Read Iloko Acts 22 Bible Online

Acts 22 - Iloko bible

Acts 22

¹“Ammak ida ken kakabsat, denggenyo kadi ti panangipalawagko iti kalintegak!”

²Idi mangngegda nga agsasao iti Hebreo, ad-adda a nagulimekda. Intuloy ni Pablo:

³“Judioak a nayanak idiay Tarso iti Cilicia, ngem dimmakkelak ditoy Jerusalem a kas adalan ni Gamaliel. Nainget ti pannakaisurok iti pannursuro ti Linteg dagiti kapuonantayo. Napasnekak met nga agserserbi iti Dios a kas kadakayo nga adda ditoy ita nga aldaw.

⁴Indadanes ken pinapatayko dagiti sumursurot iti daytoy a Dalan. Pinatiliw ken pinaibaludko ida—lallaki man wenno babbai.

⁵Mapaneknekan ti Kangatoan a Padi ken dagiti kamkameng ti Sanhedrin a pudno ti ibagbagak. Inikkandak pay ngarud idi iti sursurat nga agpaay kadagiti kakabsat a Judio idiay Damasco, ket napanak sadiay a mangtiliw kadagitoy a tattao ken mangyeg kadakuada a sikakawar ditoy Jerusalem tapno madusada.”

⁶“Idi dandaniakon makadanon idiay Damasco, iti agarup tengnga ti aldaw, pagammoan ta adda naraniag a lawag a naggapu't langit a nangsilnag kaniak ken ti aglawlawko.

⁷Napasagak iti daga ket nangngegko ti maysa a timek a nagkuna kaniak, ‘Saulo, Saulo! Apay nga idadanesnak?’

⁸“‘Siasinoka, Apo?’ sinaludsodko. “‘Siak ni Jesus a taga-Nazaret nga idaddadanesmo!’ insungbatna.

⁹“Nakita dagiti lallaki a kinakuyogko ti lawag ngem dida mangngeg ti timek ti makisasao kaniak.

¹⁰‘Ania ti aramidek, Apo?’ sinaludsodko. “Kinuna ti Apo kaniak, ‘Tumakderka, ket inka idiay Damasco a pakaibagaanto ti amin nga intuding ti Dios nga aramidem.’

¹¹“Diak makakita gapu iti makasisirap a lawag, ket kinibindak dagiti kakaduak nga inturong idiay Damasco.

¹²“Adda lalaki sadiay nga agnagan Ananias. Napasnek a mangan-annurot iti Lintegtayo ken raraemen dagiti amin a Judio nga agnanaed iti dayta a siudad.

¹³Immay iti ayanko sa nagtakder iti abayko ket kinunana, ‘Kabsat a Saulo, makakitaka manen!’ “Iti dayta met la a kanito, nagsubli ti panagkitak ket minatmatak ni Ananias.

¹⁴“‘Pinilinaka ti Dios dagiti kapuonantayo,’ kinunana, ‘tapno maammoam ti pagayatanna, tapno makitam ti nalinteg nga Adipenna ken tapno mangngegmo ti mismo a timekna.

¹⁵Ta sikanto ti saksina a mangipakaammo kadagiti amin a tattao iti nakita ken nangngegmo.

¹⁶Ket ita, ania pay la ti urayem? Tumakderka. Awagam ti naganna ket pabuniaganka ken dawatem ti pannakapakawan dagiti basbasolmo.’”

¹⁷“Nagsubliak ditoy Jerusalem. Bayat ti panagkarkararagko idiay Templo, adda parmata a nakitak.

¹⁸Nagparang idi ti Apo ket kinunana, ‘Darasem! Pumanawka a dagus ditoy Jerusalem; saan nga awaten dagiti tattao ditoy ti pammaneknekmo maipapan kaniak.’

¹⁹“‘Apo,’ insungbatko, ‘ammoda unay a sinerrekko ti amin a sinagoga ket tiniliw ken kinabkabilko dagiti mamati kenka.

²⁰Idi mapapatay ni Esteban a saksim, addaak a mismo sadiay. Immanamongak iti pannakapapatayna ket inaywanak ti pagan-anay dagiti nangpapatay kenkuana.’

²¹“‘Inka,’ kinuna ti Apo kaniak, ‘ta ibaonka kadagiti Hentil.’”

²²Nagdengngeg dagiti tattao ken ni Pablo agingga iti nasaona daytoy. Ngem nagririawda a nakangngeg iti imbagana. “Patayen ti kasta a tao!” kinunkunada. “Saan a rumbeng nga agbiag!”

²³Nagiikkisda ket inwagwagisda dagiti kagayda sada nagiwarsi iti tapok iti ngato.

²⁴Binilin ti komandante dagiti soldadona nga ipanda ni Pablo iti kuartel, ket saplitenda tapno ammoenda no apay a kasta la unay ti panangririaw dagiti Judio kenkuana.

²⁵Ngem idi mapungo tapno saplitenda, kinuna ni Pablo iti nakatakder a kapitan sadiay, “Ipalubos aya ti linteg a masaplit ti maysa nga umili ti Roma a di pay nausig?”

²⁶Idi mangngeg ti kapitan daytoy, napan iti komandante ket sinaludsodna, “Ammom kadi no ania daytoy ar-aramidem? Umili ti Roma dayta a tao!”

²⁷Inasitgan ti komandante ni Pablo ket sinaludsodna, “Pudno kadi a maysaka nga umili ti Roma?” “Wen,” insungbat ni Pablo.

²⁸Kinuna ti komandante, “Adu ti nagastok iti panagbalinko nga umili ti Roma.” “Ngem siak, nayanakak nga umili ti Roma,” insungbat ni Pablo.

²⁹Dagus a pimmanaw dagiti lallaki a mangimbestigar koma ken ni Pablo. Nagbuteng met ti komandante ta pinakawaranna ni Pablo idinto nga umili met gayam ti Roma.

³⁰Kayat ti komandante a maammoan ti pudpudno a pangidaruman dagiti Judio ken ni Pablo. Iti sumuno nga aldaw, pinaikkatna ti kawar ni Pablo. Pinagtataripnongna dagiti panguloen a papadi ken ti entero a Sanhedrin. Kalpasanna, innalana ni Pablo sana pinagtakder iti sangoananda.