Read Iloko Acts 17 Bible Online

Acts 17 - Iloko bible

Acts 17

¹Sinursor da Pablo ken Silas ti Amfipolis ken Apolonia ket dimtengda idiay Tesalonica a yan ti maysa a sinagoga dagiti Judio.

²Kas iti masansan nga aramiden ni Pablo, napan iti sinagoga, ket iti las-ud ti tallo nga Aldaw a Panaginana, nakisarsarita kadagiti tattao. Inaramatna dagiti Nasantoan a Sursurat

³iti panangilawlawag ken panangipaneknekna a masapul nga agsagaba ken agungar ti Cristo. “Daytoy Jesus nga ipakaammok kadakayo,” kinunana, “isu ti Cristo.”

⁴Sumagmamano kadakuada ti namati a pudno ti saona. Kimmaduada kada Pablo ken Silas, kasta met ti adu a Griego nga agdaydayaw iti Dios ken adu kadagiti nalatak a babbai iti kagimongan.

⁵Ngem nagilem dagiti Judio. Inurnongda dagiti bulakbol iti kalkalsada sada nangparnuay iti riribuk iti siudad. Rinautda ti balay ti maysa a tao nga agnagan iti Jason, ta birbirokenda da Pablo ken Silas tapno idatagda ida kadagiti tattao.

⁶Idi saanda a masarakan dagiti dua, inulodda ni Jason agraman sumagmamano a kakabsat. Impanda ida iti saklang dagiti ofisiales ti siudad. “Mangriribuk dagitoy a tattao iti sadinoman a papananda,” impukpukkawda. “Ita, immayda ditoy siudadtayo,

⁷ket pinadagus ida ni Jason iti balayna. Isuda amin, salsalungasingenda dagiti linteg ti Emperador. Kunkunada nga adda sabali nga ari a managan Jesus.”

⁸Kasta unay ti pannakariribuk dagiti tattao ken dagiti turayen ti siudad a nakangngeg iti daytoy.

⁹Sakbay a napalubosan ni Jason ken dagiti dadduma a kakabsat, pinagfiansa ida dagiti agtuturay.

¹⁰Apaman a dimteng ti rabii, imbaon dagiti mamati da Pablo ken Silas idiay Berea. Idi makasangpetda sadiay, napanda a dagus iti sinagoga dagiti Judio.

¹¹Mannakaawat dagiti taga-Berea. Saanda a kas kadagiti taga-Tesalonica. Sigagagarda a nagdengngeg iti mensahe. Inaldaw nga adalenda dagiti Nasantoan a Sursurat tapno ammoenda no pudno met laeng ti sasawen ni Pablo.

¹²Adu kadakuada ti namati agraman ti adu a Griego—dagiti mararaem a babbai ken lallaki iti kagimongan.

¹³Ngem idi madamag dagiti Judio idiay Tesalonica nga inkasaba met ni Pablo ti sao ti Dios idiay Berea, napanda sadiay ket sinugsoganda dagiti tattao a mangriribuk.

¹⁴Dinagdagus dagiti kakabsat nga imbaon ni Pablo a mapan iti igid ti baybay, ngem nagbati da Silas ken Timoteo.

¹⁵Sumagmamano a lallaki ti nangitulod ken ni Pablo idiay Atenas. Sakbay a nagsubli idiay Berea, imbilin ni Pablo kadakuada: “Masapul a sumurot kaniak da Silas ken Timoteo iti kabiitan a tiempo.”

¹⁶Bayat ti panaguray ni Pablo kada Silas ken Timoteo idiay Atenas, napalalo ti pannakariribukna gapu iti kaadu ti didiosen a nakitana iti siudad.

¹⁷Iti kasta, iti sinagoga, nakisarsarita kadagiti Judio ken kadagiti Hentil nga agdaydayaw iti Dios. Inaldaw met a kinasaona dagiti tattao a maisar-ong iti tiendaan.

