lubong, siak ti silaw ti lubong.”

⁶Idi naisaon ni Jesus daytoy, timmupra iti daga. Inggamayna ti tuprana iti tapok ket inyaprosna iti mata ti bulsek

⁷sana kinuna kenkuana, “Inka agdiram-os idiay pagdidigosan ti Siloe.” (“Naibaon” ti kayat a sawen ti Siloe.) Napan ngarud ti bulsek ket nagdiram-os. Idi agsubli, makakitan.

⁸Idi makita dagiti kaarrubana ken dagiti tattao a makaam-ammo kenkuana a maysa a makilimlimos idi, kinunada, “Saan kadi a daytoy ti tao a masansan nga agtugaw ditoy a makilimlimos?”

⁹“Wen, isu!” kinuna ti dadduma. “Saan nga isu,” kinuna met dagiti dadduma. “Kaing-ingasna laeng!” Iti kasta, mismo a ti lalaki ti nagkuna, “Wen, pudno a siak daydi makilimlimos.”

¹⁰Kinunada kenkuana, “Ngem apay a makakitaka metten?”

¹¹“Inggamay ti maysa a tao nga agnagan Jesus ti tuprana iti tapok sana inyapros kadagiti matak,” insungbat ti lalaki. “Kalpasanna, imbaonnak a mapan agdiram-os idiay Siloe. Napanak ngarud, ket apaman a nakadiram-osak, makakitaak metten!”

¹²“Sadino ti ayan ti nangpaimbag kenka?” sinaludsodda. “Diak ammo,” insungbatna.

¹³Kalpasanna, impanda ti naimbagan a bulsek iti ayan dagiti Fariseo.

¹⁴Aldaw a Panaginana idi nanggamay ni Jesus iti pitak a pinangagasna kadagiti mata ti bulsek.

¹⁵Ngarud, sinaludsod met dagiti Fariseo no kasano a napaimbag dagiti matana. “Inaprosanna dagiti matak iti pitak, nagdiram-osak, ket ita makakitaakon,” kinunana kadakuada.

¹⁶Kinuna ti sumagmamano a Fariseo, “Saan a naggapu iti Dios ti tao a nangaramid iti daytoy, agsipud ta dina annuroten ti paglintegan iti Aldaw a Panaginana.” Kinuna met ti dadduma, “Kasano ti pannakabalin ti maysa a managbasol nga agaramid kadagiti kakasta a nakaskasdaaw a pagilasinan?” Agsusupadi ti pampanunotda.

¹⁷Iti kasta, pinalutpot manen dagiti Fariseo ti lalaki. “Kunam a pinaimbagna dagiti matam. Ania ti masaom maipapan kenkuana?” “Maysa a profeta,” insungbatna.

¹⁸Nupay kasta, saan a patien dagiti Judio a bulsek idi daytoy a tao, ket ita, makakitan. Isut' gapuna nga inayabanda dagiti nagannak kenkuana.

¹⁹“Anakyo kadi daytoy?” sinaludsodda. “Kunayo a nayanak a bulsek. Apay ngarud a makakitan?”

²⁰“Wen, anakmi daytoy,” insungbat dagiti nagannak. “Ammomi a nayanak a bulsek.

²¹Ngem saanmi nga ammo no kasano a makakitan. Saanmi met nga ammo no siasino ti nangpaimbag kenkuana. Isu ti pagsaludsodanyo ta nataengan metten. Ammona ti isungsungbatna!”

²²Sinao dagiti nagannak daytoy agsipud ta mabutengda kadagiti papangulo a Judio a nanganamongen a mapagtalaw iti sinagoga ti siasinoman a mangibaga a mamati a ni Jesus isu ti Cristo.

²³Dayta ti gapuna a kinuna dagiti nagannak, “Nataenganen; isu ti pagsaludsodanyo!”

²⁴Inayabanda manen ti tao a nayanak a bulsek ket kinunada kenkuana, “Ikarim iti sangoanan ti Dios nga ibagam ti pudno! Ammomi a managbasol dayta a tao!”

²⁵“Diak ammo no managbasol wenno saan,” insungbat ti napaimbag. “Daytoy ti ammok: Bulsekak idi, ngem ita, makakitaakon!”

²⁶“Ania ti inaramidna kenka?” sinaludsodda. “Kasano ti panangpaimbagna kadagita matam?”

²⁷“Imbagak la ngaruden kadakayo, ngem didak met patien,” insungbatna. “Apay a kayatyo manen a denggen? Kayatyo met kadi ti agbalin nga adalanna?”

²⁸Nagsasawanda ket kinunada, “Sika ti adalanna, ket dakami ti adalan ni Moises.

²⁹Ammomi a nagsao ti Dios ken ni Moises. Ngem no maipapan iti dayta a tao, dimi pay ammo ti naggapuanna!”

³⁰“Nakaskasdaaw unay daytoy!” insungbatna. “Saanyo nga ammo ti naggapuanna, ngem pinaimbagnak!

³¹Ammotayo a saan nga ipangag ti Dios dagiti managbasol, ngem ipangagna dagiti tattao nga agdayaw kenkuana ken agaramid iti pagayatanna.

³²Manipud pannakaparsua ti lubong, awan pay nadamag a nanglukat kadagiti mata ti tao a nayanak a bulsek.

³³Awan ti mabalin nga aramiden dayta a tao no saan a naggapu iti Dios.”

³⁴“Nayanak ken dimmakkelka iti basol, dakam ket ti isuromon?” insungbatda kenkuana ket pinagtalawda iti sinagoga.

³⁵Nadamag ni Jesus ti napasamak. Sinapulna ti bulsek ket idi agsarakda, kinunana kenkuana, “Mamatika kadi iti Anak ti Tao?”

³⁶“Ibagam kaniak, apo, no siasino tapno mamatiak kenkuana!” insungbat ti lalaki.

³⁷“Nakitamon,” kinuna ni Jesus. “Isu ti kasasaom.”

³⁸“Mamatiak, Apo!” kinuna ti tao, ket nagparintumeng a nagdaydayaw ken ni Jesus.

³⁹Kinuna ni Jesus, “Immayak mangukom ditoy lubong tapno makakita dagiti bulsek, ket agbulsek dagiti makakita.”

⁴⁰Nangngeg ti sumagmamano a Fariseo a naitallaong sadiay ti kinuna ni Jesus, ket sinaludsodda kenkuana, “Ibagbagam kadi a bulsekkami met?”

⁴¹“No bulsekkayo, awan koma ti pakabasolanyo,” insungbat ni Jesus. “Ngem gapu ta kunayo met a makakitakayo, kayatna a sawen nga adda latta basolyo.”