Read Iloko Acts 2 Bible Online

Acts 2 - Iloko bible

Acts 2

¹Idi dumteng ti aldaw ti Pentecostes, naurnongda amin iti maysa a lugar.

²Pagammoan, nakangngegda iti daranudor a naggapu sadi langit; kasla ungor ti napigsa nga angin a nangpunno iti entero a balay nga ayanda.

³Nakakitada kadagiti sinan-dila nga apuy a nagwaras ken saggaysa a nagdisso iti tunggal maysa kadagiti adda sadiay.

⁴Iti kasta, napnoda amin iti Espiritu Santo ket nangrugida nga agsao iti nadumaduma a pagsasao, kas inted ti Espiritu kadakuada.

⁵Adda dagiti relihioso a tattao nga agnanaed idiay Jerusalem a naggapu iti nadumaduma a pagilian ditoy lubong.

⁶Idi mangngegda ti daranudor, nagsasangpet ti adu a tattao. Nasdaawda amin ta nangngegda ida nga agsasao kadagiti bukodda a pagsasao.

⁷Gapu iti napalalo a siddaawda, kinunada, “Saan aya a taga-Galilea dagitoy a tattao?

⁸Apay ngarud nga agsasaoda iti nakayanakantayo a pagsasao?

⁹Adda kadatayo ti taga-Partia, Media ken Elam; taga-Mesopotamia, Judea, Capadocia, Ponto ken Asia.

¹⁰Adda pay kadatayo dagiti taga-Frigia ken Pamfilia, Egipto ken dagiti sakup ti Libya, iti asideg ti Cirene. Adda met taga-Roma, Judio ken Hentil a napasurot iti Judaismo.

¹¹Naggapu met ti dadduma idiay Creta ken Arabia. Nupay kasta, mangngegtayo amin ida nga agsasao iti pagsasaotayo maipapan kadagiti naindaklan nga aramid ti Dios!”

¹²Nasdaawda amin ket saanda a mailawlawag daytoy, isu a nagsisinnaludsodda, “Ania ti kaipapanan daytoy?”

¹³Ngem adda dagiti nangrabrabak kadagiti mamati. “Nabartek dagitoy a tattao,” kinunada.

¹⁴Timmakder ngarud ni Pedro ken dagiti 11 nga apostoles, ket kinunana iti napigsa a timek, “Padak a Judio ken kadakayo nga agnaed iti Jerusalem! Palubosandak a mangilawlawag iti kaipapanan daytoy.

¹⁵Saan a nabartek dagitoy a tattao a kas ipagarupyo, gapu ta alas nuebe pay laeng iti bigat.

¹⁶Ngem daytoy ti kinuna ni profeta Joel:

¹⁷‘Daytoy ti aramidekto kadagiti maud-udi nga aldaw, kuna ti Dios, Ibuyatkonto ti Espirituk iti sangkataoan. Ipakaammonto dagiti annakyo ti mensahek; Makakitanto iti sirmata dagiti agtutuboyo a lallaki; Ket agtagtagainepto dagiti lallakay kadakayo.

¹⁸Uray kadagiti adipenko, lalaki man wenno babai, Ibuyatkonto ti Espirituk kadagita nga aldaw, Ket ipakaammodanto ti mensahek.

¹⁹Agipakitaakto kadagiti pagsidsiddaawan sadi langit, Ken milagro ditoy daga. Addanto dara, apuy, ken napuskol nga asuk.

²⁰Agsipngetto ti init, Ket kaslanto dara a lumabaga ti bulan Sakbay ti idadateng ti naindaklan ken nadayag nga Aldaw ti Apo.

²¹Ket maisalakanto ti amin nga agpatulong iti Apo.’

²²“Kakabsat nga Israelita, denggenyo dagitoy innak ibalikas! Nadiosan a panggep ti nakaibaonan ni Jesus a taga-Nazaret. Napaneknekan kadagiti milagro, datdatlag ken pagilasinan nga inaramid ti Dios babaen kenkuana. Ammoyo daytoy ta naaramidda iti imatangyo.

²³Kas mayannurot iti bukodna a plano, inkeddengna a mayawat ni Jesus kadakayo. Pinapatayyo—pinalubosanyo dagiti managbasol a nangilansa kenkuana iti krus.

²⁴Ngem pinagungar ti Dios agsipud ta winayawayaanna manipud pannakabalin ni patay. Saan ngamin a mabalin nga iturayan ni patay.