¹⁸Nakisuppiat met kenkuana dagiti mamaestro nga Epicureo ken Estoico. Kinuna ti sumagmamano kadakuada, “Ania ti salsalawasawen daytoy aginsisirib a tao?” Kinuna met ti dadduma, “Kasla sabali a dios ti ikaskasabana.” Kinunada daytoy agsipud ta ikaskasaba ni Pablo ti maipapan ken ni Jesus ken iti panagungar.

¹⁹Inawisda ni Pablo ket inkuyogda iti taripnong ti konseho ti siudad a maaw-awagan iti Areopago. “Kayatmi nga ammoen daytoy baro a pannursuro a sarsaritaem,” kinunada.

²⁰“Karkarna dagiti sasawem ket kayatmi a maammoan ti kaipapananda!” (

²¹Magustoan dagiti taga-Atenas ken dagiti ganggannaet nga agnanaed sadiay ti agsarsarita ken agdengdengngeg kadagiti kabarbaro a banag.)

²²Timmakder ni Pablo iti sangoanan ti Areopago ket kinunana kadagiti taga-Atenas, “Makitak a relihiosokayo iti amin a banag.

²³Ta iti panagpasiarko iti siudadyo ken pannakakitak kadagiti disso a pagdaydayawanyo, nasarakak ti maysa nga altar a nakaisuratan ti kastoy: ‘Maipaay iti Dios a di Am-ammo.’ Nupay diyo am-ammo dayta a pagdaydayawanyo, isu ita ti ipakaammok kadakayo.

²⁴Ti Dios a namarsua iti lubong ken kadagiti amin a linaonna, isu ti Apo ti langit ken daga. Saan nga agnaed kadagiti templo nga aramid ti tao.

²⁵Dina met masapul ti aniaman nga ited ti tao babaen iti panagserbina kenkuana, ta isu ti mangted iti biag iti amin a parsua, ken iti isuamin a banag.

²⁶Pinarsuana ti amin a kita ti puli iti sangkataoan, ket pinagnaedna ida iti amin a paset ti daga. Isu a mismo ti nangikeddeng kadagiti tiempo ken pagpatinggaan dagiti disso a pagnaedanda.

²⁷Inaramidna daytoy tapno sapulenda ti Dios, bareng no masarakanda bayat ti panagar-arikapda a mangbirok kenkuana. Nupay kasta, saan nga adayo ti Dios iti uray siasinoman kadatayo,

²⁸ta kastay kunadan, ‘Agbiag, aggunay ken addatayo kenkuana.’ Kas iti kuna ti sumagmamano a mannaniwyo, ‘Ta uray datayo, annakna met.’

²⁹Yantangay ta annaknatayo ti Dios, ditay koma ipagarup nga umasping ti Dios iti ladawan a balitok wenno pirak wenno bato a sinukog ti kinalaing ken kabaelan ti tao.

³⁰Pinalabas ti Dios dagiti tiempo a di pannakaammo kenkuana ti tao. Ngem ita, bilinenna ti amin a tattao a tallikudanda ti kinadakesda.

³¹Ta intudingna ti aldaw a panangukomnanto a sililinteg iti entero a lubong babaen iti pinilina a tao. Intedna ti pammaneknek kadagiti amin a tattao babaen iti panangpagungarna iti dayta a tao.”

³²Idi mangngegda a nagsao ni Pablo maipapan iti panagungar ti natay, rinabrabak ti sumagmamano kadakuada, ngem kinuna met ti dadduma, “Kayatmi ti dumngegto manen kenka maipapan iti daytoy.”

³³Iti kasta, pinanawan ni Pablo ti taripnong.

³⁴Adda dagiti naallukoyna ket namatida. Mairaman kadakuada ni Dionisio a kameng ti Areopago ken ti maysa a babai nga agnagan Damaris. Ket adda pay dagiti dadduma a namati.