Read Iloko Acts 24 Bible Online

Acts 24 - Iloko bible

Acts 24

¹Kalpasan ti lima nga aldaw, napan ni Ananias a Kangatoan a Padi idiay Cesarea. Kinaduana ti sumagmamano a panglakayen ken ti maysa nga abogado nga agnagan Tertulo. Napanda ken ni Gobernador Felix ket inyulida ti darum a maibusor ken ni Pablo.

²Idi naayaban ni Pablo, indatag ni Tertulo ti pammabasolda kenkuana. Kinunana: “Natan-ok a Gobernador! Gapu iti nainsiriban a panangidalanmo, nabayagen nga adda talna ditoy, ket adu ti maar-aramid a pagimbagan ti ilitayo.

³Maragsakankami nga umawat kadagitoy iti amin a disso, iti amin a tiempo, ket agyamankam unay kenka.

⁴Diak kayat a mataktakka, isu a dawatek ti anusmo a dumngeg iti ababa a palawagmi.

⁵Natakuatanmi a nakaam-amak daytoy a tao. Idadauloanna ti riribuk kadagiti Judio iti entero a lubong. Isu pay ti pangulo ti sekta dagiti Nazareno.

⁶Pinadasna a tulawan ti Templo ngem tiniliwmi.

⁸No usigem daytoy a lalaki, maammoamto met dagiti pangidardarumanmi kenkuana.”

⁹Kimmanunong dagiti Judio iti darum ket pinaneknekanda a pudno amin dagitoy.

¹⁰Sineniasan ti gobernador ni Pablo nga agsao. Kinuna ni Pablo: “Apo Gobernador, ammok nga adun a tawen a sika ti ukom iti daytoy a pagilian. Isut' gapuna a maragsakanak a mangipalawag iti kalintegak iti sangoanam.

¹¹Kas maammoamto met laeng, awan pay sangapulo ket dua nga aldaw ti napalabas manipud idi mapanak idiay Jerusalem tapno agdaydayawak.

¹²Didak nasarakan dagiti Judio a makisupsuppiat iti uray siasinoman idiay Templo, wenno mangriribuk kadagiti tattao iti sinagoga wenno iti sadinoman a paset ti siudad.

¹³Awan met maidatagda kenka a pammaneknek kadagiti pangidardarumanda kaniak ita.

¹⁴Ngem annugotek kenka daytoy: Agdaydayawak iti Dios dagiti kapuonanmi babaen iti isusurotko iti daytoy a Dalan a kunkunada nga ulbod. Ngem mamatiak met kadagiti amin a naisurat iti Linteg ni Moises ken kadagiti libro dagiti profeta.

¹⁵Mangnamnamaak iti Dios a kas iti panangnamnamada, nga agungarto amin a tattao, dakes man wenno naimbag.

¹⁶Isut' gapuna nga ar-aramidek ti amin a kabaelak tapno nadalus ti konsensiak iti imatang ti Dios ken ti tao.

¹⁷“Kalpasan ti sumagmamano a tawen a kaawanko idiay Jerusalem, nagsubliak manen sadiay a mangted iti kuarta kadagiti kailiak ken mangiruknoy iti daton.

¹⁸Kasta ti ar-aramidek idi masarakandak idiay Templo, kalpasan ti panangileppasko iti seremonia ti pannakadalus. Awan ti adu a tao, ket awan met riribuk.

¹⁹Ngem adda sumagmamano a Judio a taga-probinsia ti Asia. Agparangda met koma ita iti sangoanam ket idatagda ti darum a maibusor kaniak, no adda.

²⁰Wenno, ibaga koma dagitoy a tattao ti nasarakanda a labsingko idi agtakderak iti sangoanan ti Sanhedrin,

²¹malaksid daytoy nga ipukkawko idi sitatakderak iti sangoananda: ‘Us-usigendak ita nga aldaw, gapu ta mamatiak nga agungarto dagiti natay.’”

²²Gapu ta adu ti ammo ni Felix maipapan iti daytoy a Dalan, pinasardengna pay laeng ti panagusig ket kinunana, “Ibanagkonto ti kasom inton sumangpet ni Lisias a komandante.”

²³Binilinna ti kapitan a maguardiaan ni Pablo, ngem maikkan iti bassit a wayawaya, ken mapalubosan dagiti gagayyemna a mangted kadagiti kasapulanna.

²⁴Kalpasan ti sumagmamano nga aldaw, dimteng ni Felix ken ni Drusila nga asawana a maysa a Judio. Pinaayabanna ni Pablo ket dimngeg kenkuana iti panagsaona maipapan iti pammati ken ni Cristo Jesus.

²⁵Ngem idi ipalpalawag ni Pablo ti maipapan iti kinalinteg, panagteppel ken ti idadateng ti Aldaw ti Panangukom, nagbuteng ni Felix ket kinunana, “Pumanawka pay laeng. Ayabankanto manen inton masangok.”

²⁶Masansan a paayabanna ni Pablo ket kasarsaritana, ta namnamaenna a mangted ni Pablo kenkuana iti kuarta.

²⁷Kalpasan ti dua a tawen, sinukatan ni Porcio Festo ni Felix a kas gobernador. Agsipud ta kayat ni Felix a pagustoan dagiti Judio, binaybay-anna ni Pablo iti pagbaludan.