Read Iloko Acts 25 Bible Online

Acts 25 - Iloko bible

Acts 25

¹Simmangpet ni gobernador Festo iti probinsia nga iturayanna. Kalpasan ti tallo nga aldaw, napan idiay Jerusalem manipud Cesarea.

²Sadiay, indatag dagiti panguloen a papadi ken dagiti papangulo a Judio dagiti darumda ken ni Pablo. Nagpakpakaasida ken ni Festo

³a paipanna ni Pablo idiay Jerusalem, ta panggepda a saneben ket papatayenda iti dalan.

⁴Simmungbat ni Festo: “Sibabalud ni Pablo idiay Cesarea. Agsubliak sadiay iti mabiit.

⁵Ibagayo kadagiti panguloyo a kumuyogda kaniak a sumalog idiay Cesarea ket idarumda dayta a tao no adda nakabasolanna.”

⁶Nagyan pay ni Festo idiay Jerusalem iti walo wenno sangapulo nga aldaw sa simmalog idiay Cesarea. Iti sumuno nga aldaw, nagtugaw iti pangukoman ket imbilinna a maidatag ni Pablo.

⁷Idi sumangpet ni Pablo, inaribungbongan dagiti Judio a naggapu idiay Jerusalem ket adu nga agkakadagsen a pammabasol ti nangidarumanda kenkuana, ngem dida met mapaneknekan.

⁸Inkalintegan ni Pablo ti bagina: “Awan inaramidko a maikaniwas iti Linteg dagiti Judio wenno iti Templo wenno iti Emperador ti Roma.”

⁹Kayat ni Festo a pagustoan dagiti Judio, isu a sinaludsodna ken ni Pablo, “Kayatmo kadi ti mapan idiay Jerusalem a pangusigak kenka kadagitoy a darum?”

¹⁰“Agtaktakderakon iti sangoanan ti pangukoman ti Emperador a rumbeng a pakausigak,” insungbat ni Pablo. “Awan basolko kadagiti Judio kas pagaammom unay.

¹¹No adda sinalungasingko a linteg, ket nakaaramidak iti banag a rumbeng a pakatayak, diak rigaten ti matay. Ngem no awan kinapudno dagiti nakaidarumak, awan ti kalintegan ti siasinoman a mangyawat kaniak kadakuada. Agkamangak iti Emperador.”

¹²Nakiuman ni Festo kadagiti mamalbalakad kenkuana, ket kalpasanna, kinunana, “Kimmamangka iti Emperador. Inka ngarud iti Emperador.”

¹³Kalpasan ti sumagmamano nga aldaw, simmangpet ni Ari Agripa ken ni Bernice idiay Cesarea tapno kablaawanda ni Festo.

¹⁴Iti kaaddada sadiay iti sumagmamano nga aldaw, impalawag ni Festo iti ari ti kasasaad ni Pablo. “Adda maysa a balud ditoy nga imbati ni Felix,” kinunana.

¹⁵“Idi addaak idiay Jerusalem, nagdarum dagiti panguloen a papadi ken dagiti panglakayen a Judio ket dinawatda nga ukomek.

¹⁶Ngem imbagak kadakuada a saan nga ugali dagiti Romano ti mangyawat iti siasinoman a naidarum sakbay a makisango kadagiti nangidarum kenkuana tapno maikkan iti gundawayna a mangikalintegan iti bagina.

¹⁷Ngarud, idi immayda ditoy, diak nagtaktak. Iti sumuno nga aldaw, nagtugawak iti pangukoman ket imbilinko a maayaban ti balud.

¹⁸Timmakder dagiti nangidarum kenkuana ngem awan naiparangda a nakabasolanna a kas impagarupko.

¹⁹Nakisuppiatda laeng kenkuana maipapan iti relihionda ken maipapan iti maysa a tao nga agnagan Jesus; natay ngem kuna ni Pablo a sibibiag.

²⁰Agsipud ta diak ammo no kasano ti panangpalutpotko kadagitoy, dinamagko ken ni Pablo no kayatna ti mapan idiay Jerusalem a pakausiganna kadagitoy.

²¹Ngem dinawatna nga agbati pay a kas balud tapno ti Emperador ti mangukom kenkuana. Iti kasta, imbilinko a mabantayan agingga iti maibaonko ken ni Cesar.”

²²Kinuna ni Agripa ken ni Festo, “Kayatko a denggen a mismo daytoy a tao.” “Denggemto no bigat,” insungbat ni Festo.

²³Iti kabigatanna, dimteng da Agripa ken Bernice iti baet ti adu a seremonia ken pammadayaw ket simrekda iti pangukoman a kinuyog dagiti komandante ken dagiti mabigbigbig a tattao iti siudad. Nagbilin ni Festo ket naiserrek ni Pablo.

²⁴Kinuna ni Festo, “Ari Agripa ken dakay amin a naitallaong ditoy: Makitayo daytoy a lalaki nga idardarum kaniak dagiti Judio idiay Jerusalem ken uray pay dagiti adda ditoy. Ipukpukkawda a saanen a rumbeng nga agbiag.

²⁵Ngem awan masarakak nga inaramidna a rumbeng a pakatayanna. Ket agsipud ta kimmamang iti Emperador, inkeddengko nga ibaon kenkuana.

²⁶Ngem diak ammo no ania ti isuratko iti Emperador maipapan kenkuana. Iparangko ngarud iti saklangyo, nangruna iti sangoanam, Apo Ari Agripa, tapno addanto maisuratko kalpasan ti pannakausisana.

²⁷Makitak a saan a rumbeng nga ibaonko ti maysa a balud no diak ilawlawag dagiti pakaidarumanna.”