Read Iloko Acts 8 Bible Online

Acts 8 - Iloko bible

Acts 8

¹Immanamong ni Saulo iti pannakapapatay ni Esteban. Sumagmamano a lallaki a relihioso ti nangitanem ken ni Esteban, ket kasta unay ti panangdung-awda kenkuana. Iti dayta met la nga aldaw, nangrugi ti nakaro a pannakaidadanes ti iglesia idiay Jerusalem. Malaksid kadagiti apostoles, nawarawara dagiti amin a mamati iti entero a Judea ken Samaria.

³Kabayatanna, pinanggep ni Saulo a pukawen ti iglesia. Inulina dagiti balbalay dagiti mamati, inyulogna ida—lallaki man wenno babbai—ket pinaibaludna ida.

⁴No maipapan kadagiti nawarawara a mamati, inkaskasabada ti mensahe iti amin a lugar a napananda.

⁵Simmalog ni Felipe iti kangrunaan a siudad ti Samaria ket inkaskasabana ti maipapan iti Cristo.

⁶Sipapasnek dagiti tattao a dimngeg iti mensahe ni Felipe, gapu ta nadamagda ken mismo a nakitada dagiti milagro nga inaramidna.

⁷Nagik-ikkis a rimmuar dagiti dakes nga espiritu iti adu a naluganan a tattao. Adu pay ti naimbagan a paralitiko ken pilay.

⁸Ket kasta unay ti rag-o dagiti tattao iti dayta a siudad.

⁹Agnanaed sadiay ti maysa a lalaki nga agnagan Simon. Nagsalsalamangka idi ket nabayag a pinagsidsiddaawna dagiti Samaritano. Imbagbagana nga isu ket naindaklan a tao,

¹⁰ket sipapasnek dagiti amin nga agnaed sadiay a dimngeg kenkuana, baknang man wenno napanglaw. “Dayta a tao isu ti bileg ti Dios a managan iti Naindaklan,” kinunada.

¹¹Sigagagarda a dimngeg kenkuana ta nabayag a pinagsiddaawna ida babaen ti panagsalamangkana.

¹²Ngem idi inkasaba ni Felipe ti maipapan iti Naimbag a Damag ti Pagarian ti Dios ken ti maipapan ken ni Jesu-Cristo, namatida ket nabuniaganda amin, lallaki man wenno babbai.

¹³Namati met ni Simon ket kalpasan ti pannakabuniagna, simmurot ken ni Felipe. Kasta unay ti siddaawna idi makitana dagiti milagro ken pagilasinan nga ar-aramiden ni Felipe.

¹⁴Nadamag dagiti apostoles idiay Jerusalem nga inawat dagiti taga-Samaria ti sao ti Dios ket imbaonda sadiay da Pedro ken Juan.

¹⁵Idi simmangpetda, inkararaganda dagiti Samaritano tapno awatenda met ti Espiritu Santo.

¹⁶Saan pay ngamin a bimmaba kadakuada ti Espiritu Santo. Nabuniaganda laeng iti nagan ni Apo Jesus.

¹⁷Ket impatay da Pedro ken Juan ti imada kadakuada ket inawatda ti Espiritu Santo.

¹⁸Nakita ni Simon a naited ti Espiritu Santo kadagiti mamati idi impatay dagiti apostoles dagiti imada kadakuada. Iti kasta, pinanggepna nga ikkan da Pedro ken Juan iti kuarta

¹⁹ket kinunana, “Itedyo met kaniak daytoy a pannakabalin tapno ti siasinoman a pangipatayak kadagiti imak awatenna met ti Espiritu Santo.”

²⁰Ngem kinuna ni Pedro kenkuana, “Mailunodka koma agraman ti kuartam ta ipagarupmo a magatang ti sagut ti Dios!

²¹Awan pakaibiangam wenno kalintegam iti trabahomi. Ammo ti Dios a saan a nadalus ti pusom.

²²Agbabawika iti dayta dakes a panunotmo ket agdawatka iti Apo a pakawanennaka.

²³Makitak a naapalka unay ken sibabaludka iti basol.”

²⁴Kinuna ni Simon kada Pedro ken Juan, “Pangngaasiyo ta idawdawatandak iti Apo tapno saan a mapasamak kaniak ti uray ania kadagitoy.”

²⁵Nagsubli da Pedro ken Juan idiay Jerusalem kalpasan ti panangibingayda kadagiti tattao iti ammoda maipapan iti mensahe ti Apo. Iti dalanda, inkaskasabada ti Naimbag a Damag iti adu a barrio ti Samaria.

²⁶Kinuna ti maysa nga anghel ti Apo ken ni Felipe, “Agsaganaka a mapan iti abagatan. Surotem ti dalan nga agturong idiay Gaza manipud Jerusalem.” (Saanen a madaldalanan daytoy a kalsada.)

²⁷Nagrubbuat ngarud ni Felipe. Iti dalan, adda maysa nga eunoko a taga-Etiopia, maysa nga ofisial a mangimaton iti amin a kinabaknang ti Candace wenno Reyna ti Etiopia. Napan nagdaydayaw iti Dios idiay Jerusalem. Agawid idin ket silulugan iti karuahena. Bayat ti panagtaray ti lugan, basbasaenna ti libro nga insurat ni profeta Isaias.

²⁹Kinuna ti Espiritu Santo ken ni Felipe, “Magnaka iti asideg ti lugan.”

³⁰Nagtaray ni Felipe nga immasideg ket nangngegna ti ofisial nga agbasbasa iti libro ni profeta Isaias. Sinaludsod ni Felipe, “Maawatam met laeng ti basbasaem?”

³¹Insungbat ti ofisial, “Kasano a maawatak no awan met mangipalawag kaniak?” Ket inawisna ni Felipe a makilugan kenkuana.

³²Daytoy a paset ti Nasantoan a Surat ti basbasaenna: “Kasla karnero a maipan iti pagpartian, Kasla urbon ti karnero a naulimek no mapukisan, Ket awan a pulos ti inyesngawna.

³³Iti pannakairurumenna, naikkat ti kalinteganna. Awanto ti makaibaga maipapan iti kaputotanna, Ta naggibusen ti biagna ditoy daga.”

³⁴Kinuna ti ofisial ken ni Felipe, “Sinno kadi ti sarsaritaen ti profeta? Ti bagina kadi wenno sabali?”

³⁵Nagsao ni Felipe ket manipud iti daytoy a paset ti Nasantoan a Surat, sinarita ni Felipe ti Naimbag a Damag maipapan ken ni Jesus.

³⁶Intuloyda ti panagdaliasatda agingga a dimtengda iti lugar nga adda danum. Kinuna ti ofisial ken ni Felipe, “Adtoy ti danum. Ania ti makatiped iti panagbuniagko?”

³⁸Pinagsardeng ngarud ti ofisial ti lugan. Napanda a dua iti danum ket binuniagan ni Felipe.

³⁹Idi makasang-atdan, impanaw ti Espiritu ti Apo ni Felipe ket saanen a nakita ti ofisial. Intuloy ti ofisial ti panagawidna a siraragsak.

⁴⁰Idi makadlaw ni Felipe, adda gayamen idiay Azoto. Inkaskasabana ti Naimbag a Damag kadagiti amin nga il-ili a napagnaanna ingganat nakasangpet idiay Cesarea.