Read Iloko Acts 26 Bible Online

Acts 26 - Iloko bible

Acts 26

¹Kinuna ni Agripa ken ni Pablo, “Mapalubosanka a mangikalintegan iti bagim.” Iti kasta, intayag ni Pablo ti imana ket nagsao a kas panangsalaknibna iti bagina:

²“Ari Agripa! Ibilangko a nagasatak ita nga aldaw ta mabalinko a sungbatan iti saklangmo dagiti amin a pangidardaruman dagiti Judio kaniak.

³Agsipud ta ammom amin nga ugali ken pagsusuppiatan dagiti Judio, dawatek ngarud nga anusannak a denggen.

⁴“Ammo amin a Judio ti panagbiagko manipud kinaubingko. Ammoda met nga iti unos ti panagbiagko, nagnaedak iti ilik ken idiay Jerusalem.

⁵Sigud nga ammoda, no kayatda a saksian a manipud pay idi damo, a nagbiagak a kas miembro dagiti Fariseo, ti kaingetan a bunggoy ti relihionmi.

⁶Ket ita, agtaktakderak ditoy a mausig gapu ta namnamaek ti inkari ti Dios kadagiti kapuonantayo,

⁷ti kari a namnamaen nga awaten dagiti sangapulo ket dua a tribu bayat ti panagdaydayawda iti Dios iti aldaw ken rabii. Ket gapu iti daytoy a namnama, Natan-ok nga Ari, idarumdak dagiti Judio.

⁸Dakayo nga adda ditoy, apay a narigatyo a patien a pagungaren ti Dios dagiti natay?

⁹“Uray siak, impagarupko idi damo a masapul nga aramidek ti amin a kabaelak a mangdadael iti nagan ni Jesus a taga-Nazaret.

¹⁰Kasta ti inaramidko idiay Jerusalem. Inikkandak dagiti panguloen a papadi iti pammalubos ket pinaibaludko ti adu kadagiti tattao ti Dios. Idi masentensiaanda a mapapatay, immanamongak met.

¹¹Namin-adu a pinadusak ida kadagiti amin a sinagoga; pinilitko ida a mangibaga a tallikudanda ti pammatida. Kasta unay ti pungtotko kadakuada, ket napanak pay kadagiti ganggannaet a siudad tapno idadanesko ida.”

¹²“Daytoy ti gapuna a napanak idiay Damasco. Adda kaniak ti pammalubos ken bilin kaniak dagiti panguloen a papadi.

¹³Tengnga ti aldaw idi addaak iti dalan, Natan-ok nga Ari. Nakitak ti maysa a lawag—naranraniag pay ngem ti init—a naggapu sadi langit. Makasisirap ti lawag a nanglikmut kadakami a nagkukuyog.

¹⁴Napasagkam amin iti daga. Nangngegko ti maysa a timek a nagkuna kaniak iti pagsasao iti Hebreo, ‘Saulo, Saulo! Apay nga idaddadanesnak? Dundunorem laeng ti bagim no kugtaram ti natirad a banag.’

¹⁵“‘Siasinoka, Apo?’ sinaludsodko. ‘Siak ni Jesus nga idaddadanesmo,’ insungbat ti Apo.

¹⁶‘Tumakderkan. Nagparangak kenka tapno dutokanka nga adipenko. Sika ti mangibaga kadagiti tattao iti nakitam ita nga aldaw maipapan kaniak ken kadagiti ipakitakto pay kenka.

¹⁷Isalakankanto kadagiti tattao ti Israel ken kadagiti Hentil a pangibaonak kenka.

¹⁸Lukatamto dagiti matada, ket manipud iti sipnget, iturongmonto ida iti lawag. Manipud iti pannakabalin ni Satanas, iturongmo ida iti pannakabalin ti Dios tapno babaen iti pammatida kaniak, mapakawanto dagiti basbasolda ket maibilangdanto kadagiti tattao ti Dios.’”

¹⁹“Isut' gapuna, Ari Agripa,” intuloy ni Pablo, “a nagtulnogak iti nailangitan a parmatak.

²⁰Immuna a nangaskasabaak idiay Damasco, ket kalpasanna, idiay Jerusalem ken kadagiti amin a lugar dagiti Judio ken kasta met kadagiti Hentil. Inkasabak a masapul nga agbabawida kadagiti basbasolda, agsublida iti Dios ket aramidenda dagiti banag a mangipakita a nagbabawidan.

²¹Daytoy ti gapuna a tiniliwdak dagiti Judio idi addaak idiay Templo ket kayatdak a patayen.

²²Ngem agpapan ita, tinultulongannak ti Dios, ket agtaktakderak ditoy a mangted iti pammaneknekko kadagiti amin a tattao, nanumo man wenno natan-ok. Ul-ulitek laeng ti kinuna ni Moises ken dagiti profeta

²³a masapul nga agsagaba ti Cristo, ket isunto ti umuna nga agungar tapno ipakaammona ti lawag ti pannakaisalakan kadagiti Judio kasta met kadagiti Hentil.”

²⁴Iti kasta a panangikalintegan ni Pablo iti bagina, binugkawan ni Festo a kunana, “Agmauyongka, Pablo. Pagmauyongennaka ti adu nga adalmo.”

²⁵“Saanak nga agmauyong, natan-ok unay a Festo,” insungbat ni Pablo. “Pudno amin nga ibagbagak.

²⁶Naturedak nga agsao, agsipud ta ammo ti ari ti maipapan kadagitoy. Pagaammok a nadlawmo amin dagitoy, ta saanda a napasamak iti nalemmeng a lugar.

²⁷Ari Agripa, mamatika kadi kadagiti profeta? Ammok a mamatika!”

²⁸Kinuna ni Agripa ken ni Pablo, “Kayatnak sa ketdi a pagbalinen a Kristiano iti daytoy a kabiit ti tiempo.”

²⁹“Iti mabiit man wenno mabayag,” insungbat ni Pablo, “ikarkararagko iti Dios a sika ken dagiti amin nga agdengdengngeg kaniak ita nga aldaw, agbalinkayo koma a Kristiano a kas kaniak—malaksid laeng ti pannakaibaludko!”

³⁰Kalpasanna, timmakder ti ari, ti gobernador, ni Bernice ken dagiti dadduma.

³¹Idi nakapanawdan, kinunada iti maysa ken maysa, “Awan ti inaramid daytoy a tao a rumbeng a pakatayan wenno pakaibaludanna.”

³²Kinuna pay ni Agripa ken ni Festo, “Mawayawayaan koman daytoy a tao no saan a kimmamang iti Emperador.”