Read Iloko Romans 13 Bible Online

Romans 13 - Iloko bible

Romans 13

¹Rebbeng ti amin a tattao ti agtulnog kadagiti agtuturay iti gobierno gapu ta awan ti turay a saan nga agtaud iti Dios. Ti Dios ti nangisaad kadagiti agtuturay.

²Ngarud, ti siasinoman a sumukir kadagiti agtuturay, sukirenna met ti intuyang ti Dios ket yegna ti dusa iti mismo a bagina.

³Saan a dagiti agaramid iti naimbag ti agbuteng kadagiti agturay no di ket dagiti agaramid iti dakes. Tapno awan panggapuam nga agbuteng iti agturay, aramidem ti naimbag ket idaydayawnakanto.

⁴Ta isu ti adipen ti Dios nga agserbi iti pagsayaatam. Ngem no agaramidka iti dakes, agbutengka kenkuana, ta saan a sinsinan ti pannakabalinna a mangdusa. Isu ti adipen ti Dios a mangipatay iti pannusa ti Dios kadagiti agaramid iti dakes.

⁵Gapu iti daytoy, masapul nga agtulnogkayo kadagiti agtuturay, saan la a tapno malisianyo ti pannusa ti Dios, ngem gapu pay iti nadalus a konsensia.

⁶Daytoy pay ti gapuna nga agbayadkayo iti buis. Ta iti panangtungpal dagiti agtuturay iti pagrebbenganda, agtartrabahoda para iti Dios.

⁷Bayadanyo ngarud ti utangyo kadakuada. Itedyo ti buisyo. Raemen ken padayawanyo ida amin.

⁸Awan koma ti utangyo malaksid ti panagiinnayatyo. Ti agayat iti padana a tao, natungpalnan ti Linteg.

⁹Ta dagiti bilin: “Dika makikamalala, dika mamapatay, dika agtakaw, dika agagum”—amin dagitoy ken dadduma pay, madagupda iti daytoy maymaysa a bilin: “Ayatem ti padam a tao a kas iti bagim.”

¹⁰Ti agayat iti padana a tao, ni kaano man dina aramiden ti dakes kenkuana. Ngarud, ti panagayat iti pada a tao isu ti panagtungpal iti entero a Linteg.

¹¹Masapul nga aramidenyo daytoy ta ammoyo a panawenen tapno agriingkayo. Ta as-asidegen ti pannakaisalakantayo ngem idi damotayo ti mamati.

¹²Lumabasen ti rabii ket bumigaten. Iwaksitayo dagiti aramid ti sipnget ket ikawestayo dagiti igam ti lawag.

¹³Agbiagtayo a natakneng, kas tattao nga adda iti lawag. Awan ti nalabes a panagragragsak ken panagbarbartek, awan ti kinaderrep ken naalas nga aramid, ket awan ti ap-apa ken im-imon.

¹⁴Ikawesyo ketdi ni Apo Jesu-Cristo a kas armasyo ket isardengyon a pagustoan ti dakes a tarigagay dagiti bagbagiyo.