Read Iloko Romans 12 Bible Online

Romans 12 - Iloko bible

Romans 12

¹Kakabsatko, dawatek ngarud kadakayo, a gapu iti naindaklan nga asi ti Dios kadatayo, ipaayyo koma ti bagiyo a kas daton a sibibiag, nasantoan ken makaay-ayo kenkuana. Daytoy ti pudno a panagdaydayaw a rumbeng nga ipaayyo.

²Saanyo a tultuladen dagiti ugali iti daytoy a lubong ngem palubosanyo a baliwannakayo ti Dios ket pabaroenyo a naan-anay ti panunotyo. Ket maammoanyonto ti pagayatan ti Dios—no ania ti naimbag, makaay-ayo kenkuana ken awan pagkuranganna.

³Gapu iti parabur ti Dios kaniak, ibagak daytoy kadakayo amin: Diyo ipapan ti bagiyo a nangatngato ngem ti rumbeng. Natanang koma ketdi ti panagpampanunotyo, ket usigen ti tunggal maysa ti bagina kas mayannurot iti rukod ti pammati nga inted ti Dios kenkuana.

⁴Adu ti paset ti bagitayo ket agduduma ti usarda.

⁵Kasta met a nupay adutayo, maymaysatayo a bagi ken ni Cristo. Napagkakamangtayo a kas iti nadumaduma a paset ti bagi.

⁶Masapul ngarud nga aramatentayo dagiti nadumaduma a sagut kas iti parabur nga inted ti Dios kadatayo. No panangipakaammo iti mensahe ti Dios ti saguttayo, masapul nga aramidentayo kas mayannurot iti pammati nga adda kadatayo.

⁷No panagserbi, agserbitayo. No panangisuro, mangisurotayo.

⁸No pammaregta, paregtaentayo ti padatayo a tao. Ti adda ibingayna, mangted a sibubuslon. Ti mangipangulo, agtrabaho a sigagaget. Ti mangngaasi, mangngaasi a siraragsak.

⁹Agayatkayo a sipupudno. Guraenyo ti dakes ket salimetmetanyo ti naimbag.

¹⁰Nabara koma ti panagiinnayatyo kas agkakabsat ken ni Cristo, ket nareggetkayo a mangipakita iti panagraemyo iti maysa ken maysa.

¹¹Ipasnekyo ti agtrabaho, ket dikay agsadsadut. Ipapusoyo ti agserbi iti Apo.

¹²Agbiagkayo a siraragsak gapu iti namnamayo. Ibturanyo dagiti rigatyo, ket kanayon nga agkararagkayo.

¹³Ibingayanyo dagiti napanglaw a kakabsatyo iti pammati, ket padagusenyo dagiti sangsangaili.

¹⁴Dawatenyo iti Dios a bendisionanna dagiti mangidadanes kadakayo. Wen, dawatenyo ti pannakabendisionda a saan ket a ti pannakailunodda.

¹⁵Makipagragsakkayo kadagiti agragsak. Makipagsangitkayo kadagiti agsangit.

¹⁶Dikay mangidumduma. Dikay agpalangguad; makigayyemkayo ketdi kadagiti nanumo a tattao. Diyo ipagarup a mamasiribkayo.

¹⁷Diyo supapakan iti dakes ti siasinoman nga agaramid iti dakes kadakayo. Ikagumaanyo nga aramiden ti naimbag iti imatang ti amin a tattao.

¹⁸Aramidenyo amin a kabaelanyo a makilangen a sikakappia iti tunggal maysa.

¹⁹Ni kaanoman dikay agibales, gagayyemko. Bay-anyo a ti Dios ti agibales. Ta nailanad iti Nasantoan a Surat: “Siakto ti agibales, siakto ti mangsupapak, kuna ti Apo.”

²⁰Ngem kas kuna ti Nasantoan a Surat: “No mabisin ti kabusormo, pakanem; no mawaw, painumem. No aramidem ti kasta, maalananto ti agbain.”

²¹Dika paabak iti dakes. Parmekem ketdi ti dakes babaen iti naimbag nga aramid.