Read Iloko Acts 15 Bible Online

Acts 15 - Iloko bible

Acts 15

¹Adda sumagmamano a lallaki a naggapu idiay Judea a napan idiay Antiokia. Insursuroda dagiti kakabsat sadiay a dida maisalakan no dida makugit kas mayannurot iti Linteg ni Moises.

²Rimsua ti napudot a pannakisuppiat da Pablo ken Bernabe kadakuada. Daytoy ti gapuna a natudingan da Pablo ken Bernabe, kasta met ti sumagmamano a taga-Antiokia a mapan idiay Jerusalem tapno makisaritada kadagiti apostoles ken kadagiti panglakayen maipapan iti daytoy a parikut.

³Pinarubbuatan ida dagiti kamkameng ti iglesia. Bayat ti ilalabasda idiay Fenicia ken Samaria, impadpadamagda kadagiti mamati sadiay no kasano a nakombertir dagiti Hentil. Ket napalalo a rag-o dagiti kakabsat iti daytoy.

⁴Idi sumangpetda idiay Jerusalem, sinangaili ida ti iglesia, dagiti apostoles ken dagiti panglakayen. Insalaysayda ti amin nga inaramid ti Dios kadakuada.

⁵Ngem timmakder ti dadduma kadagiti mamati a kamkameng ti partido dagiti Fariseo. Kinunada, “Masapul a makugit dagiti Hentil ket maibilin a tungpalenda ti Linteg ni Moises.”

⁶Nagmimiting dagiti apostoles ken dagiti panglakayen tapno adalenda daytoy a banag.

⁷Kalpasan ti nabayag a panagsusuppiatda, timmakder ni Pedro ket kinunana, “Kakabsatko, pagaammoyo a kadagiti immun-una nga aldaw, siak a maysa kadakayo, pinilinak ti Dios a mangikasaba iti Naimbag a Damag kadagiti Hentil tapno dumngeg ken mamatida.

⁸Ket ti Dios a makaammo iti pampanunoten ti amin, impakitana ti yaanamongna kadagiti Hentil babaen iti pannangtedna kadakuada iti Espiritu Santo a kas iti pannangtedna kadatayo.

⁹Agpapadatayo iti imatang ti Dios ket awan pakaidumaantayo kadakuada. Pinakawanna dagiti basolda agsipud ta namatida.

¹⁰Apay ngarud a suotenyo ti Dios? Apay nga ipabaklayyo kadagiti mamati ti awit a di nabaelan dagiti kapuonantayo ken uray pay datayo?

¹¹Ngem mamatitayo a maisalakantayo babaen iti parabur ni Apo Jesus, ket kasta met ti panangisalakan kadakuada ti Dios.”

¹²Nagulimek ti entero a taripnong. Dimngegda kada Bernabe ken Pablo a nagipadamag kadagiti pagilasinan ken milagro nga inaramid ti Dios kadagiti Hentil babaen kadakuada.

¹³Idi malpasda, nagsao met ni Santiago. “Kakabsat,” kinunana, “denggendak kadi!

¹⁴Kaipalpalawag ni Simon ti panangipakita ti Dios iti panangipategna kadagiti Hentil, babaen iti panangpilina kadagiti tattao a maipaay iti naganna.

¹⁵Paneknekan daytoy ti kinuna dagiti profeta, kas nailanad iti Nasantoan a Surat:

¹⁶‘Agsubliakto kalpasan daytoy, kuna ti Apo, ket bangonek manen ti pagarian ni David. Tarimaanekto dagiti narba a pasetna ket palagdaek manen.

¹⁷Iti kasta, umayto kaniak dagiti dadduma pay iti sangkataoan, amin a Hentil nga inayabak nga agbalin a kukuak.

¹⁸Kasta ti kuna ti Apo a nangipakaammo iti daytoy iti nabayagen a tiempo.’”

¹⁹Intuloy ni Santiago, “Iti panagkunak, ditay koma parigaten dagiti Hentil nga agturong iti Dios.

²⁰Suratantayo ketdi ida ket ibagatayo dagitoy: ‘Dikay mangan kadagiti taraon a naidaton kadagiti didiosen. Lisianyo ti immoralidad. Dikay agsida iti saan a napadara nga animal ken iti dara.’

