Read Iloko Acts 27 Bible Online

Acts 27 - Iloko bible

Acts 27

¹Idi maikeddeng nga aglayagkami a mapan idiay Italia, nayawat ni Pablo ken dadduma pay a balud ken ni Julio, maysa nga ofisial ti rehimiento dagiti soldado a maaw-awagan, “Ti Rehimiento Emperador.”

²Limmugankam iti maysa a barko a naggapu idiay Adrumeto nga agsagsagana a mapan kadagiti puerto iti probinsia ti Asia ket naglayagkami. Kaduami ni Aristarco a Macedonio a taga-Tesalonica.

³Iti sumuno nga aldaw, dimtengkam idiay Sidon. Naasian ni Julio ken ni Pablo, ket pinalubosanna a mapan bumisita kadagiti gagayyemna ken maikkan iti kasapulanna.

⁴Manipud Sidon, gapu ta masubami ti angin, naglayagkam iti dayaen ti puro ti Chipre nga awan ti napigsa nga angin.

⁵Binallasiwmi ti baybay ti Cilicia ken Pamfilia ket dimtengkam idiay Mira ti Licia.

⁶Sadiay, nakasarak ti ofisial iti maysa a barko a naggapu idiay Alejandria nga agturong idiay Italia ket inlugannakami.

⁷Nainayad ti panaglayagmi iti sumagmamano nga aldaw, ket adu a rigatmi a dimmanon idiay Cinido. Gapu ta masubami ti angin, naglayagkam iti abagatan ti puro ti Creta, iti kasumbangir ti Salmon, nga awan ti napigsa nga angin ket limmabaskami idiay Salmon.

⁸Nagpapaigidkami. Adu a rigatmi a dimmanon iti maysa a disso a managan Natalged a Sangladan, iti asideg ti ili a Lasea.

⁹Nagbayagkami sadiay agingga a napeggaden ti panangituloymi iti biahe agsipud ta nalpasen ti Aldaw a Pannakapakawan ti Basol. Iti kasta, binalakadan ni Pablo ida:

¹⁰“Appo, makitak a napeggad ti panagbiahetay ita. Adunto ti madadael a karga. Madadael met ti barko, ket agpeggad pay ti biagtayo.”

¹¹Ngem ti ofisial ti armada ad-adda a pinatina ti imbaga ti kapitan ken ti akinkukua iti barko. Dina impangag ti kinuna ni Pablo.

¹²Agsipud ta ti sangladan saan a nasayaat a pagpundoan iti tiempo ti lam-ek, kayat ti kaaduan ti agluas bareng no makadanonda idiay Fenix, maysa a puerto idiay Creta. Nakasango ti puerto iti abagatan-a-laud ken amianan-a-laud ket mabalinda a palabasen ti tiempo ti lam-ek sadiay.

¹³Idi adda pul-oy nga aggapu iti abagatan, impagarup dagiti tattao a mabalindan ti agtuloy iti panggepda a papanan. Ingngatoda dagiti angkla ket tinaraigidda ti puro ti Creta.

¹⁴Iti saan a mabayag, immay ti napigsa nga angin a managan Amian a naggapu iti puro.

¹⁵Siniplaganna ti barko ket gapu ta marigatankami a mangsuba iti angin, intulokmin a mayangin ti barko.

¹⁶Naiturongkami iti masalinongan a paset ti bassit a puro ti Cauda. Sadiay, inkarkarigatanmi nga insagpat ti bangka iti barko.

¹⁷Idi maisagpatda ti bangka, pinarautanda ti aglawlawna. Gapu ta amakenda a maisadsadkam iti kadaratan ti Sirte, imbabada ti layag ket binaybay-andan a mayangin ti barko.

¹⁸Nagtuloy ti dawel ti bagio, isut' gapuna nga iti sumuno nga aldaw, nagitappuakda kadagiti karga.

¹⁹Iti sumaganad nga aldaw, intinnagda ti sumagmamano nga alikamen ti barko.

²⁰Adu nga aldaw a dimi nakita ti init wenno dagiti bituen, ket nagtultuloy a nagangin iti napigsa. Awanen ti namnamami a maisalakan.

²¹Kalpasan ti nabayag a tiempo nga awan kinnan dagiti tattao, timmakder ni Pablo iti sangoananda ket kinunana: “Kakabsat, no impangagdak la koma idi, ket saantayo a nagluas manipud Creta, naliklikantayo koma dagitoy a dadael ken pukaw.

