Read Iloko Acts 5 Bible Online

Acts 5 - Iloko bible

Acts 5

¹Ngem adda maysa a lalaki nga agnagan Ananias. Safira ti nagan ti asawana. Nangilako iti dagada

²ngem nangilemmeng iti paset ti naglakoanna, babaen iti yaanamong ti asawana, sana inted ti dadduma kadagiti apostoles.

³Kinuna ni Pedro, “Ananias, apay a pinaiturayanka ken ni Satanas ket inulbodmo ti Espiritu Santo babaen iti panangilemmengmo iti dadduma a naglakoam?

⁴Sakbay nga inlakom ti daga, saan aya a sika ti akinkukua? Ket idi inlakom, saan aya a sika ti akinkukua iti naglakoan? Apay ngarud a napanunotmo nga aramiden ti kasta? Saan a tao ti inulbodmo, no di ket ti Dios!”

⁵Apaman a nangngeg ni Ananias daytoy, napasag ket natay. Nagbuteng amin a nakadamag iti daytoy.

⁶Simrek dagiti agtutubo a lallaki, binungonda ti bangkay ni Ananias sada inruar a napan intanem.

⁷Agarup tallo nga oras ti napalabas idi sumrek met ni Safira. Dina ammo ti napasamak iti asawana.

⁸“Ibagam kaniak,” kinuna ni Pedro, “daytoy kadi laeng ti naglakoanyo iti dagayo?” “Wen,” insungbat ti babai, “dayta la ti naglakoanmi.”

⁹Iti kasta, kinuna ni Pedro, “Apay a nagtulaganyo nga agassawa a suoten ti Espiritu ti Apo? Denggem dagiti arimpadek! Addan iti ruangan dagiti lallaki a napan nangitanem iti asawam. Umaydaka met iruar!”

¹⁰Napasag a dagus ni Safira iti sakaanan ni Pedro ket natay. Idi sumrek dagiti agtutubo a lallaki, nakitada a natayen ni Safira. Inruarda sada napan intanem iti abay ti asawana.

¹¹Napalalo a buteng ti entero nga iglesia ken amin a nakadamag iti napasamak.

¹²Adu a milagro ken datdatlag a banag ti inaramid dagiti apostoles ket nasaksian dagiti tattao. Masansan nga aguurnong dagiti amin a mamati idiay Pasilio ni Solomon.

¹³Awan ti nakaitured a tumipon iti bunggoyda a saanda a kadua. Ngem kasta unay ti panangidayaw dagiti tattao kadakuada.

¹⁴Immadu nga immadu ti timmipon kadakuada—lallaki ken babbai a namati iti Apo.

¹⁵Gapu iti ar-aramiden dagiti apostoles, naipan dagiti masakit kadagiti kalkalsada. Naipaiddada kadagiti papag ken ikamen tapno no lumabas ni Pedro, uray ti anniniwanna laeng ti manglinong iti dadduma kadakuada.

¹⁶Manipud kadagiti il-ili a kabangibang ti Jerusalem, inyeg dagiti tattao dagiti masakit ken dagiti addaan iti dakes nga espiritu. Ket immimbagda amin.

¹⁷Napalalo ti apal ti Kangatoan a Padi ken dagiti pasurotna a kamkameng ti bunggoy dagiti Saduceo, ket nagtutulaganda ti aramidenda.

¹⁸Pinatiliwda dagiti apostoles sada pinaibalud ida.

¹⁹Ngem iti dayta a rabii, maysa nga anghel ti Apo ti nanglukat kadagiti ruangan ti pagbaludan ket inruarna dagiti apostoles. Kinunana kadakuada,

²⁰“Inkay idiay Templo ket ibagayo kadagiti tattao ti amin a maipapan iti daytoy baro a biag.”

²¹Nagtungpal dagiti apostoles. Idi bumigaten, simrekda iti Templo ket nangisuroda. Pinaayaban ti Kangatoan a Padi ken dagiti pasurotna dagiti amin a panglakayen a Judio ket naangay ti maysa a miting ti entero a Sanhedrin. Kalpasanna, pinaalada dagiti apostoles iti pagbaludan tapno maidatagda iti Sanhedrin.

