Read Iloko Acts 3 Bible Online

Acts 3 - Iloko bible

Acts 3

¹Iti maysa a malem, iti alas tres nga oras ti panagkararag, napan da Pedro ken Juan iti Templo.

²Iti asideg ti ruangan nga aw-awagan dagiti tattao iti “Napintas a Ruangan,” adda maysa a lalaki a pilay. Nayanak a pilay ket inaldaw a bagkatenda nga ipan sadiay tapno makilimos kadagiti sumrek iti Templo.

³Idi makitana da Pedro ken Juan a sumrek iti Templo, dinawatna a limosanda.

⁴Pinerrengda ti lalaki ket kinuna ni Pedro, “Kitaennakami.”

⁵Kimmita a dagus kadakuada a namnamaenna nga adda itedda kenkuana.

⁶Kinuna ni Pedro, “Awan kuartak, ngem itedko kenka ti adda kaniak: iti nagan ni Jesu-Cristo a taga-Nazaret, ibilinko a magnaka!”

⁷Iniggamanna ti makannawan nga ima ti pilay sana tinulongan a timmakder. Timmibker a dagus dagiti susuop ti pilay;

⁸napalagto a timmakder, ket rinugianna ti nagna. Naglaglagto a kimmuyog kadakuada a simrek iti Templo ket sadiay, indaydayawna ti Dios.

⁹Nakita dagiti amin a tattao ti pannagna ken panangidaydayawna iti Dios.

¹⁰Idi mabigbigda nga isu ti agtugtugaw a makilimlimos iti “Napintas a Ruangan” ti Templo, nasdaaw ken nagmalangada gapu iti naaramid kenkuana.

¹¹Idi kumkumpet ti lalaki kada Pedro ken Juan, nasdaaw dagiti tattao ket nagtatarayda nga immasideg kadakuada iti Pasilio ni Solomon.

¹²Idi makita ni Pedro dagiti tattao, kinunana kadakuada, “Kakabsat nga Israelita, apay a masdaawkayo iti daytoy a napasamak? Apay a kasta ti panagkitayo kadakami? Pagarupenyo aya a pinapagnami daytoy a tao iti bukodmi a pannakabalin wenno kinasanto?

¹³Ti Dios da Abraham, Isaac ken Jacob—ti Dios dagiti kapuonantayo—intan-okna ni Jesus nga adipenna, ni Jesus nga inyawatyo kadagiti agtuturay, ket linaksidyo iti saklang ni Pilato uray idi nalpasnan nga inkeddeng ti pannakawayawayana.

¹⁴Wen, linaksidyo ti Nasantoan ken Nalinteg. Dinawatyo ketdi a wayawayaan ni Pilato ti maysa a mammapatay.

¹⁵Pinatayyo ti mangiturong iti pudno a biag, ngem pinagungar ti Dios, ket dakami ti makapaneknek iti daytoy a banag.

¹⁶Ti pannakabalin ti naganna ti nangpapigsa iti daytoy a tao. Ti makita ken ammoyo ket naaramid babaen ti pammati ti naganna; ti pammati ken ni Jesus ti nangpaimbag iti daytoy a tao kas makitayo amin.

¹⁷“Kakabsatko, ammok a diyo ammo ti inaramidyo, kasta met dagiti turayenyo.

¹⁸Ngem kastoy ti panangipatungpal ti Dios iti nabayagen nga impakaammona babaen kadagiti amin a profeta, a masapul nga agsagaba ti Cristona.

¹⁹Agbabawikayo ngarud ket agsublikay iti Dios tapno pakawanenna dagiti basbasolyo. No aramidenyo daytoy,

²⁰yegto ni Apo Dios dagiti panawen a panaginanayo, ket ibaonnanto pay ni Jesus, ti Cristo a tinudingannan nga agpaay kadakayo.

²¹Masapul nga agtaeng sadi langit agingga iti tiempo a pannakapabaro ti amin kas impakaammo ti Dios babaen kadagiti nasantoan a profetana kadagidi immun-una nga aldaw.

²²Kinuna ni Moises: ‘Ibaonto kadakayo ti Apo a Diosyo ti maysa a profeta a kas iti panangibaonna kaniak, ket maysanto kadagiti tattaoyo. Masapul a tungpalenyo ti amin nga ibagana nga aramidenyo.

²³Ti siasinoman a saan nga agtungpal iti sao dayta a profeta, mailaksidto kadagiti tattao ti Dios ket madadaelto.’

²⁴Impakdaar dagiti profeta, manipud ken ni Samuel ken dagiti simmarsaruno kenkuana, ti maipapan kadagiti paspasamak kadagitoy nga aldaw.

²⁵Agpaay kadakayo dagiti inkari ti Dios babaen kadagiti profeta, ket mairamankay iti katulagan ti Dios kadagiti kapuonanyo idi kinunana ken ni Abraham: ‘Bendisionakto amin a tattao ditoy daga babaen kadagiti kaputotam.’

²⁶Daytoy ti gapuna a pinili ti Dios ti Adipenna ket imbaonna nga immuna kadakayo tapno bendisionannakayo babaen iti panamagbabawina kadakayo kadagiti kinadakesyo.”