Read Iloko Acts 12 Bible Online

Acts 12 - Iloko bible

Acts 12

¹Kadagidi a tiempo, pinarigat ni Ari Herodes dagiti sumagmamano a kamkameng ti iglesia.

²Pinaputolanna ni Santiago a kabsat ni Juan.

³Idi makitana a naragsakan dagiti Judio, pinatiliwna met ni Pedro. (Napasamak daytoy iti Fiesta ti Tinapay nga awan Lebadurana.)

⁴Kalpasan ti pannakatiliw ni Pedro, pinaibaludna sana pinabantayan iti uppat a grupo ti soldado. Uppat a soldado ti mangbukel iti tunggal grupo nga agsisinnublat a mangbantay kenkuana. Panggep ni Herodes a pausig ni Pedro iti publiko kalpasan ti Fiesta ti Paskua.

⁵Iti kasta, nagtalinaed ni Pedro iti pagbaludan. Ngem impasnek dagiti kamkameng ti iglesia ti nangikararag kenkuana iti Dios.

⁶Iti rabii sakbay ti panangyawat koma ni Herodes ken ni Pedro kadagiti tattao, sikakawar a matmaturog iti nagbaetan ti dua a soldado. Adda met dagiti guardia iti ruangan ti pagbaludan.

⁷Pagammoan, nagparang ti maysa nga anghel ti Apo ket adda silaw a nagraniag iti pagbaludan. Ginunggon ti anghel ti abaga ni Pedro ket kinunana, “Bumangonkan! Darasem!” Dagus a naikkat ti kawar dagiti ima ni Pedro.

⁸Kinuna ti anghel, “Agbadoka ket agsandaliaska!” Nagtungpal ni Pedro. Kinuna manen ti anghel, “Agkagayka ket surotennak.”

⁹Sinurotna ti anghel a rimmuar iti pagbaludan. Dina ammo no agpaypayso ti ar-aramiden ti anghel. Impagarupna nga agparparmata.

¹⁰Linabasanda ti umuna a grupo dagiti guardia, sa ti maikadua ket dimtengda iti landok a ruangan nga agturong iti siudad. Naglukat ti ruangan nga awan nangsagsagid ket rimmuarda. Idi magmagnada iti maysa a kalsada, pagammoan la ta nagpukaw ti anghel.

¹¹Naawatan ni Pedro ti napasamak kenkuana. “Ita, ammokon a pudno daytoy,” kinunana. “Imbaon ti Dios ti anghelna nga umay mangisalakan kaniak iti pannakabalin ni Herodes ken iti amin a panggep nga aramiden dagiti Judio kaniak.”

¹²Idi madlaw ni Pedro ti kasasaadna, napan iti balay ni Maria nga ina ni Juan Marcos. Sadiay, naguurnong ti adu a tattao nga agkarkararag.

¹³Nagtugtog ni Pedro iti ruangan ket maysa a babaonen a babai nga agnagan Roda ti napan nangammo no siasino ti nagtuktok.

¹⁴Nailasinna ti timek ni Pedro. Iti napalalo a ragsakna, dinan linuktan ti ruangan no di ket nagtaray a napan iti uneg ket impakaammona kadagiti tattao nga adda ni Pedro iti ruar.

¹⁵“Mauyongka!” kinunada kenkuana. Ngem impapilitna a pudno ti imbagana. “Anghelna dayta,” kinunada.

¹⁶Kabayatanna, saan nga insardeng ni Pedro ti nagtugtugtog. Idi luktanda ti ruangan, kasta unay ti siddaawda a nakakita kenkuana.

¹⁷Nagsenias nga agulimekda ket sinaritana kadakuada no kasano ti panangiruar ti Apo kenkuana iti pagbaludan. “Ibagayo daytoy ken ni Santiago ken kadagiti kakabsat,” kinunana. Kalpasanna, pimmanaw a napan iti sabali a lugar.

¹⁸Kabigatanna, napalalo ti pannakariribuk dagiti guardia gapu iti panagpukaw ni Pedro. Dida ammo no ania ti napasamak kenkuana.

¹⁹Pinasapul ni Herodes ni Pedro ngem saanda a nabirokan. Iti kasta, pinaimbestigarna dagiti soldado ket imbilinna a mapapatayda. Pimmanaw ni Herodes idiay Judea ket napan nagyan idiay Cesarea iti sumagmamano nga aldaw.

²⁰Napalalo ti pungtot ni Herodes kadagiti taga-Tiro ken taga-Sidon. Gapu iti daytoy, inkeddeng dagiti umili a sangsangkamaysada a mangibaon kadagiti pannakabagida a mapan ken ni Herodes. Immuna nga inallukoyda ni Blasto a mayordomo iti palasio a tumulong kadakuada a makikappia ken ni Herodes. Aggapu ngamin ti taraonda kadagiti daga a masakupan ti Herodes.

²¹Iti naituding nga aldaw, inkawes ni Herodes ti pagan-anayna a kas ari, nagtugaw iti tronona sa nagbitla iti sangoanan dagiti tattao.

²²“Maysa a dios ti agsarsarita, saan a tao!” impukkaw dagiti tattao.

²³Iti dayta met la a kanito, dinusa ti anghel ti Apo ni Herodes agsipud ta innalana ti pammadayaw nga agpaay koma iti Dios. Inigges agingga a natay.

²⁴Nagtultuloy a nagsaknap ti sao ti Dios ket immadu dagiti mamati.

²⁵Idi natungpalen da Bernabe ken Saulo ti aramid a nakaibaonanda, nagawidda manipud Jerusalem ket inkuyogda ni Juan Marcos.