Read Iloko Acts 1 Bible Online

Acts 1 - Iloko bible

Acts 1

¹Ay-ayatek a Teofilo, Iti immuna a librok, insuratko amin nga inar-aramid ken insursuro ni Jesus, manipud panangirugina iti trabahona

²agingga iti aldaw a yuulina sadi langit. Sakbay ti yuulina babaen iti pannakabalin ti Espiritu Santo, binilinna dagiti pinilina nga apostoles.

³Iti las-ud ti 40 nga aldaw kalpasan ti ipapatayna, namin-adu a nagparang kadakuada iti nadumaduma a wagas a mangpaneknek a pudno a sibibiag. Nakitada ni Jesus ket sinaritana kadakuada ti maipapan iti Pagarian ti Dios.

⁴Idi naguurnongda, imbilin ni Jesus kadakuada: “Dikayo pumampanaw ditoy Jerusalem, ta urayenyo ti inkari ti Ama kas imbagak kadakayo.

⁵Namuniag ni Juan iti danum, ngem kalpasan ti sumagmamano pay nga aldaw, mabuniagankayto iti Espiritu Santo.”

⁶Idi naguurnong dagiti apostoles, sinaludsodda ken ni Jesus, “Apo, isublim kadi itan ti Pagarian iti Israel?”

⁷Simmungbat ni Jesus: “Intuding ni Amak, babaen iti turayna, dagiti tiempo ken pasamak ket saan a masapul a maammoanyo ida.

⁸Ngem inton umay kadakayo ti Espiritu Santo, maikkankayto iti pannakabalin. Dakayto ti mangpaneknek iti maipapan kaniak idiay Jerusalem, iti entero a Judea ken Samaria, agingga iti amin a suli ti daga.”

⁹Kalpasan ti panangisaona iti daytoy, nakitada a nayuli sadi langit, ket adda ulep a nanglinged kenkuana iti imatangda.

¹⁰Tumangtangadda pay laeng a kumitkita kenkuana idi pagammoan, nagparang iti abayda ti dua a lallaki a nagkawes iti puraw.

¹¹“Lallaki a taga-Galilea,” kinunada, “apay nga agtaktakderkayo a tumangtangad iti langit? Daytoy Jesus a nayuli sadiay a naggapu iti ayanyo, agsublinto iti wagas a kas iti pannakakitayo kenkuana a napan sadiay.”

¹²Nagsubli dagiti apostoles idiay Jerusalem manipud idiay Bantay Olivo. Agarup a maysa a kilometro ti nagbaetan dagitoy dua a disso.

¹³Idi makagtengda sadiay, napanda iti dagusda a balay ket nagtarusda iti akingngato a kuarto. Isuda da Pedro, Juan, Santiago ken Andres, Felipe ken Tomas, Bartolome ken Mateo, Santiago nga anak ni Alfeo, Simon a Patriota ken ni Judas nga anak ni Santiago.

¹⁴Masansan a sangsangkamaysada amin nga agkarkararag agraman dagiti sumagmamano a babbai ken ni Maria nga ina ni Jesus ken dagiti lallaki a kakabsatna.

¹⁵Kalpasan ti sumagmamano nga aldaw, naguurnong ti agsangagasut ket duapulo a mamati. Nagtakder ni Pedro iti sangoananda ket kinunana:

¹⁶“Kakabsatko, masapul a matungpal ti paset ti Nasantoan a Surat, kas impadto ti Espiritu Santo babaen ken ni David iti maipapan ken ni Judas a nangidaulo kadagiti nangtiliw ken ni Jesus.

¹⁷Kaduami idi, ta napili met a makipagakem iti daytoy a panagserbi.” (

¹⁸Sangadisso a daga ti nakaigatangan ti kuarta nga inawat ni Judas a kas supapak iti dakes nga inaramidna. Sadiay ti nakatayanna idi matnag nga immuna a nagdisso ti ulona. Bimtak ti tianna ket naiwarawara dagiti bagisna.

¹⁹Nadamag daytoy dagiti amin nga agnanaed idiay Jerusalem ket pinanagananda dayta a daga iti “Akeldama” a kayatna a sawen, “Daga ti Dara.”)

²⁰“Nailanad iti libro dagiti Salmo: ‘Mabaybay-an ti balayna, Ket awan ti agyan iti unegna.’ Naisurat pay: ‘Adda sabali a mangala iti akemna.’

²¹“Pumilitayo ngarud iti maysa a kaduami a kas saksi iti panagungar ni Apo Jesus. Masapul a maysa kadatayo a kanayon a kimmuykuyog kenkuana, manipud panangikasaba ni Juan iti mensahena iti pannakabuniag agingga iti pannakayuli ni Jesus sadi langit.”

²³Ngarud, nangisingasingda iti dua a lallaki: ni Matias ken ni Jose a managan “Barsabas” (managan pay “Justo”).

²⁴Kalpasanna, inkararagda, “Apo, ammom ti pampanunoten ti tunggal maysa. Ipakitam koma kadakami no siasino kadagiti dua ti pinilim

²⁵nga agserbi a kas apostol a mangsukat ken ni Judas a napan iti lugar a kaikarianna.”

²⁶Nagbibinnunotda ket napili ni Matias. Nainayon kadagiti sangapulo ket maysa nga apostoles.