Read Iloko Acts 9 Bible Online

Acts 9 - Iloko bible

Acts 9

¹Intuloy ni Saulo ti panamutbutengna a mangpapatay kadagiti adalan ti Apo. Napan iti Kangatoan a Padi

²ket dimmawat iti surat a mangyam-ammo kenkuana kadagiti sinagoga dagiti Judio idiay Damasco tapno mapalubosan a mangtiliw iti siasinoman a masarakanna a sumursurot iti Baro a Dalan, lalaki man wenno babai, ket ipanna ida idiay Jerusalem.

³Iti dalanna nga agpa-Damasco, idi makaasidegen iti siudad, pagammoan la ta nagraniag ti lawlawna iti makasisirap a lawag a naggapu iti tangatang.

⁴Napasag iti daga ket nangngegna ti timek a nagkuna, “Saulo, Saulo, apay nga idadanesnak?”

⁵“Siasinoka, Apo?” sinaludsod ni Saulo. “Siak ni Jesus nga idaddadanesmo,” kinuna ti timek.

⁶“Ngem tumakderka, ket inka iti siudad ket maibaganto kenka ti aramidem.”

⁷Nagsardeng dagiti lallaki a kinakuyog ni Saulo ket napaumelda. Nangngegda ti timek ngem awan ti nakitada a tao.

⁸Timmakder ni Saulo, immulagatna dagiti matana ngem saanen a makakita. Iti kasta, kinibinda nga impan idiay Damasco.

⁹Tallo nga aldaw a di makakita. Saan met a nangan wenno imminum.

¹⁰Idiay Damasco, adda maysa nga adalan nga agnagan Ananias. Iti maysa a parmata, kinuna ti Apo kenkuana, “Ananias!” “Adtoyak, Apo,” insungbat ni Ananias.

¹¹“Tumakderka,” kinuna ti Apo, “ket inka iti kalsada a managan Nalinteg. Inka iti balay ni Judas. Damagem sadiay ti maysa a lalaki nga agnagan Saulo a taga-Tarso. Madama nga agkarkararag ita.

¹²Nakitana iti maysa a parmata ti maysa a lalaki nga agnagan Ananias a simrek iti yanna ket impatayna dagiti imana kenkuana tapno makakita manen.”

¹³Ngem insungbat ni Ananias, “Apo, adun ti nadamdamagko maipapan iti daytoy a lalaki ken kadagiti nakabutbuteng nga inaramidna kadagiti tattaom idiay Jerusalem.

¹⁴Immay ditoy Damasco nga addaan pammalubos dagiti panguloen a papadi tapno tiliwenna dagiti amin nga agdaydayaw kenka.”

¹⁵Kinuna ti Apo kenkuana, “Mapanka, ta isu ti pinilik nga agserbi kaniak, tapno ipakaammona ti naganko kadagiti Hentil, kadagiti ari ken kadagiti Israelita.

¹⁶Ipakitakto kenkuana dagiti amin a masapul a sagabaenna gapu kaniak.”

¹⁷Iti kasta, napan ni Ananias. Simrek iti balay ket impatayna dagiti imana ken ni Saulo. “Kabsat a Saulo,” kinunana, “imbaonnak ni Apo Jesus a nagparang kenka iti dalan idi umayka ditoy tapno makakitaka manen ken mapnoka iti Espiritu Santo.”

¹⁸Dagus a naregreg dagiti kasla siksik ti ikan manipud kadagiti mata ni Saulo ket nakakita manen. Timmakder ket nabuniagan.

¹⁹Kalpasan ti pannanganna, simmubli ti pigsana. Sumagmamano nga aldaw a nakipagyan ni Saulo kadagiti adalan idiay Damasco.

²⁰Napan a dagus kadagiti sinagoga ket inkaskasabana ti maipapan ken ni Jesus. “Isu ti Anak ti Dios,” kinunana.

²¹Nasdaaw dagiti amin a nakangngeg kenkuana ket kinunada, “Saan aya nga isu daytoy ti nangparparigat kadagiti tattao nga umaw-awag iti nagan ni Jesus idiay Jerusalem? Saan aya nga immay ditoy tapno tiliwenna dagiti mamati ket ipanna ida a sirereppet kadagiti panguloen a papadi?”

²²Ngem immad-adda ti bileg ni Saulo a mangasaba ket sipipinget a nangpaneknek a ni Jesus isu ti Cristo. Saan a nakasungbat dagiti Judio nga agnaed idiay Damasco.

