Read Iloko Acts 16 Bible Online

Acts 16 - Iloko bible

Acts 16

¹Napan pay ni Pablo idiay Derbe ken idiay Listra a pagnaedan ti maysa a mamati nga agnagan Timoteo. Judio ti inana ket maysa met a mamati, ngem Griego ti amana.

²Pinaneknekan dagiti kakabsat idiay Listra ken Iconio ti kinaimbag ni Timoteo.

³Kinugit ni Pablo ni Timoteo ta kayatna nga ikuyog. Inaramidna daytoy gapu ta ammo dagiti Judio nga agnaed sadiay, a Griego ti amana.

⁴Iti tunggal ili a papananda, impakaammoda kadagiti mamati ti alagaden a nagnunummoan dagiti apostoles ken panglakayen idiay Jerusalem, ket impaganetgetda a tungpalenda.

⁵Iti kasta, pimmigsa ti pammati dagiti kamkameng dagiti iglesia ket inaldaw nga immadu dagiti mamati.

⁶Dinalliasatda ti sakup ti Frigia ken Galacia, ta saan a pinalubosan ida ti Espiritu Santo a mangikasaba iti mensahe iti probinsia ti Asia.

⁷Idi dumtengda iti beddeng ti Misia, pinanggepda ti sumrek idiay Bitinia, ngem saan manen a pinalubosan ida ti Espiritu ni Jesus.

⁸Linabasanda ngarud ti Misia ket nagtarusda idiay Troas.

⁹Iti rabii, adda parmata ni Pablo ket nakitana ti maysa a lalaki a taga-Macedonia a sitatakder nga agpakpakaasi kenkuana. “Umayka koma idiay Macedonia,” kinunana, “ta tulongannakami!”

¹⁰Kalpasan ti parmatana, nagrubbuatkami a dagus a nagturong idiay Macedonia. Awan duaduami nga inawagannakami ti Dios a mangikasaba iti Naimbag a Damag kadagiti tattao sadiay.

¹¹Nagbarkokami manipud Troas ket nagtaruskam idiay Samotracia. Iti sumuno nga aldaw, simmangladkami idiay Neapolis.

¹²Manipud sadiay, immunegkami a napan idiay Filipos, maysa a siudad iti umuna a distrito ti Macedonia, ken sakup ti Roma. Nagyankami iti dayta a siudad iti sumagmamano nga aldaw.

¹³Iti Aldaw a Panaginana, rimmuarkam iti siudad ket napankam iti igid ti karayan, iti lugar nga impagarupmi nga adda pagkararagan. Nagtugawkami ket nakisaokami kadagiti babbai a nagtataripnong sadiay.

¹⁴Mairaman kadagiti nagdengngeg kadakami ti maysa nga aglaklako iti nangingina a lupot. Lydia ti naganna ken taga-Tiatira ken agdaydayaw iti Dios; linuktan ti Apo ti panunotna ket naawatanna dagiti ibagbaga ni Pablo.

¹⁵Nagbuniag ni Lydia ken dagiti kabbalayna. Kalpasanna, inawisnakam a kunana, “No namnamaenyo a mamatiak a sipupudno iti Apo, umaykay agdagus idiay balay.” Ket saankami a nakapagkedked.

¹⁶Iti maysa nga aldaw, bayat ti ipapanmi iti disso a pagkararagan, sinabatnakami ti maysa a tagabu a balasang. Linuganan ti dakes nga espiritu a mangted kenkuana iti pannakabalin a mangibaga iti mapasamak iti masakbayan. Adu a kuarta ti matgedan dagiti appona babaen iti panagpadlesna.

¹⁷Sinursurotnakami kada Pablo ket ipukpukkawna, “Adipen ti Kangatoan a Dios dagitoy a tattao. Ipakaammoda kadakayo ti dalan a pakaisalakanan!”

¹⁸Adu nga aldaw a kasta ti ar-aramidenna agingga iti nauma ni Pablo ket sinangona ti balasang sana kinuna iti espiritu, “Iti nagan ni Jesu-Cristo, ibilinko a rummuarka iti dayta a babai.” Dagus a rimmuar ti espiritu kenkuana.

