Read Iloko Acts 7 Bible Online

Acts 7 - Iloko bible

Acts 7

¹Sinaludsod ti Kangatoan a Padi ken ni Esteban, “Agpayso kadi daytoy?”

²Nagpalawag ni Esteban, “Ammak ken kakabsatko ida! Dumngegkayo kaniak. Idi adda ni kapuonantayo nga Abraham idiay Mesopotamia sakbay a napan nagnaed idiay Haran, nagparang kenkuana ti nadayag a Dios

³ket kinunana, ‘Panawam ti pagiliam ken dagiti kakabagiam ket inka iti daga nga ibagak a papanam.’

⁴“Iti kasta, pinanawanna ti pagilianna ket napan nagnaed idiay Haran. Kalpasan ti ipapatay ti amana, pimmanaw iti dayta a lugar ket imbaon ti Dios nga umay ditoy a pagilian a pagnanaedanyo ita.

⁵Awan ti sanikua nga inted ti Dios ken ni Abraham, uray la koma sangkadakulapan a daga, ngem inkarina nga agpaay daytoy a daga kenkuana ken kadagiti kaputotannanto uray awan pay anakna idi.

⁶“Kinuna ti Dios kenkuana, ‘Agnaedto dagiti kaputotam a kas ganggannaet iti sabali a pagilian. Sadiay, matagabudanto ket maparparigatdanto iti uneg ti 400 a tawen.

⁷Ngem dusaekto dagiti tattao a mangtagabu kadakuada. Pumanawto dagiti kaputotam iti dayta a daga ket agdaydayawdanto kaniak iti daytoy a lugar.’

⁸“Kas pakakitaan iti daytoy a tulag, inted ti Dios ken ni Abraham ti seremonia ti pannakakugit. Daytoy ti gapuna a kinugit ni Abraham ni Isaac iti maikawalo nga aldaw kalpasan ti pannakayanakna. Kinugit met ni Isaac ni Jacob. Kasta met ti inaramid ni Jacob kadagiti sangapulo ket dua nga annakna a lallaki, dagiti nalatak a kapuonan ti pulitayo.

⁹“Gapu iti apal dagiti annak ni Jacob, inlakoda ni Jose a kabsatda ket naipan a kas tagabu idiay Egipto. Ngem adda ti Dios kenkuana.

¹⁰Tinulongan ti Dios iti aniaman a pakarigatanna. Inikkanna iti sirib ken naimbag a kababalin idi agparang iti Faraon nga ari ti Egipto. Dinutokan ti Faraon ni Jose a gobernador iti Egipto ken iti entero a familiana.

¹¹“Dimteng ti panagbisin a nakaigapuan ti nakaro a panagsagaba iti entero nga Egipto ken Canaan. Awan makan a masarakan dagidi kapuonantayo.

¹²Idi madamag ni Jacob nga adda makan idiay Egipto, imbaonna a mapan sadiay dagiti annakna, isuda a kapuonantayo. Daytoy ti damo nga ipapanda idiay Egipto.

¹³Iti maikadua nga isasarungkarda, impudno ni Jose kadagiti kakabsatna ti kinasiasinona ket naammoan ti ari ti Egipto ti maipapan iti familiana.

¹⁴Iti kasta, pinaala ni Jose ni Jacob nga amana, kasta met dagiti kakabagianna; 75 ti dagupda amin.

¹⁵“Napan ngarud ni Jacob idiay Egipto ket sadiay ti nakatayanna agraman dagiti kapuonantayo.

¹⁶Naipan dagiti bangkayda idiay Sikem, ket naikabilda iti tanem a ginatang ni Abraham kadagiti annak ni Hamor.

¹⁷“Nakaad-adun dagiti kadaraantayo idiay Egipto idi umasideg ti tiempo a panangtungpal ti Dios iti karina ken ni Abraham.

¹⁸Mangrugrugi idi nga agturay ti maysa nga ari a saan a makaam-ammo ken ni Jose.

¹⁹Sinikapanna dagiti kapuonantayo. Naranggas kadakuada ket napilitanda a mangbaybay-a kadagiti tagtagibida iti ruar ti balayda tapno matayda.