²²Ngem ita, dawatek a dikay agdanag. Awan ti matay kadakayo. Isuna laeng ta madadael ti barko.

²³Ta idi rabii, immay ti anghel ti Dios nga akinkukua kaniak ken pagdaydayawak,

²⁴ket kinunana, ‘Dika agbuteng, Pablo! Masapul a sumaklangka iti Emperador. Ket gapu ta naimbag ti Dios kenka, isalakanna ti amin a kinakuyogmo iti barko.’

²⁵Isut' gapuna, kakabsat, a patibkerenyo ti pakinakemyo! Agtalekak iti Dios ket awan duaduak a maaramidto ti kas naibaga kaniak.

²⁶Ngem masapul a maisadsadtayo iti maysa a puro.”

²⁷Dimteng ti maika-14 a rabii. Mayal-allonkami pay laeng iti Baybay Adriatico. Idi tumengnga ti rabii, nagparikna kadagiti marinero nga umas-asidegkami iti takdang.

²⁸Iti kasta, nangibabada iti pangrukod iti kaadalem ti baybay ket nasarakanda nga 40 a metro ti kaunegna. Rinukodda manen kalpasan ti sumagmamano a kanito, ket nasarakanda a 30 a metro ti kaunegna.

²⁹Nagbutengda amangan no maidungparkami kadagiti kabatoan, isut' gapuna a nangitinnagda iti uppat nga angkla iti kutit ti barko ket inkararagda a dumteng koman ti bigat.

³⁰Kayat dagiti marinero a panawan ti barko. Imbabada ti bangka iti danum ket nagpamarangda a kasla mangitinnagda iti sumagmamano nga angkla iti parupa ti barko.

³¹Ngem kinuna ni Pablo iti ofisial ken kadagiti soldado, “No saan nga agbati dagiti marinero ditoy barko, awan ti maisalakan kadakayo.”

³²Iti kasta, pinugsat dagiti soldado ti tali a nakaibitinan ti bangka ket binaybay-andan a matnag.

³³Idi bumigaten, dinawat ni Pablo kadakuada amin a manganda. Kinunana: “Nagur-uraykayo iti sangapulo ket uppat nga aldaw, ket agingga ita awan pay impaunegyo.

³⁴Dawatek ngarud a mangankayon. Kasapulanyo daytoy tapno pumigsakayo. Awan ti pakaan-anoan ti siasinoman kadakayo.”

³⁵Idi naisaon ni Pablo daytoy, nangala iti tinapay, nagyaman iti Dios iti imatangda amin sana pinisipisi ti tinapay ket nangan.

³⁶Napatured ti nakemda amin ket nanganda met.

³⁷Duagasut, pitopulo ket innemkami amin a naglugan.

³⁸Idi nabsogda aminen, intappuakda dagiti trigo iti baybay tapno lumag-an ti barko.

³⁹Bumigaten idi matannawagan dagiti marinero ti igid ti baybay, nupay no dida mabigbig no ania dayta a lugar. Ngem nakitada nga adda nasalindeg a kadaratan ket nagnunummoanda a no mabalin, isadsadda ti barko sadiay.

⁴⁰Pinugsatda ngarud dagiti angkla, ket binay-anda a lumned iti danum. Inukasda met dagiti tali ti timon. Kalpasanna, ingngatoda ti layag iti purwa ti barko tapno iduron ti angin nga agturong iti igid ti baybay.

⁴¹Ngem naisadsad ti barko sakbay a makadanon iti kadaratan. Nailumlom ti parupana. Saanen a makagaraw. Nalasanglasang ti kutitna gapu kadagiti dadakkel a dalluyon.

⁴²Panggep dagiti soldado a patayen amin dagiti balud tapno awan kadakuada ti aglangoy nga aglibas.

⁴³Ngem inatipa ida ti ofisial dagiti soldado ta kayatna nga isalakan ni Pablo. Imbilinna ketdi kadagiti amin a makalangoy a tumappuakda nga agpaigid,

⁴⁴sa sumaruno dagiti dadduma a kumpet iti tabla wenno iti narakrak a paset ti barko. Kastoy ti idadanonmi amin iti igid nga awan nakaan-anoanmi.