Read Iloko Acts 21 Bible Online

Acts 21 - Iloko bible

Acts 21

¹Nagpakadakami kadakuada. Nagbarkokami a dimteng idiay Coos. Iti sumuno nga aldaw, dimmanonkam idiay Rodas, ket manipud sadiay, nagturongkam idiay Patara.

²Sadiay, nasarakanmi ti barko a mapan Fenicia ket isut' naglugananmi a pimmanaw.

³Dimtengkam iti lugar a pakatannawaganmi iti Chipre. Naglayagkam iti abagatanna agingga idiay Siria. Simmangladkam idiay Tiro a pagdiskargaan ti barko.

⁴Binirokmi sadiay ti sumagmamano a mamati ket idi nasarakanmi ida, nakidaguskami kadakuada iti makadomingo. Babaen iti panangidalan ti Espiritu, imbagada a saan koma a mapan ni Pablo idiay Jerusalem.

⁵Ngem idi malpas ti pannakipagtaengmi kadakuada, pimmanawkami ket intuloymi ti nagbiahe. Intuloddakam dagiti adalan agraman dagiti assawa ken annakda, agingga iti ruar ti siudad. Nagparintumengkami amin iti igid ti baybay ket nagkararagkami.

⁶Kalpasanna, nagpipinnakadakami sakam limmugan iti barko. Nagawidda metten.

⁷Intuloymi ti nagbiahe manipud Tiro agingga idiay Tolemaida. Kinablaawanmi dagiti kakabsat sadiay. Nakipagyankami kadakuada iti maysa nga aldaw.

⁸Iti sumuno nga aldaw, nagluaskami ket dimtengkam idiay Cesarea. Sadiay, nakidaguskam iti balay ni Felipe nga ebanghelista, maysa kadagiti pito a lallaki a napili idi idiay Jerusalem.

⁹Adda uppat nga annakna a babbalasang a mangiwarwaragawag iti sao ti Dios.

¹⁰Bayat ti panagyanmi sadiay iti sumagmamano nga aldaw, simmangpet ti maysa a profeta nga agnagan Agabo. Naggapu idiay Judea.

¹¹Immay kadakami sana innala ti barikes ni Pablo. Ginalutan ni Agabo dagiti saka ken imana met laeng ket kinunana, “Daytoy ti kuna ti Espiritu Santo: Kastoyto ti panangreppet dagiti Judio idiay Jerusalem iti akimbarikes iti daytoy, ket yawatda kadagiti Hentil.”

¹²Apaman a nangngegmi daytoy, impakpakaasimi agraman dagiti tattao sadiay a saan koman a mapan ni Pablo idiay Jerusalem.

¹³Ngem kinunana, “Apay a sangitandak? Apay a pagladingitenyo 'toy pusok? Saanak la a sisasagana a mareppet. Sisasaganaak pay a matay idiay Jerusalem gapu ken ni Apo Jesus.”

¹⁴Dimi mabaw-ing ti nakemna, isut' gapuna nga insardengmin ti manguy-uyot kenkuana. “Maaramid koma ti pagayatan ti Apo,” kinunami.

¹⁵Kalpasan ti sumagmamano nga aldaw a panagtaengmi sadiay, inrubbuatmi dagiti alikamenmi ket nagturongkam idiay Jerusalem.

¹⁶Kimmuyog kadakami ti sumagmamano nga adalan a taga-Cesarea. Intuloddakam iti pagdagusanmi, iti balay ni Mnason a taga-Chipre, maysa a mamati manipud pay idi damo.

¹⁷Siraragsak dagiti kakabsat a simmabat kadakami idi sumangpetkami idiay Jerusalem.

¹⁸Iti sumuno nga aldaw, kimmuyog ni Pablo kadakami a simmarungkar ken ni Santiago. Adda met sadiay dagiti amin a panglakayen ti iglesia.

¹⁹Kinablaawan ida ni Pablo ket sinaritana kadakuada ti amin nga inaramid ti Dios kadagiti Hentil babaen iti panagserbina.

²⁰Kalpasan ti panagdengngeg dagiti tattao ken ni Pablo, indaydayawda ti Dios. Kinunada kenkuana: “Kabsat, ammom daytoy. Rinibu dagiti Judio a nagbalin a mamati ket napasnekda nga agtulnog iti Linteg.

²¹Nadamdamagdaka. Isursurom kano dagiti Judio nga agnanaed iti lugar dagiti Hentil a bay-anda koma ti Linteg ni Moises. Ibagbagam pay kano kadakuada a dida pakugit dagiti annakda wenno sumurot kadagiti ugali dagiti Judio.