²⁰“Kadagidi a tiempo, nayanak ni Moises, maysa a nalungpo unay nga ubing. Tallo a bulan a tinagibi dagiti nagannak kenkuana.

²¹Idi nabaybay-an iti ruar, innala ti babai nga anak ti Faraon, ket pinadakkelna a kas anakna.

²²Iti kasta, naisuro kenkuana ti amin a sirib dagiti taga-Egipto ket nagbalin a naindaklan a tao iti sao ken aramid.

²³“Idi 40 ti tawen ni Moises, napanunotna a sarungkaran dagiti padana nga Israelita tapno ammoenna ti kasasaadda.

²⁴Nakitana a rangranggasan ti maysa nga Egipcio ti maysa kadakuada. Napanna tinulongan ket pinatayna ti Egipcio a kas panangibalesna iti kadaraanna. (

²⁵Impagarup ni Moises a maawatan dagiti kadaraanna nga isut' usaren ti Dios a mangwayawaya kadakuada. Ngem dida naawatan.)

²⁶“Iti sumuno nga aldaw, nakakita iti dua nga Israelita nga agap-apa ket kayatna a pagkappiaen ida. ‘Gagayyem, agpadakayo nga Israelita?’ kinunana. ‘Apay nga agkinkinnabilkayo?’

²⁷“Ngem induron ti lalaki a mangluglugob iti kadaraanna ket kinunana, ‘Siasino ti nangisaad kenka a mangituray ken mangukom kadakami?

²⁸Kayatnak kadi a patayen met a kas iti panangpataymo iti Egipcio idi kalman?’

²⁹“Gapu iti daytoy a sao, nagtalaw ni Moises ket napan nagnaed iti daga ti Midian. Sadiay, nangasawa ket naaddaan iti dua nga annak a lallaki.

³⁰“Kalpasan ti uppat a pulo a tawen, nagparang ti maysa nga anghel ti Dios ken ni Moises iti sumsumged a bassit a kayo iti let-ang nga asideg ti Bantay Sinai.

³¹Nasdaaw ni Moises iti naimatanganna. Idi asitganna tapno kitaenna a naimbag, nangngegna ti timek ti Apo:

³²‘Siak ti Dios dagiti kapuonam, ti Dios ni Abraham, ni Isaac ken ni Jacob.’ “Nagpigerger ni Moises gapu iti butengna ket dina naitured ti kumita.

³³Kinuna ti Apo kenkuana, ‘Ikkatem ta sandaliasmo ta nasantoan a lugar ti pagtaktakderam.

³⁴Nakitak ti pannakaparparigat dagiti tattaok idiay Egipto. Nangngegko ti asugda ket bimmabaak a mangisalakan kadakuada. Umayka ta ibaonka idiay Egipto.’

³⁵“Daytoy met la a Moises ti linaksid dagiti Israelita idi kinunada, ‘Siasino ti nangisaad kenka a mangituray ken mangukom kadakami?’ Isu ti imbaon ti Dios a mangituray ken mangisalakan kadakuada babaen iti tulong ti anghel a nagparang kenkuana iti sumsumged a kayo.

³⁶“Inruarna dagiti tattao manipud Egipto, kalpasan ti panagaramidna kadagiti milagro ken pagsidsiddaawan, kasta met idiay Nalabaga a Baybay ken idiay let-ang iti las-ud ti 40 a tawen.

³⁷Daytoy met la a Moises ti nagkuna kadagiti Israelita, ‘Mangibaonto ti Dios iti maysa a profeta nga agtaud iti pagilianyo a kas iti panangibaonna kaniak.’

³⁸Isu daydi adda idiay let-ang a nakitaripnong kadagiti Israelita. Nakikadkadua kadagiti kapuonantayo agraman ti anghel a nagsao kenkuana idiay Bantay Sinai. Inawatna dagiti sibibiag a mensahe ti Dios tapno itedna kadatayo.

³⁹“Ngem saan a nagtulnog kenkuana dagiti kapuonantayo. Inwalinda ket tinarigagayanda ti agsubli idiay Egipto.

⁴⁰Isut' gapuna a kinunada ken ni Aaron: ‘Yaramidannakami kadagiti didiosen a mangidalan kadakami. Dimi ammo no ania ti napasamak iti daydiay a Moises a nangiruar kadatayo idiay Egipto.’

