Read Iloko Acts 20 Bible Online

Acts 20 - Iloko bible

Acts 20

¹Idi agsardengen ti riribuk, inummong ni Pablo dagiti mamati ket kalpasan ti panagsaona a kas pammaregtana kadakuada, nagpakada sa pimmanaw a nagturong idiay Macedonia.

²Sinursorna dagitoy a luglugar. Pinarparegtana dagiti tattao iti adu a pammagbaga. Dimteng idiay Grecia.

³Tallo a bulanna sadiay. Nakasaganan a mapan idiay Siria idi naammoanna nga isiksikat dagiti Judio. Daytoy ti gapu a napanunotna ti agsubli a lumasat idiay Macedonia.

⁴Kimmuyog kenkuana ni Sopatro nga anak ni Pirro a taga-Berea. Kimmuyog met da Aristarco ken Segundo a taga-Tesalonica, ni Gayo a taga-Derbe, ni Timoteo agraman da Tikico ken Trofimo iti probinsia ti Asia.

⁵Immunada ket inuraydakami idiay Troas.

⁶Kalpasan ti Fiesta ti Tinapay nga awan Lebadurana, nagbarkokami manipud Filipos iti las-ud ti lima nga aldaw, ket nadanonmi ida idiay Troas. Nagyankami sadiay iti makadomingo.

⁷Iti umuna nga aldaw ti lawas, naggigimongkami tapno rambakanmi ti pannakapispisi ti tinapay. Nagsao ni Pablo kadagiti tattao ket saan a nagsardeng agingga iti tengnga ti rabii. Pumanaw ngamin iti kabigatanna.

⁸Adu ti silaw iti akingngato a kuarto a nagtataripnonganmi.

⁹Adda maysa a baro nga agnagan Eutico a nakatugaw iti tawa. Agdungdungsa ni Eutico bayat ti panagsao ni Pablo. Idi nakaturog iti nairut, natnag iti daga manipud iti maikatlo a kadsaaran. Natay nga inakupda.

¹⁰Ngem immulog ni Pablo ket nagtaray a nangarakup kenkuana. “Dikay agdanag,” kinunana, “sibibiag pay laeng!”

¹¹Immuli manen ni Pablo, pinisina ti tinapay sa nangan. Kalpasanna, nakisarsarita kadakuada agingga iti aglawag sa pimmanaw.

¹²Kinuyogda a nagawid ti agtutubo. Kasta unay ti pannakabang-arda.

¹³Immunakami a nagrubbuat ket nagbarkokami a nagturong idiay Asson a pangdagasanmi ken ni Pablo. Kasta ti imbagana kadakami agsipud ta magmagna a mapan sadiay.

¹⁴Idi agkikitakam idiay Asson, pinaluganmi iti barko ket nagturongkami idiay Mitilene.

¹⁵Intuloymi ti naglayag ket iti sumuno nga aldaw, simmangpetkam iti ballasiw ti Chio. Kalpasan ti maysa nga aldaw, dimtengkam idiay Samos. Kabigatanna, nakadanonkam idiay Mileto.

¹⁶Inkeddeng ni Pablo a saanen a dumagas idiay Efeso tapno saan a mataktak idiay probinsia ti Asia. Maganatan ngamin a dumanon idiay Jerusalem, ket no adda pannakabalinna, sumangpet sadiay iti kaaldawan ti Pentecostes.

¹⁷Idi adda ni Pablo idiay Mileto, pinaayabanna dagiti panglakayen ti iglesia idiay Efeso.

¹⁸Idi sumangpetda, kinunana kadakuada, “Ammoyo no kasano ti panangibukbukko iti amin a panawenko iti panagyanko kadakayo manipud pay idi umuna nga aldaw a bimmaddekak iti probinsia ti Asia.

¹⁹Sipapakumbabaak a nagtrabaho a kas adipen ti Apo ket adu a luluak ti nagarubos kadagiti tiempo ti adu a rigat a linak-amko gapu kadagiti panangisikat dagiti Judio.

²⁰Ammoyo met a diak impaidam ti aniaman a makatulong kadakayo bayat ti panangaskasabak ken panangisursurok kadakayo iti publiko ken kadagiti balbalayyo.

²¹Binallaagak dagiti Judio ken dagiti Hentil a masapul nga agbabawida kadagiti basbasolda ket agturongda iti Dios, ken mamatida ken ni Apotayo a Jesus.

²²Ita ngarud, agtulnogak iti Espiritu Santo. Mapanak idiay Jerusalem, nupay diak ammo ti mapasamak kaniak sadiay.

²³Ammok laeng nga iti amin a siudad, iparparikna ti Espiritu Santo nga agur-uray kaniak ti pagbaludan ken ti pannakaparigat.

²⁴Ngem saan a nasken no agbiagak man wenno matayak. Matungpalko la ketdi ti nakaibaonak ket maileppasko ti trabaho nga inted kaniak ni Apo Jesus—ti panangiwaragawagko iti Naimbag a Damag maipapan iti parabur ti Dios.

²⁵“Inkaskasabak ti Pagarian ti Dios kadakay amin ket ita, ammok nga awanton kadakayo ti makakita kaniak.

²⁶Isut' gapuna nga ita nga aldaw, iti sangoanan ti Dios, isapatak a no adda mapukaw kadakayo, saan a siak ti akimbasol.

²⁷Ta diak nagliway a nangipakpakaammo kadakayo iti amin a panggep ti Dios.

²⁸Annadanyo ngarud ti bagbagiyo ken ti amin nga arban nga impaaywan ti Espiritu Santo kadakayo. Wen, aywananyo ti iglesia ti Dios a ginatangna babaen iti dara ti Anakna.

²⁹Ammok nga inton awanakon, umayto kadakayo dagiti narungsot a lobo ket didanto mamingga no dida madangran ti arban.

³⁰Saan la a dayta, dumtengto ti tiempo nga agsao iti ulbod ti sumagmamano kadakayo tapno sumina dagiti mamati ket sumurotda kadakuada.

³¹Ngarud, agannadkayo ket laglagipenyo nga aldaw ken rabii, iti baet ti adu a panagsagabak, a sinursuroankay amin iti las-ud ti tallo a tawen.

³²“Ket ita, italekkay iti Dios ken iti paraburna a makaparang-ay ken makaited kadakay iti bendision nga insaganana kadagiti amin a tattaona.

³³Diak tinarigagayan nga alaen ti pirak, balitok wenno pagan-anay ti siasinoman.

³⁴Dakayo a mismo, ammoyo a nagtartrabahoak ket tineggedko ti umanay a kuarta nga inggatangko kadagiti masapsapulmi nga agkakadua.

³⁵Iti kastoy, impakitak kadakayo a babaen iti napasnek a panagtrabaho, masapul a tulongantayo dagiti nakapuy. Laglagipentayo ti kinuna ni Apo Jesus, ‘Nagasgasat ti mangted ngem ti umawat.’”

³⁶Idi naisaon ni Pablo dagitoy, nagparintumengda amin a nagkararag.

³⁷Nagsasangitda amin a nangapungol ken nangagek kenkuana.

³⁸Maladingitanda unay iti saona a didanton makita. Kalpasanna, intulodda iti barko.