²²Maammoanda a maammoan a simmangpetkan. Ania ti aramidem?

²³Kastoy ti kayatmi nga aramidem. Adda uppat a lallaki ditoy a nagsapata.

²⁴Kuyogem ida ket aggigiddankayo a mangannong iti seremonia ti pannakadalus. Bayadam ti magastoda tapno mabalinda ti agpakuskos. Iti kasta, maammoan ti amin nga awan gayam ti kinaagpayso ti damagda maipapan kenka, no di ket agbibiagka a kas mayannurot iti Linteg ni Moises.

²⁵Ngem no maipanggep kadagiti Hentil a nagbalin a mamati, insuratmin kadakuada ti nagnunummoantayo a masapul a dida mangan kadagiti kanen a naidaton kadagiti didiosen wenno iti dara wenno kadagiti saan a napadara nga animal. Insuratmi pay a masapul a liklikanda ti immoralidad.”

²⁶Inkuyog ngarud ni Pablo dagiti lallaki, ket iti sumuno nga aldaw, inaramidda ti seremonia ti pannakadalus. Kalpasanna, simrek iti Templo ket impakaammona no mano nga aldaw ti palabasen sa aggibus ti aldaw ti pannakadalus. Isunton ti pannakaidaton ti sagut a maipaay iti tunggal maysa kadakuada.

²⁷Dandanin malpas ti naituding a pito nga aldaw ket adda ni Pablo iti Templo. Sumagmamano a Judio a taga-probinsia ti Asia ti nakakita kenkuana sadiay. Dinuroganda dagiti tattao ket tiniliwda ni Pablo.

²⁸“Lallaki a taga-Israel,” impukkawda, “tumulongkayo! Daytoy ti tao nga agsursursor iti amin a lugar. Isursurona nga awan serserbi dagiti Israelita, ti Linteg ni Moises ken daytoy a Templo. Ita, nangiserrek pay kadagiti Hentil iti Templo ket tinulawanna daytoy nasantoan a disso.” (

²⁹Kinunada daytoy ta nakitada ni Trofimo a taga-Efeso a kadua ni Pablo idiay siudad, ket impagarupda nga inserrekna iti Templo.)

³⁰Rimsua ti riribuk iti entero a siudad. Nagtataray nga immay dagiti tattao manipud iti nadumaduma a lugar. Ginammatanda ni Pablo sada ginuyodguyod nga inruar iti Templo. Ket dagus a narikpan dagiti ridaw ti Templo.

³¹Papatayen koman dagiti tattao ni Pablo idi maipadamag iti komandante ti buyot ti Roma nga adda riribuk iti entero a Jerusalem.

³²Dagus a nangala ti komandante iti sumagmamano nga ofisiales ken soldado, ket nagdardarasda a napan iti ayan dagiti tattao. Idi makita ida dagiti tattao, insardengda ti panangkabkabilda ken ni Pablo.

³³Immasideg ti komandante ken ni Pablo. Tiniliwna sana imbilin a mareppet iti dua a kawar. “Siasino daytoy a tao?” sinaludsodna. “Ania ti inaramidna?”

³⁴Aggigiddiat ti iririaw dagiti tattao. Agsipud ta di maawatan ti komandante ti pudpudno a napasamak gapu iti ariwawa, binilinna dagiti soldadona nga ipanda ni Pablo iti kuartel.

³⁵Idi makadanonda iti agdan, inawitda ni Pablo agsipud ta napalalo ti pungtot dagiti tattao.

³⁶Ta sumursurotda a mangyik-ikkis iti pannakapapatayna.

³⁷Idi dandanida iserrek ni Pablo iti kuartel, kinunana iti komandante, “Adda man ibagak kenka.” “Makasaoka met gayam iti Griego,” kinuna ti komandante.

³⁸“Saan ngarud a sika daydi taga-Egipto a nangipangulo iti yaalsa itay saan pay a nabayag. Impanguloanna ti 4,000 a nakaarmas a lallaki a napan idiay let-ang.”

³⁹Simmungbat ni Pablo: “Judioak a nayanak idiay Tarso iti Cilicia ket umiliak iti nalatak a siudad. Pangngaasim ta palubosannak nga agsao kadakuada.”

⁴⁰Pinalubosan ti komandante. Timmakder ni Pablo iti agdan sana sineniasan dagiti tattao nga agulimekda. Ket idi nagulimekda, nagsao kadakuada iti Hebreo: