Read Iloko Acts 18 Bible Online

Acts 18 - Iloko bible

Acts 18

¹Kalpasan daytoy, pimmanaw ni Pablo idiay Atenas ket nagturong idiay Corinto.

²Nasarakanna sadiay ti maysa a Judio nga agnagan Akila a nayanak idiay Ponto. Kagapgapu ni Akila idiay Italia agraman ni Priscila nga asawana agsipud ta pinapanaw ni Emperador Claudio dagiti amin a Judio idiay Roma. Sinarungkaran ni Pablo ida

³ket nakipagnaed ken nakipagtrabaho kadakuada iti panagaramid iti tolda, ta agpapadada iti pagsapulan.

⁴Iti tunggal Aldaw a Panaginana, nakilinnawag idiay sinagoga, ket inkagumaanna a maallukoy a mamati dagiti Judio ken Griego.

⁵Idi sumangpet da Silas ken Timoteo a naggapu idiay Macedonia, impamaysa ni Pablo ti panangaskasabana ket nangted kadagiti pammaneknek kadagiti Judio a ni Jesus isu ti Cristo.

⁶Ngem idi supringen ken pagsasawanda, winagwagna ti tapok iti pagan-anayna ket kinunana: “No saankayo a maisalakan, dakayo ti akimbasol, saan a siak. Manipud ita, panawankayon ket innak mangasaba kadagiti Hentil.”

⁷Pinanawanna ida ket napan nakipagtaeng iti balay ti maysa a Hentil nga agnagan Ticio Justo a managdaydayaw iti Dios. Adda ti balayna iti abay ti sinagoga.

⁸Namati met iti Apo ni Crispo a pangulo ti sinagoga agraman ti familiana. Adu pay ti namati ken nabuniagan kadagiti taga-Corinto a nakangngeg iti inkasaba ni Pablo.

⁹Iti maysa a rabii, adda parmata ni Pablo. Kinuna ti Apo kenkuana: “Dika agbuteng. Ituloymo latta ti agsao ket dika maupay,

¹⁰ta addaak kenka. Awanto ti mangranggas kenka, agsipud ta adu ti taok iti daytoy a siudad.”

¹¹Maysa ket gudua a tawen a nagyan ni Pablo idiay Corinto a nangisursuro kadagiti tattao iti maipapan iti sao ti Dios.

¹²Idi maisaad ni Galion a gobernador iti Acaya, nagtataripnong dagiti Judio, tiniliwda ni Pablo sada insaklang iti pangukoman.

¹³“Guyguyugoyen daytoy a lalaki dagiti tattao tapno agdaydayawda iti Dios iti wagas a maikontra iti lintegmi!” kinunada.

¹⁴Ngem idi agsao koma ni Pablo, kinuna ni Galion kadagiti Judio: “No maipanggep iti panagsalungasing wenno dakes nga aramid, adda koma karbengak a dumngeg kadakayo.

¹⁵Ngem yantangay ta daytoy ket maysa laeng a suppiat maipapan kadagiti sao ken nagnagan, ken iti linteg a mayaplikar la kadakayo, dakayo ti mangrisut. Saan a siak ti mangeddeng no ania ti dakes ken no ania ti naimbag.”

¹⁶Ket pinapanawna ida iti pangukoman.

¹⁷Tiniliwda ngarud ni Sostenes a pangulo ti sinagoga sada kinabkabil iti sangoanan ti pangukoman, ngem saan nga inkaskaso ni Galion.

¹⁸Nakipagtaeng ni Pablo kadagiti kakabsat idiay Corinto. Kalpasan ti adu nga aldaw, nagbarko a kaduana da Priscila ken Akila a nagturong idiay Siria. Sakbay a naglayagda manipud Cencrea, nagpakalbo ni Pablo ta adda kari a sinapataanna.

¹⁹Dimtengda idiay Efeso a nangibatian ni Pablo kada Priscila ken Akila. Simrek iti sinagoga ket nakisinnuppiat kadagiti Judio.

²⁰Indawatda kenkuana nga agbayag koma sadiay, ngem saan nga immannugot.

²¹Ngem idi agpakada kadakuada, kinunana, “No ipalubos ti Dios, agsubliakto kadakayo.” Naglugan iti barko ket nagluas manipud Efeso.

²²Apaman a simmangpet idiay Cesarea, simmang-at idiay Jerusalem ket kinablaawanna ti iglesia sa naglayon idiay Antiokia.

²³Pimmanaw manen kalpasan iti panagyanna sadiay iti sumagmamano nga aldaw. Nagsubli idiay Galacia ken Frigia. Sinursorna dagitoy a luglugar ket pinapigsana ti pakinakem dagiti amin a mamati.

²⁴Dimteng idiay Efeso ti maysa a Judio a nayanak idiay Alejandria. Apolos ti naganna. Nalaing nga agbitla ken adu ti ammona maipapan kadagiti Nasantoan a Sursurat.

²⁵Nasursuroan iti Dalan ti Apo. Sigaganetget a nagsao ket awan pagkurangan ti panangisurona iti maipapan ken ni Jesus. Nupay kasta, ti laeng panamuniag ni Juan ti ammona.

²⁶Situtured a nagsao idiay sinagoga. Idi mangngeg da Priscila ken Akila, inawisda ni Apolos iti balayda ket inlawlawagda a naimbag kenkuana ti Dalan ti Dios.

²⁷Inkeddeng ni Apolos ti mapan idiay Acaya. Tinulongan dagiti mamati idiay Efeso ket nagsuratda kadagiti kakabsat idiay Acaya tapno awatenda ni Apolos. Idi addan sadiay, dakkel ti naitulongna kadagiti nagbalin a mamati babaen iti parabur ti Dios.

²⁸Ta sibibileg a nakidebate kadagiti Judio iti plasa ket inabakna ida. Babaen kadagiti Nasantoan a Sursurat, pinaneknekanna a ni Jesus isu ti Cristo.