²¹Nabayagen a naibasbasa ti Linteg ni Moises kadagiti sinagoga iti Aldaw a Panaginana, ket maikaskasaba dagiti saona iti tunggal ili.”

²²Nagnunumoan dagiti apostoles ken dagiti panglakayen, agraman ti entero nga iglesia a pumilida iti sumagmamano a lallaki iti grupoda. Ibaonda ida a kumuyog kada Pablo ken Bernabe a mapan idiay Antiokia. Pinilida ti dua a lallaki a raraemen unay dagiti kakabsat, ni Judas a managan Barsabas ken ni Silas.

²³Kastoy ti linaon ti impaw-itda a surat kadakuada: “Ay-ayatenmi a kakabsat a Hentil nga agnanaed dita Antiokia, Siria ken Cilicia:

²⁴Nadamagmi nga immay dita ti sumagmamano a lallaki a naggapu iti grupomi, ket nariribuk ken nagduaduakayo gapu kadagiti saoda. Saanmi nga imbilin a kasta ti aramidenda.

²⁵Isut' gapuna a nagtataripnongkami ket sangsangkamaysakami a nangpili kadagiti ibaonmi nga umay kadakayo. Kumuyogda kada patpatgenmi a Bernabe ken Pablo

²⁶a nangipusta iti biagda iti panagserbi ken ni Apotayo a Jesu-Cristo.

²⁷Ibaonmi ngarud da Judas ken Silas a mangipakaammo a personal kadagitoy nga insuratmi.

²⁸Ta inkeddeng ti Espiritu Santo, ken inkeddengmi met a saandakayo a padagsenan malaksid dagitoy nasken nga alagaden:

²⁹Dikayo mangan iti kanen a naidaton kadagiti didiosen. Dikay agsida iti dara. Dikay agsida iti saan a napadara nga animal. Adaywanyo met ti immoralidad. Naimbag ti pagbanaganyo no diyo aramiden dagitoy. Dios ti mangsalluad kadakayo. Dagitoy kakabsatyo, Apostoles ken Panglakayen.”

³⁰Naparubbuatan dagiti naibaon ket napanda idiay Antiokia. Sadiay, tinipontiponda dagiti amin a mamati sada inted kadakuada ti surat.

³¹Idi nabasa dagiti tattao ti surat, napalalo ti rag-oda, gapu kadagiti balakad a linaonna.

³²Profeta met da Judas ken Silas. Nabayag a nagsaoda ket pinapigsada ti pakinakem dagiti kakabsat.

³³Kalpasan ti pannakipagtaengda sadiay iti sumagmamano nga aldaw, pinalubosan ken binendisionan ida dagiti kakabsat, ket nagsublida kadagiti nangibaon kadakuada.

³⁵Ngem nagbati da Pablo ken Bernabe idiay Antiokia. Babaen iti tulong dagiti adu pay a kakabsat, insursuro ken inkaskasabada ti sao ti Apo.

³⁶Kalpasan ti sumagmamano nga aldaw, kinuna ni Pablo ken ni Bernabe, “Inta sarungkaran dagiti kakabsat iti tunggal siudad a nangikaskasabaanta iti sao ti Apo. Kitaenta no kasano ti kasasaadda.”

³⁷Kayat ni Bernabe nga ikuyog ni Juan Marcos,

³⁸ngem inkeddeng ni Pablo a saan a nasayaat nga ikuyogda gapu ta saan a nakikadkadua kadakuada agingga a nalpas ti trabahoda no di ket nagsubli ket pinanawanna ida idiay Pamfilia.

³⁹Rimsua ti nabara a panagsuppiatda ket daytoy ti gapuna a nagsinada. Inkuyog ni Bernabe ni Marcos ket naglayagda a nagturong idiay Chipre.

⁴⁰Pinili met ni Pablo ni Silas a kaduana ket inkumit ida dagiti kakabsat iti parabur ti Dios, sada nagluas.

⁴¹Sinursorda ti Siria ken Cilicia a nangpabpabileg kadagiti iglesia.