¹⁹Idi makita dagiti appo ti balasang nga awanen ti pangkukuartaanda, tiniliwda da Pablo ken Silas. Ginuyodguyodda ida nga impan iti plasa sada indatag ida kadagiti ofisiales ti siudad.

²⁰Insaklangda ida kadagiti Romano nga agtuturay. Kinunada, “Judio dagitoy ket rirriribukenda ti siudadtayo.

²¹Isursuroda dagiti ugali a maisalungasing iti lintegtayo. Umilitayo iti Roma ket ditay mabalin nga awaten ken tungpalen dagita nga ugali!”

²²Rimmaman dagiti tattao a nangkabkabil kada Pablo ken Silas. Inuksoban ida dagiti agtuturay sada imbilin a masaplitda.

²³Naibaludda kalpasan ti nakaro a pannakasaplitda ket nabilin ti guardia a bantayanna ida a naimbag.

²⁴Apaman a naawatna ti bilin, impanna ida iti akin-uneg a paset ti pagbaludan ket inipitna dagiti saksakada iti kayo.

²⁵Idi tumengnga ti rabii, agkarkararag da Pablo ken Silas ken agkankantada kadagiti himno a pagdaydayaw iti Dios. Agdengdengngeg kadakuada dagiti dadduma a balud.

²⁶Pagammoan, nagginggined iti napigsa. Nagunggon ti entero a fondasion ti pagbaludan. Naglukat a dagus dagiti amin a ridaw ket naikkat ti kawar dagiti amin a balud.

²⁷Nakariing ti agbambantay. Idi makitana a nalukatan ti pagbaludan, impagarupna a naglibasen dagiti balud. Iti kasta, inasutna ti kampilanna ket papatayenna koman ti bagina.

²⁸Ngem impukkaw ni Pablo, “Dimo ranggasan ta bagim! Addakam amin ditoy!”

²⁹Nagpaala ti agbambantay iti silaw. Simrek a dagus iti ayanda ket agtigtigerger iti buteng a nagrukbab iti sakaanan da Pablo ken Silas.

³⁰Kalpasanna, inruarna ida. “Appo, ania ti rumbeng nga aramidek tapno maisalakanak?” sinaludsodna.

³¹Kinunada, “Mamatika ken ni Apo Jesus ket maisalakankanto, sika ken ti familiam.”

³²Inlawlawagda kenkuana ken iti amin nga adda iti balayna ti mensahe maipapan iti Apo.

³³Iti dayta met la nga oras iti rabii, nupay naladawen, innalana ida sana binuggoan dagiti sugsugatda. Dagus a nabuniaganda a sangafamiliaan.

³⁴Inyawidna da Pablo ken Silas sana pinakan ida. Nagrag-oda a sangafamiliaan agsipud ta mamatidan iti Dios.

³⁵Kabigatanna, imbilin dagiti agtuturay kadagiti polis a kunada, “Paruarenyo dagidiay a tattao.”

³⁶Iti kasta, imbaga ti agbambantay iti pagbaludan ken ni Pablo, “Imbilin dagiti agtuturay a mapalubosankayon. Rummuarkayo ngaruden ket pumanawkayo a sitatalna.”

³⁷Ngem kinuna ni Pablo kadagiti polis, “Nupay awan nasarakanda a basolmi, pinasaplitdakam iti sangoanan ti adu a tattao idinto nga umilikam iti Roma. Kalpasanna, pinaibaluddakami. Ita, kayatdakami a papanawen iti nalimed. Saan a mabalin! Dagiti met laeng agtuturay ti umay mangiruar kadakami.”

³⁸Impadamag dagiti polis daytoy a sao kadagiti agtuturay. Nagbutengda idi madamagda nga umili iti Roma da Pablo ken Silas.

³⁹Isut' gapuna a napanda nagpadispensar kadakuada. Inruarda ida iti pagbaludan sada dinawat a pumanawda iti dayta a siudad.

⁴⁰Rimmuar da Pablo ken Silas iti pagbaludan ket nagtarusda iti balay ni Lydia. Sadiay, nadanonda dagiti kakabsat iti pammati ket pinapigsada ti pakinakemda babaen iti balakadda. Kalpasanna, pimmanawda iti siudad.