Read Iloko Acts 14 Bible Online

Acts 14 - Iloko bible

Acts 14

¹Kasta met ti napasamak idiay Iconio. Napan da Pablo ken Bernabe iti sinagoga ket adu a Judio ken Hentil ti nagbalin a mamati gapu iti napintas a panangasabada.

²Ngem adda dagiti Judio a saan a mamati iti ikaskasabada. Sinulbogda dagiti Hentil ket sinabidonganda ti panunotda a bumusor kadagiti kakabsat.

³Nabayag a nagtaeng sadiay da Pablo ken Bernabe. Situturedda a nagsao maipapan iti Apo. Pinaneknekan ti Apo a pudno ti mensaheda maipapan iti paraburna babaen iti pannangtedna iti pannakabalinda nga agaramid iti milagro ken pagilasinan.

⁴Nabingay dagiti tattao iti siudad: Adda dagiti immanamong kadagiti sasawen dagiti Judio idinto a dagiti dadduma, inayonanda dagiti apostoles.

⁵Inkeddeng dagiti Hentil ken dagiti Judio agraman dagiti panguloda a dangran ken uborenda dagiti apostoles.

⁶Ngem naammoan dagiti apostoles daytoy ket napanda nagkamang idiay Listra ken Derbe, il-ili iti Licaonia, ken kadagiti kabangibang a luglugar.

⁷Sadiay ti nangikasabaanda iti Naimbag a Damag.

⁸Idiay Listra, adda lalaki a saan a makapagna ket pulos a dina pay naaramat dagiti sakana gapu ta nayanak a paralitiko.

⁹Agtugtugaw a dumdumngeg ken ni Pablo. Idi makita ni Pablo nga adda pammati daytoy a tao a mapaimbag, pinerrengna

¹⁰sana kinuna iti napigsa, “Tumakderka!” Ket limmagto ti lalaki ket nagpagnapagna.

¹¹Idi makita dagiti tattao ti inaramid ni Pablo, impukkawda iti pagsasaoda a taga-Licaonia, “Nagbalin a tao dagiti dios ket bimmabada kadatayo!”

¹²Pinanagananda ni Bernabe iti Zeus. Agsipud ta ni Pablo ti para sao, pinanagananda iti Hermes.

¹³Adda ti templo ni Zeus iti ruar ti ili. Kayat ti padi ni Zeus ken dagiti tattao ti agidaton kadagiti apostoles. Iti kasta, nangipan ti padi kadagiti toro a baka ken sabsabong iti ruangan ti ili.

¹⁴Ngem idi maammoan da Bernabe ken Pablo ti kayatda nga aramiden, rinay-abda dagiti pagan-anayda sada timmaray nga immasideg kadagiti tattao.

¹⁵“Kakabsat,” impukkawda, “apay nga aramidenyo daytoy? Tattaokami laeng a kas kadakayo. Addakami ditoy a mangipakaammo iti Naimbag a Damag tapno panawanyo dagitoy a kinaubbaw ket agturongkayo iti sibibiag a Dios a namarsua iti langit, daga, taaw ken amin nga adda kadakuada.

¹⁶Iti napalabas, pinalubosanna amin a tattao nga agaramid iti kinaykayatda.

¹⁷Nupay kasta, dina impalubos nga awan pakakitaan iti kaaddana kadagiti aramidna a naimbag: Ikkannakay iti tudo manipud langit ken iti adu nga apit; ikkannakay iti taraon ken ragsak a mangpunno kadagiti pusoyo.”

¹⁸Uray no imbaga da Pablo ken Bernabe dagitoy, narigatanda a nangatipa kadagiti tattao iti panangipaayda iti daton kadakuada.

¹⁹Ngem simmangpet ti sumagmamano a Judio a naggapu idiay Antiokia ken Iconio. Naallukoyda dagiti tattao a mamati iti sasawenda. Inuborda ni Pablo ket gapu ta impagarupda a natayen, ginuyodda nga inruar iti ili.

²⁰Ngem idi inaribungbongan dagiti mamati, timmakder ni Pablo ket nagsubli iti ili. Iti sumuno nga aldaw, napan da Pablo ken Bernabe idiay Derbe.

²¹Inkasaba da Pablo ken Bernabe ti Naimbag a Damag idiay Derbe, ket adu ti naawisda nga agbalin nga adalan. Kalpasanna, nagsublida idiay Listra, Iconio ken Antiokia idiay Pisidia.

²²Pinatibkerda dagiti mamati ket binalakadanda ida nga agtalinaed a sipupudno iti pammati. Imbagada, “Masapul nga aglasattay iti adu a rigat sakbay a sumrektay iti Pagarian ti Dios.”

²³Nangdutokda kadagiti panglakayen nga agpaay iti tunggal iglesia, ket kalpasan ti panagkararag ken panagayunarda, inyawatda ida iti aywan ti Apo a nangitedanda iti panagtalekda.

²⁴Linasat da Pablo ken Bernabe ti sakup ti Pisidia, ket dimtengda idiay Pamfilia.

²⁵Inkasabada ti mensahe idiay Perge sada simmalog idiay Atalia.

²⁶Manipud Atalia, nagbarkoda a nagsubli idiay Antiokia. Ditoy ti damo a nakaitalkanda iti Dios tapno aywananna ida iti trabaho a kalkalpasda nga inaramid.

²⁷Idi sumangpetda idiay Antiokia, inurnongda dagiti kamkameng ti iglesia. Sinaritada ti amin nga inaramid ti Dios babaen kadakuada ken no kasano ti pananglukat ti Dios iti dalan tapno mamati dagiti Hentil.

²⁸Nabayag a nakipagtaengda kadagiti mamati sadiay.