²²Ngem idi dumteng dagiti ofisiales iti pagbaludan, dida nasarakan dagiti apostoles. Iti kasta, nagsublida ket impakaammoda iti Sanhedrin,

²³“Itay sumangpetkam iti pagbaludan, nakitami a nakandadoan a naimbag dagiti ruangan ket agbambantay dagiti guardia. Ngem idi luktanmi dagiti ruangan, awan nasarakanmi iti uneg!”

²⁴Idi mangngeg daytoy ti kapitan dagiti guardia ti Templo ken dagiti panguloen a papadi, nasdaawda no ania ti napasamak kadagiti apostoles.

²⁵Dimteng ti maysa a lalaki ket imbagana kadakuada, “Denggenyo! Adda idiay Templo dagiti lallaki a pinaipupokyo iti pagbaludan. Madamada a mangisursuro kadagiti tattao.”

²⁶Napan ti kapitan ken dagiti soldadona iti Templo, ket innalada dagiti apostoles. Dida pinilit ida ta maamakda amangan no uboren ida dagiti tattao.

²⁷Idi maidatag dagiti apostoles, iti sangoanan ti Sanhedrin, inusig ida ti Kangatoan a Padi. Kinunana,

²⁸“Nainget ti panangbilinmi kadakayo a dikay mangisuro iti nagan daytoy a tao. Kitaenyo ti aramidyo! Nagwarasen ti pannursuroyo iti entero a Jerusalem, ket kayatyo pay nga ipabasol kadakami ti ipapatayna.”

²⁹Simmungbat ni Pedro ken dagiti dadduma nga apostoles, “Masapul nga agtungpalkam iti Dios, saan nga iti tao.

³⁰Ti Dios dagiti kapuonantayo ti nangpagungar ken ni Jesus a pinapatayyo babaen iti panangilansayo iti krus.

³¹Intan-ok ti Dios iti makannawanna, kas Pangulo ken Mangisalakan, tapno ikkanna dagiti Israelita iti gundaway nga agbabawi kadagiti basbasolda ket mapakawanda.

³²Dakami ti makapaneknek kadagitoy, kasta met ti Espiritu Santo nga isu a sagut ti Dios kadagiti agtulnog kenkuana.”

³³Kasta unay ti pungtot dagiti kamkameng ti Sanhedrin a nakangngeg iti daytoy ket kayatda a mapapatay dagiti apostoles.

³⁴Ngem timmakder ti maysa kadakuada, ni Gamaliel a maysa a Fariseo ken maestro iti Linteg a pagraeman dagiti amin a tattao. Imbilinna a mairuar pay laeng dagiti apostoles.

³⁵Kalpasanna, kinuna iti Sanhedrin, “Kakabsat nga Israelita, panunotenyo koma a nalaing no ania ti aramidenyo kadagitoy a tattao.

³⁶Saan pay a nabayag a timmaud ni Teudas a nagpammarang a naindaklan a pangulo; aguppat a gasut dagiti lallaki a simmurot kenkuana. Ngem idi napapatay, nawarawara dagiti pasurotna ket nagpukaw ti tignay nga inrugina.

³⁷Kalpasanna, nagparang met ni Judas a taga-Galilea idi panawen ti sensus ket adu ti napasurotna. Napapatay ni Judas ket nawarawara met dagiti pasurotna.

³⁸“Ngarud, daytoy ti isingasingko kadakayo: Diyo bibiangan dagitoy a tattao. Bay-anyo ida! No nagtaud iti tao daytoy a plano ken aramidda, awanto ti pagbanaganna.

³⁹Ngem no nakem ti Dios, diyo mabalin a parmeken ida. Diyo busoren ida amangan no ti Dios met laeng ti busbusorenyo!” Impangag ti Sanhedrin ti patigmaan ni Gamaliel.

⁴⁰Pinastrekda dagiti apostoles. Pinasaplitda ida sada imballaag manen kadakuada a dida agsasao iti nagan ni Jesus. Kalpasanna, winayawayaanda ida.

⁴¹Pimmanaw dagiti apostoles iti saklang ti Sanhedrin. Kasta unay ti ragsakda ta imbilang ida ti Dios a maikari nga agsagaba iti pannakaibabain gapu ken ni Jesus.

⁴²Tunggal aldaw, idiay Templo ken kadagiti balbalay dagiti tattao, intuloyda ti nangisuro ken nangikasaba iti Naimbag a Damag maipapan ken ni Jesus, ti Cristo.