Read Iloko Acts 4 Bible Online

Acts 4 - Iloko bible

Acts 4

¹Madama pay la nga agsasao da Pedro ken Juan kadagiti tattao idi sumangpet dagiti papadi, dagiti Saduceo ken ti kapitan dagiti guardia iti Templo.

²Napalalo ti rurodda gapu ta isursuro dagiti dua nga apostoles kadagiti tattao a nagungar ni Jesus ket daytoy ti pammaneknek nga agungarto dagiti natay.

³Tiniliwda ida, ket agsipud ta rumabiin, impupokda ida iti pagbaludan inggana iti sumaruno nga aldaw.

⁴Ngem adu ti namati kadagiti nakangngeg iti mensahe da Pedro ken Juan. Aglimaribun ti bilang dagiti lallaki.

⁵Kabigatanna, naguummong idiay Jerusalem dagiti papangulo a Judio, dagiti panglakayen ken dagiti mamaestro iti Linteg.

⁶Nakimitingda kada Anas a Kangatoan a Padi, da Caifas ken Juan, ni Alejandro ken dadduma pay a kamkameng ti familia ti Kangatoan a Padi.

⁷Pinatakderda da Pedro ken Juan iti sangoananda sada sinaludsod, “Kasano a naaramidyo daytoy? Ania a pannakabalin wenno ania a nagan ti inaramatyo?”

⁸Simmungbat ni Pedro a napno iti Espiritu Santo: “Appo nga agtuturay ken panglakayen,

⁹no mausigkami ita nga aldaw gapu iti imbag nga impaaymi iti daytoy a pilay ken no kasano a naimbagan,

¹⁰rebbengyo amin nga ammoen, kasta met dagiti amin a tattao iti Israel, a sitatakder ita iti imatangyo daytoy a tao a pudno a naimbaganen babaen iti pannakabalin ti nagan ni Jesu-Cristo a taga-Nazaret—isu nga inlansayo iti krus ngem pinagungar ti Dios.

¹¹Ni Jesus ti sarsaritaen daytoy a paset ti Nasantoan a Surat: ‘Ti bato nga imbellengyo, dakayo nga agpatpatakder, Nagbalin a kangrunaan a bato.’

¹²Isu laeng ti pakasarakantayo iti pannakaisalakan. Iti entero a lubong, awan sabali a nagan nga inted ti Dios kadagiti tattao a mabalintayo a pakaisalakanan.”

¹³Nasdaaw dagiti kamkameng ti Sanhedrin iti tured nga impakita da Pedro ken Juan, aglalo idi naammoanda a tattaoda laeng a gagangay ken awanan adal. Daytoy ti nakailasinanda a kadua ida idi ni Jesus.

¹⁴Ngem awan maibagada a maibusor kadakuada agsipud ta kitkitaenda ti napaimbag a lalaki nga agtatakder iti abay da Pedro ken Juan.

¹⁵Imbilinda a pumanaw dagiti apostoles iti kuarto ti Konseho. Kalpasanda, nagsasaritada ket kinunada iti tunggal maysa,

¹⁶“Ania ti aramidentayo kadagita a tattao? Ammo amin nga agnaed iti Jerusalem nga isuda ti akin-aramid iti daytoy naisangsangayan a milagro, ket ditayo mailibak.

¹⁷Ngem tapno matiped ti ad-adda a panagwaras daytoy a banag, masapul a ballaagantay ida a didan agsao iti siasinoman iti nagan ni Jesus.”

¹⁸Pinastrekda manen dagiti dua nga apostoles ket imbilinda kadakuada a didan agsao wenno mangisuro iti nagan ni Jesus.

¹⁹Insungbat da Pedro ken Juan, “Dakayo ti mangikeddeng no ania ti nalinteg iti imatang ti Dios: agtulnogkami kadakayo wenno agtulnogkami iti Dios?

²⁰Saan a mabalin a dimi ipakaammo dagiti nakita ken nangngegmi.”

²¹Naing-inget ti panangballaag ti Sanhedrin kadakuada. Kalpasanna, pinapanawda ida. Nakitada nga awan pambaranda a mangdusa kadakuada, ta indaydayaw dagiti amin a tattao ti Dios gapu iti napasamak.

²²Nasurok a 40 ti tawen ti lalaki a nakaaramidan iti daytoy a milagro.

²³Apaman a nawayawayaan da Pedro ken Juan, nagsublida iti ayan dagiti kakaduada. Impadamagda ti kinuna dagiti panguloen a papadi ken dagiti panglakayen.

²⁴Idi mangngegda daytoy, nagmaymaysada a nagkararag iti Dios. Kinunada, “O Apo a Namarsua iti langit ken daga, iti taaw ken kadagiti amin nga adda kadakuada!

²⁵Sika ti nagsao babaen iti Espiritu Santo a nangtignay ken ni David nga adipenmo ken kapuonanmi idi kinunana: ‘Apay a kasta unay ti pungtot dagiti Hentil? Apay a nagpanggep dagiti tattao iti awan serserbina?

²⁶Nagsagana a makigubat dagiti ari ditoy daga, Naguurnong dagiti agtuturay A bumusor iti Apo a Dios ken iti Cristona.’

²⁷Awan duadua a kasta ti napasamak: nagtataripnong da Herodes ken Poncio Pilato, agraman dagiti Hentil ken dagiti Israelita iti daytoy a siudad. Nagplanoda iti maibusor ken ni Jesus a nasantoan nga Adipenmo, isu a dinutokam a Cristo.

²⁸Nagmimitingda a mangipatungpal iti amin a maaramid nga inkeddengmo idin babaen iti pannakabalin ken pagayatam.

²⁹Ita, Apo, denggem dagiti pammutbutengda. Tulongannakami nga adipenmo a mangipakaammo a situtured iti mensahem

³⁰babaen iti panangpaimbagmo kadagiti masakit ken panangaramidmo kadagiti milagro iti nagan ni Jesus a nasantoan nga Adipenmo.”

³¹Nagunggon ti balay a naguummonganda kalpasan ti panagkararagda. Napnoda amin iti Espiritu Santo, ket situturedda a nangiwaragawag iti sao ti Dios.

³²Sangsangkamaysa idi ti puso ken nakem dagiti mamati. Awan ti nangibilang a bukodna ti aniaman a kukuana, no di nagbibingayanda ti amin nga adda kadakuada.

³³Babaen iti naindaklan a pannakabalin, pinaneknekan dagiti apostoles a nagungar ni Apo Jesus. Ket nawadwad a parabur ti inted ti Dios kadakuada amin.

³⁴Awan nagkurangan ti uray maysa kadakuada. Dagiti addaan iti talon wenno balay inlakoda dagitoy a kukuada sada inted ti naglakoanda

³⁵kadagiti apostoles. Naibunong ti kuarta segun ti kasapulan ti tunggal maysa.

³⁶Adda idi maysa a Levita nga agnagan Jose a nayanak idiay Chipre ken pinanaganan dagiti apostoles iti Bernabe (a kayatna a sawen, “Anak a Mangliwliwa”).

³⁷Inlakona ti talonna ket impanna ti kuarta kadagiti apostoles.