Read Iloko Romans 1 Bible Online

Romans 1 - Iloko bible

Romans 1

¹Siak ni Pablo. Maysaak nga adipen ni Cristo Jesus ken apostol a pinili ken inayaban ti Dios a mangikasaba iti Naimbag a Damagna.

²Nabayagen nga inkari ti Dios daytoy Naimbag a Damag a nailanad kadagiti Nasantoan a Sursurat. Inaramatna dagiti profeta a nangipakaammo iti daytoy.

³Daytoy Naimbag a Damag isu ti maipapan iti Anakna, ni Apotayo a Jesu-Cristo. No maipa-pan iti kinataona, nagtaud iti kaputotan ni David;

⁴no maipapan iti panagtaudna iti Dios ken kinasantona, naipakita babaen iti naindaklan a pannakabalin nga isu ti Anak ti Dios gapu iti panagungarna.

⁵Gapu kenkuana, inted ti Dios kaniak ti gunda-way nga agbalin nga apostol iti nagan ni Cristo, tapno idalanko amin a tattao a mamati ken agtulnog.

⁶Nairamankayo dita Roma nga inayaban ti Dios tapno agbalinkayo a kukua ni Jesu-Cristo.

⁷Daytoy ti gapuna a nagsuratak kadakay amin nga adda dita Roma, dakayo nga ay-ayaten ken inayaban ti Dios nga agbalin a tattaona. Sapay koma ta parabur ken talna ti ited kadakayo ti Dios nga Amatayo ken ni Apo Jesu-Cristo.

⁸Umuna unay, agyamanak iti Diosko babaen ken ni Jesu-Cristo para kadakayo amin. Agdindinamag ngamin ti maipapan iti pammatiyo iti entero a lubong.

⁹Masaksian ti Dios a pudno ti ibagbagak; wen, ti Dios a pagserserbiak iti amin a pusok babaen iti panangikaskasabak iti Naimbag a Damag maipapan iti Anakna. Ammo ti Dios a kanayon a silalagipak kadakayo

¹⁰tunggal agkararagak. Idawdawatko iti Dios a no pagayatanna, mabalinko met laengen ti bumisita kadakayo.

¹¹Ta mailiwak unay a kumita kadakayo tapno ibingayankay iti naespirituan a bendision a mangpapigsa kadakayo.

¹²Kayatko a sawen nga agtitinnulongtayo: matulongankayo babaen iti pammatik ket matulongandak met babaen iti pammatiyo.

¹³Kakabsat, kayatko a maammoanyo koma a namin-adun a pinanggepko ti sumarungkar kadakayo ngem adda latta makalapped kaniak. Tarigagayak ngamin nga adda met koma mapasurotko kadakayo a kas iti kaadda dagiti Hentil a napasurotkon.

¹⁴Adda rebbengek kadagiti amin a tattao, Griego man wenno ganggannaet, kadagiti addaan adal wenno awanan.

¹⁵Isut' gapuna nga aggagarak a mangikasaba iti Naimbag a Damag kadakayo met nga agnaed dita Roma.

¹⁶Naan-anay ti panagtalekko iti ebanghelio ta isut' pannakabalin ti Dios a mangisalakan kadagiti amin a mamati, umuna kadagiti Judio kasta met kadagiti Hentil.

¹⁷Ta ipakaammo ti ebanghelio a ti panangpalinteg ti Dios iti tao mangrugi iti pammati ket agpatingga iti pammati. Kas kuna ti Nasantoan a Surat: “Agbiagto ti pinalinteg ti Dios babaen iti pammati.”

¹⁸Manipud langit, impakaammo ti Dios no kasano nga ukomenna dagiti tattao gapu iti amin a basol ken kinadakes nga inaramidda. Gapu iti kinadakesda, lappedanda ti pannakaipakaammo ti pudno.

¹⁹Dusaen ida ti Dios ta nalawag kadakuada dagiti mabalin nga ammoen maipapan iti Dios, ta ti Dios met laeng ti nangilawlawag kadakuada.

²⁰Manipud pay idi pinarsua ti Dios daytoy lubong, ti agnanayon a pannakabalin ken kinadiosna, uray saan a makita, mabigbig ken nalawag a makita babaen kadagiti gapuananna. Isut' gapuna a pulos nga awan ti mabalinda a pagpambar.

²¹Ammoda ti Dios, ngem dida agdayaw wenno agyaman kenkuana kas maiparbeng. Nagbalin ketdi nga ubbaw ti panagpampanunotda ket sipnget ti linaon dagiti isipda.

²²Kunkunada a mamasiribda, ngem maagda met.

²³Saanda nga agdaydayaw iti Dios a di matay, ngem agdaydayawda ketdi kadagiti ladawan ti tao a matay wenno tumatayab wenno ayup wenno agkarkarayam a parsua.

²⁴Gapu iti kasta a kinamaagda, binaybay-an ti Dios ida nga agaramid kadagiti narugit a tarigagay ti pusoda, ket nakababain ti ar-aramidenda iti maysa ken maysa.

²⁵Tinallikudanda ti kinapudno maipapan iti Dios ket patienda ti kinaulbod. Agdayaw ken agserbida kadagiti pinarsua ti Dios a saan ketdi nga iti mismo a Namarsua a rumbeng a daydayawen iti agnanayon! Amen.

²⁶Daytoy ti gapuna a binaybay-an ti Dios ida kadagiti nakababain a kinaderrep. Uray ti babai, saanen a makikaidda iti lalaki. Ti laengen padana a babai ti kaiddaenna.

²⁷Kasta met ti lalaki. Ti laengen padana a lalaki ti kaiddaenna ket sumgedda iti kinaderrep. Nakababain ti ar-aramidenda iti maysa ken maysa. Isut' gapuna a madusada a kas kaikarianda gapu iti dakes nga aramidda.

²⁸Agsipud ta di bigbigen dagita a tattao ti kinapudno maipapan iti Dios, binaybay-an ida ti Dios nga agpanunot iti dakes ken agaramid kadagiti saan a maiparbeng.

²⁹Napnoda iti amin a kita ti kinadakes, kinaagum, ken bisio. Naapalda, mammapatayda, mannakiapada, naulbodda ken managparpardayada. Manarsaritada.

³⁰Agpipinnadakesda. Kagurada ti Dios. Natangsit, napalangguad ken napasindayagda. Nalaingda nga agpanunot iti ad-adu pay a wagas ti kinadakes. Sukirenda dagiti nagannak kadakuada.

³¹Awan babainda. Dida tungpalen dagiti karida, ket awan asi wenno panangay-ayda kadagiti sabsabali.

³²Ammoda a kuna ti linteg ti Dios a rumbeng a mapapatay ti kasta ti panagbiagna. Ngem aramidenda latta dagitoy ket abuloyanda pay dagiti agaramid kadagitoy a kinadakes.