²³Kalpasan ti adu nga aldaw, nagmimiting dagiti Judio ket nagtutulaganda a patayen ni Saulo.

²⁴Ngem naipakaammo kenkuana ti panggepda. Aldaw-rabii a pinadpadaananda iti ruangan ti siudad tapno patayenda.

²⁵Ngem iti maysa a rabii, innala dagiti pasurotna ket inkabilda iti kuribot sada imbaba iti abut ti bakud ti siudad.

²⁶Napan ni Saulo idiay Jerusalem ket pinanggepna ti makitipon kadagiti adalan. Ngem saanda a namati a maysa nga adalan ket nagbutengda amin kenkuana.

²⁷Iti kasta, napan tinulongan ni Bernabe ket intulodna kadagiti apostoles. Impalawag ni Bernabe kadakuada no kasano ti pannakakita ni Saulo iti Apo iti dalan ken ti pannakisao ti Apo kenkuana. Impadamagna pay kadakuada ti tured ni Saulo a nangaskasaba idiay Damasco iti nagan ni Jesus.

²⁸Iti kasta, nakipagyan ni Saulo kadakuada. Sinursorna ti entero a Jerusalem ket awan butengna a nangasaba iti nagan ti Apo.

²⁹Nagsao ken nakisuppiat pay kadagiti Judio a Griego ti pagsasaona, ngem kayatda a papatayen.

³⁰Idi maammoan daytoy dagiti kakabsat iti pammati, impanda ni Saulo idiay Cesarea ket pinagawidda idiay Tarso.

³¹Iti kasta, awanen ti panagsagaba ti iglesia iti entero a Judea, Galilea ken Samaria. Babaen iti tulong ti Espiritu Santo, pimmigsa ken immadu dagiti mamati ket nagbiag dagiti kamkameng a managbuteng iti Dios.

³²Sinursor ni Pedro ti amin a lugar. Iti naminsan, sinarungkaranna dagiti tattao ti Dios nga agnaed idiay Lidda.

³³Nasarakanna sadiay ti maysa a lalaki nga agnagan iti Eneas. Paralitiko daytoy ket walo a tawenen a sidadalit.

³⁴Kinuna ni Pedro kenkuana, “Eneas, paimbagennaka ni Jesu-Cristo. Bumangonka ket idulinmo ta iddam.” Dinagdagus ni Eneas ti bimmangon.

³⁵Nakita dagiti amin a taga-Lidda ken taga-Sarona ni Eneas ket namatida iti Apo.

³⁶Idiay met Joppe, adda adalan a babai nga agnagan Tabita. Imbukbokna ti amin a panawenna nga agaramid kadagiti naimbag ken tumulong kadagiti napanglaw.

³⁷Iti dayta a tiempo nagsakit ni Dorcas ket natay. Binuggoanda ti bangkayna sada immassayag iti akingngato a kuarto.

³⁸Asideg ti Joppe idiay Lidda. Idi nadamag dagiti adalan a taga-Joppe nga adda ni Pedro idiay Lidda, nangibaonda iti dua a lallaki a mangkiddaw kenkuana a dagdagusenna koma ti mapan idiay Joppe.

³⁹Nagrubbuat ngarud ni Pedro ket nakikuyog kadakuada. Idi sumangpetda, impanda ni Pedro iti kuarto nga akingngato. Agsangsangit nga immaribungbong dagiti amin a balo a babbai iti abay ni Pedro ket impakitada kenkuana dagiti kagay ken dadduma pay a pagan-anay a dinait ni Dorcas idi sibibiag pay.

⁴⁰Pinaruarna amin ida sa nagparintumeng a nagkararag. Kalpasanna, sinangona ti bangkay ket kinunana, “Tabita, bumangonka.” Nagmulagat ni Dorcas, kinitana ni Pedro ket nagtugaw.

⁴¹Iniggaman ni Pedro ti imana sana pinatakder. Inayabanna dagiti tattao ti Dios ken dagiti balo ket imparangna kadakuada ni Dorcas a sibibiag.

⁴²Nagdinamag daytoy a pasamak iti entero a Joppe ket adu dagiti namati iti Apo.

⁴³Nagyan ni Pedro idiay Joppe iti adu nga aldaw, iti balay ni Simon nga agkurkurte iti lalat.