²⁵Ta kinuna ni David maipapan kenkuana: ‘Kankanayon a makitak ti Apo iti sangoanak; Adda iti makannawanko tapno awan makagaraw kaniak.

²⁶Gapu iti daytoy, naragsak toy pusok, napnoan rag-o toy dilak; Ket nupay maysaak la a tao, sitatalgedak a mangnamnama.

²⁷Iti lubong dagiti natay dimonto baybay-an toy kararua; Dimonto ipalubos nga agrupsa toy nasantoan nga adipenmo.

²⁸Impakaammom kaniak ti dalan nga agturong iti biag. Iti sidongmo, iti rag-o malapunosak.’

²⁹“Kakabsat, masapul nga ilawlawagko kadakayo ti maipapan ken ni Ari David a kapuonantayo. Natay ken naitanem, ket agpapan ita adda ti tanemna iti sidongtayo.

³⁰Maysa a profeta ni Ari David ket ammona ti inkari ti Dios kenkuana. Insapata ti Dios a pagbalinennanto nga ari a kas kenkuana ti maysa kadagiti kaputotanna.

³¹Ammo ni David a mapasamakto daytoy ket nagsao ti maipapan iti panagungar ti Cristo idi kinunana: ‘Saan a nabaybay-an iti lubong dagiti natay, Saan a nagrupsa ti bagina.’

³²Daytoy met laeng a Jesus ti pinagungar ti Dios. Nasaksianmi amin daytoy a banag.

³³Naitan-ok iti makannawan ti Dios nga Amana ket inawatna kenkuana ti Espiritu Santo kas inkarina. Daytoy ti imbuyatna kas makitkita ken mangmangngegyo ita.

³⁴Ta saan a ni David ti immuli sadi langit, ngem kinunana ketdi: ‘Kinuna ti Apo iti Apok: Agtugawka ditoy makannawanko,

³⁵Agingga a maparmekko dagiti kabusormo Ket addada iti babaem.’

³⁶“Ammoen ngarud ti amin a tattao iti Israel nga awan duadua a daytoy Jesus nga inlansayo iti krus ket pinagbalin ti Dios nga Apo ken Cristo!”

³⁷Kasta unay ti pannakariribuk dagiti tattao idi mangngegda daytoy. Kinunada ken ni Pedro ken kadagiti apostoles, “Ania ngarud ti aramidenmi, kakabsat?”

³⁸Kinuna kadakuada ni Pedro, “Agbabawikayo kadagiti basbasolyo. Pabuniagankayo iti nagan ni Jesu-Cristo tapno mapakawan dagiti basbasolyo ket awatenyonto ti sagut ti Espiritu Santo.

³⁹Agpaay daytoy a kari kadakayo ken kadagiti annakyo, kasta met kadagiti amin nga adda iti adayo. Wen, maipaay iti tunggal maysa nga ayabanto ti Apo a Diostayo iti sidongna.”

⁴⁰Adu pay ti insao ni Pedro a pammaneknek a pangguyugoyna kadakuada. Kinunana, “Isalakanyo dagiti bagbagiyo iti dusa a maipatayto iti daytoy managdakdakes a kaputotan!”

⁴¹Adu kadakuada ti namati iti saona ket nabuniaganda. Iti dayta nga aldaw, ag-3,000 a tattao ti nainayon kadakuada.

⁴²Inaramatda ti tiempoda a nagsursuro kadagiti apostoles. Nakikadkaduada kadakuada, nakipimpinnisida iti tinapay ken nagmaymaysada iti panagkarkararag.

⁴³Adu a milagro ken pagilasinan ti inaramid dagiti apostoles, ket timmaud kadagiti tattao ti panagbuteng ken panagraem.

⁴⁴Nadekket ti panaglalangen dagiti amin a mamati ken nagririnnanudda iti sanikua.

⁴⁵Inlakoda dagiti dagdaga ken dadduma pay a sanikuada sada imbunong ti naglakoanda, segun ti kasapulan ti tunggal maysa.

⁴⁶Inaldaw a mapanda a sangsangkamaysa iti Templo. Siaayat ken siraragsakda a nagkakapangan kadagiti balbalayda.

⁴⁷Indaydayawda ti Dios ket nagraem kadakuada dagiti amin a tao. Tunggal aldaw, innayon ti Apo iti gimongda dagiti tattao a maisalakan.