Read Iloko Acts 28 Bible Online

Acts 28 - Iloko bible

Acts 28

¹Idi makatakdangkamin a sikakaradkad, naammoanmi a Malta ti nagan ti puro a sinangladanmi.

²Napintas ti panangsangaili kadakami dagiti agnaed sadiay. Impasgedandakam iti paginudoan. Nalam-ek ngamin ket mangrugin nga agtudo.

³Nangurnong ni Pablo iti sangabakruy a kayo, ket insungrodna iti apuy. Gapu iti pudot, rimmuar ti maysa a karasaen ket tinukkawanna ti ima ni Pablo.

⁴Idi makita dagiti umili ti uleg a nakabitin iti ima ni Pablo, kinunada iti maysa ken maysa, “Awan duadua a mammapatay daytoy a tao. Nakalasat iti baybay, ngem saan nga ipalubos ti hustisia nga agbiag.”

⁵Ngem inwarsi ni Pablo ti uleg iti apuy, ket awan ti nakaan-anoanna.

⁶Inurayda a lumteg ti bagina wenno kellaat a matuang ket matay, ngem idi awan maurayda a mapasamak kenkuana, nagbalbaliw ti panunotda ket kinunada a maysa a dios ni Pablo.

⁷Publio ti nagan ti pangulo iti dayta a puro. Asideg iti ayanda ti sumagmamano a taltalon ni Publio. Tallo nga aldaw a siraragsak a nangsangaili kadakami.

⁸Nairana nga aggurigor ken agsika ti ama ni Publio. Simrek ni Pablo iti siled ti masakit. Nagkararag sana impatay dagiti imana ket pinaimbagna.

⁹Idi mapasamak daytoy, immay met dagiti amin a masakit iti puro ket napaimbagda.

¹⁰Adu ti intedda a sagut kadakami. Idi agluaskamin, pinabalonandakami kadagiti masapsapulmi iti biahe.

¹¹Kalpasan ti tallo a bulan, limmugankam iti “Singin a Dios,” maysa a barko a naggapu idiay Alejandria ken nagpundo iti dayta a puro iti kalam-ekna.

¹²Simmangladkam iti siudad ti Siracusa. Nagyankami sadiay iti las-ud ti tallo nga aldaw.

¹³Manipud sadiay, intuloymi ti naglayag ket dimtengkam idiay Regio. Kabigatanna, adda angin a naggapu iti abagatan ket iti maikadua nga aldaw, simmangpetkam idiay Puteoli.

¹⁴Nakasarakkami sadiay iti sumagmamano a kakabsat iti pammati, ket inawisdakami a makipagtaeng kadakuada iti makalawas. Kamaudiananna, dimmanonkam idiay Roma.

¹⁵Nadamag dagiti kakabsat sadiay ti maipapan kadakami ket immaydakami sinabat idiay Plasa ni Appio ken kasta met idiay Tres Tabernas. Idi makita ida ni Pablo, nagyaman iti Dios ket napapigsa ti pakinakemna.

¹⁶Idi sumangpetkam idiay Roma, napalubosan ni Pablo nga agwaywayas iti sabali a balay a guardiaan ti maysa a soldado.

¹⁷Kalpasan ti tallo nga aldaw, inawisna dagiti pangulo a Judio iti siudad tapno agtataripnongda. Idi naummongdan, kinunana kadakuada, “Kakabsatko! Nupay awan inaramidko a maibusor kadagiti kailiantayo wenno kadagiti ugali a tinawidtayo kadagiti kapuonantayo, pinabaluddak dagiti Judio idiay Jerusalem ket nayawatak kadagiti pannakabagi ti gobierno Romano.

¹⁸Kalpasan ti pannakausigko, mawayawayaanak koman gapu ta awan met nasarakanda nga inaramidko a rumbeng a pakadusaak a matay.

¹⁹Ngem idi madi dagiti Judio, kapilitan a nagkamangak iti Emperador, uray no awan pangidarumak kadagiti kailiak.

²⁰Daytoy ti gapuna a kayatkayo a makita ken makasao, ta nakawaranak gapu kenkuana a namnama dagiti tattao ti Israel.”

²¹Kinunada kenkuana, “Awan naawatmi a sursurat a naggapu idiay Judea maipapan kenka. Awan met ti dakes nga impadamag wenno nasao dagiti kakabsat a naggapu sadiay.

²²Ngem kayatmi a denggen ti kapanunotam ta ammomi nga iti amin a lugar, agsasao dagiti tattao iti maibusor iti daytoy a sekta a nakikaduaam.”

²³Iti kasta, nangtudingda iti aldaw a pannakisaoda ken ni Pablo, ket idi dumteng dayta nga aldaw, adu ti napan iti balay a pagnanaedanna. Nagmalmalem nga inlawlawagna kadakuada ti mensahena maipapan iti Pagarian ti Dios. Ket inaramidna amin a kabaelanna a nangallukoy kadakuada a mamati a pudno ti sasawenna maipapan ken ni Jesus babaen iti panangaramatna iti Linteg ni Moises ken dagiti Libro dagiti Profeta.

²⁴Adda dagiti namati iti saona ngem saan a naallukoy ti dadduma.

²⁵Pimmanawda ngarud nga agsusuppiat, kalpasan ti panagkuna ni Pablo iti daytoy: “Pudno unay ti panagsao ti Espiritu Santo kadagiti kapuonantayo babaen ken ni profeta Isaias.

²⁶Ta kinunana, ‘Inka ibaga iti daytoy nga ili: Dengngegkayto la a dengngeg ngem dikayo makaawat; Kitakayto la a kita ngem dikayo makailasin.

²⁷Agsipud ta natangken ti ulo dagitoy a tattao, Inapputda dagiti lapayagda, Inkidemda dagiti matada, Amangan no makakita ken makangngegda, Ken makaawatda, Ket agsublida kaniak, kuna ti Dios, Tapno paimbagek ida.’”

²⁸Inggibus ni Pablo: “Masapul nga ibagak kadakayo tapno maammoanyo a naibaonen kadagiti Hentil dagiti mangipakaammo iti mensahe ti Dios maipapan iti pannakaisalakan. Dumngegdanto!”

³⁰Dua a tawen a nagtaeng sadiay ni Pablo iti inabanganna a balay. Inawatna amin a simmarungkar kenkuana.

³¹Situtured ken nawaya a nangikasaba maipapan iti Pagarian ti Dios ken nangisuro maipapan ken ni Apo Jesu-Cristo.