Read Iloko Acts 11 Bible Online

Acts 11 - Iloko bible

Acts 11

¹Nadamag dagiti apostoles ken dagiti kakabsat iti pammati idiay Judea nga inawat met dagiti Hentil ti sao ti Dios.

²Idi simmang-at ni Pedro idiay Jerusalem, binabalaw ti grupo dagiti Judio nga umanamong iti seremonia ti pannakakugit.

³Kinunada, “Napanka gayam iti balay dagiti tattao a saan a nakugit ket nakipanganka pay kadakuada!”

⁴Ngarud, sinarita ni Pedro ti amin a napasamak manipud rugina. Kinunana:

⁵“Addaak idi iti siudad ti Joppe ket madamaak nga agkarkararag idi nagparmataak. Nakitak ti kasla dakkel nga ules a maipabpababa kadagiti uppat a sulina manipud iti langit. Nagdisso iti asidegko.

⁶Minatmatak a naimbag ti unegna. Nakitak dagiti nadumaduma a kita ti animal, dagiti narungsot nga ayup, dagiti agkarkarayam ken dagiti atap a tumatayab.

⁷Nangngegko ti maysa a timek a nagkuna, ‘Tumakderka, Pedro. Pumartika ket agsidaka.’

⁸“Ngem kinunak, ‘Saanko a maaramid dayta, Apo! Awan pay impaunegko a maibilang a natulawan wenno saan a rumbeng a kanen.’

⁹“Nagsao manen ti timek a naggapu sadi langit, ‘Dimo ibilang a narugit ti dinalusan ti Dios.’

¹⁰Namitlo a naaramid daytoy. Kalpasanna, naipangato amin sadi langit.

¹¹“Iti dayta a kanito, simmangpet iti dagusko a balay dagiti tallo a lallaki a naggapu idiay Cesarea a mangayab kaniak.

¹²Imbaga kaniak ti Espiritu a diak agkedked a kumuyog kadakuada. Kimmuyog met dagiti innem a kakabsat iti pammati a taga-Joppe ket napankam idiay Cesarea. Simrekkami iti balay ni Cornelio.

¹³“Imbaga ni Cornelio kadakami a nakitana ti maysa nga anghel nga agtaktakder iti balayna. Kinuna kano ti anghel, ‘Mangibaonka iti mapan idiay Joppe a mangayab iti tao nga agnagan Simon Pedro.

¹⁴Ipalawagnanto kenka ti mensahe a pakaisalakanam ken ti amin a familiam.’

¹⁵“Idi rugiak ti agsao, bimmaba ti Espiritu Santo kadakuada a kas met iti panagbabana kadatayo idi damo.

¹⁶Nalagipko ti kinuna ti Apo, ‘Namuniag ni Juan iti danum, ngem mabuniagankayto iti Espiritu Santo.’

¹⁷“Nalawag nga inted ti Dios kadakuada ti isu met laeng a sagut nga intedna kadatay idi namatitayo ken ni Apo Jesu-Cristo. Siasinoak ngarud a mangsuppiat iti Dios?”

¹⁸Idi mangngegda daytoy, nagsardengda a mangbabalaw kenkuana. Indaydayawda ti Dios. Kinunkunada, “No kasta ngarud, inted met ti Dios kadagiti Hentil ti gundaway nga agbabawi ken agbiag!”

¹⁹Idi nawarawara dagiti mamati gapu iti pannakaidadanes a rimsua idi napapatay ni Esteban, nakadanon ti sumagmamano kadakuada idiay Fenicia, Chipre ken Antiokia. Impakaammoda ti mensahe kadagiti Judio laeng.

²⁰Ngem adda met dagiti napan idiay Antiokia, dagiti mamati a taga-Chipre ken Cirene, ket inkaskasabada ti mensahe kadagiti Hentil. Impakaammoda kadakuada ti Naimbag a Damag maipapan ken ni Apo Jesus.

²¹Adda kadakuada ti pannakabalin ti Apo ket adu dagiti namati ken simmurot iti Apo.

²²Nadamag daytoy ti iglesia idiay Jerusalem ket imbaonda ni Bernabe idiay Antiokia.

²³Idi sumangpet ni Bernabe, naragsakan a nakakita iti parabur ti Dios kadagitoy a mamati. Binalakadanna ida nga agtalinaed a sipupudno iti Apo iti amin a pusoda.

²⁴Naimbag a tao ni Bernabe ket napno iti Espiritu Santo ken pammati. Iti kasta, adu ti naawisna a nainayon kadagiti pasurot ti Apo.

²⁵Napan ngarud ni Bernabe idiay Tarso tapno sapulenna ni Saulo.

²⁶Idi nasarakanna, inkuyogna idiay Antiokia. Makatawen a nakipulpulapolda iti iglesia ket adu dagiti tattao a sinursuroanda. Idiay Antiokia ti immuna a nakapanaganan dagiti adalan iti Kristiano.

²⁷Kadagidi nga aldaw, simmalog idiay Antiokia dagiti profeta a naggapu idiay Jerusalem.

²⁸Babaen iti pannakabalin ti Espiritu, impadto ni Agabo, maysa kadagiti profeta, nga adda dakkel a bisin a dandani dumteng iti entero a lubong. (Napasamak daytoy idi emperador ni Claudio.)

²⁹Nagnunumoan dagiti adalan ti mangted iti tulong kadagiti kakabsat nga agnaed idiay Judea segun ti kabaelan nga ited ti tunggal maysa.

³⁰Inaramidda daytoy ket impaw-itda ti kuarta kadagiti panglakayen sadiay babaen kada Bernabe ken Saulo.