⁴¹“Nangaramidda ngarud iti didiosen a sinan-urbon a baka. Nagidatonanda iti sakrifisio ken infiestaanda ti aramid ti bukodda nga ima.

⁴²“Iti kasta, binaybay-an ida ti Dios. Inyawatna ida nga agdaydayaw kadagiti bituen ti langit, kas naisurat iti libro dagiti profeta: ‘Tattao ti Israel! Saan a siak ti nangipaayanyo kadagiti naparti nga animal ken daton, bayat ti uppat a pulo a tawen a kaaddayo iti let-ang.

⁴³Ngem inawityo ti tolda ni Moloch, ken ti ladawan ti bituen ti didiosenyo a Refam. Inaramidyo dagitoy a ladawan a pagdaydayawanyo. Isut' gapuna nga ibellengkayto iti labes ti Babilonia.’

⁴⁴“Aw-awiten dagidi kapuonantayo ti Tolda ti Tulag idi addada idiay let-ang. Imbilin ti Dios ken ni Moises nga aramidenna ti tolda, kas mayannurot iti ladawan a nakita ni Moises.

⁴⁵Kalpasanna, tinawid dagiti kapuonantayo ti tolda kadagiti ammada ket intugotda idi kimmuyogda ken ni Josue a nangsakup iti daga dagiti tattao a pinapanaw ti Dios iti imatang dagiti kapuonantayo. Nagyan sadiay agingga iti tiempo ni David.

⁴⁶Naay-ayo ti Dios ken ni David ket dinawatna a mapalubosan a mangbangon iti balay ti Dios ni Jacob.

⁴⁷Ngem ni Solomon ti nangpatakder iti balay nga agpaay iti Dios.

⁴⁸“Nupay kasta, saan nga agnaed ti Kangatoan a Dios kadagiti balay nga aramid ti tao. Kas kuna ti profeta:

⁴⁹‘Ti langit isu ti tronok, kuna ti Apo, Ket ti daga ti pagsaadan dagiti sakak. Ania a kita ti bangonenyo koma a balayko? Sadino ti lugar a mabalinko a paginanaan?

⁵⁰Saan aya a siak ti nangaramid amin kadagitoy?’

⁵¹“Nagtangken met ti uloyon! Kaskayo la agpuspuso a pagano! Anian a kinatulengyo iti mensahe ti Dios! Awan dumayo kadagiti kapuonanyo. Kanayon a sukirenyo met ti Espiritu Santo.

⁵²Adda kadi profeta a saan a pinagsagaba dagidi kapuonanyo? Pinatayda dagiti imbaon ti Dios, isuda a nangipakaammo idi iti yaay ti Nalinteg nga Adipen. Ket ita, liniputan ken pinatayyo.

⁵³Dakayo ti immawat iti linteg ti Dios nga inted dagiti angheles ngem diyo met tinungpal!”

⁵⁴Bayat ti panagdengngeg dagiti kamkameng ti Sanhedrin, agburburek ti darada ket urayda la agngarngariet iti pungtotda ken ni Esteban.

⁵⁵Ngem napno ni Esteban iti Espiritu Santo. Timmangad sadi langit ket nakitana ti dayag ti Dios ken ni Jesus nga agtaktakder iti makannawan ti Dios.

⁵⁶“Kitaenyo!” kinunana, “silulukat ti ruangan ti langit ket makitak ti Anak ti Tao a sitatakder iti makannawan ti Dios!”

⁵⁷Nagriawda iti napigsa ket inapputda dagiti lapayagda. Sangsangkamaysada a dimmarup kenkuana,

⁵⁸ket inruarda iti siudad sada inubor. Imbati dagiti saksi dagiti akinruar a pagan-anayda iti aywan ti maysa nga agtutubo nga agnagan Saulo.

⁵⁹Idi ub-uborenda ni Esteban, nagkararag iti Apo ket kinunana, “Apo Jesus, awatem toy kararuak!”

⁶⁰Nagparintumeng ket impukkawna, “Apo, dimo koma ipabasol daytoy kadakuada.” Ket natay apaman a naisaona daytoy.