Read Iloko Romans 14 Bible Online

Romans 14 - Iloko bible

Romans 14

¹Awatenyo ti tao a nakapuy ti pammatina, ngem diyo kasupsuppiat maipapan iti kapanunotanna.

²Adda mamati a mabalinna a kanen ti uray ania, ngem ti nakapuy ti pammatina, natnateng laeng ti makanna.

³Ti mangan iti uray ania, saanna koma a laisen ti saan a mangan a kas kenkuana. Ti met mangan kadagiti natnateng laeng, saanna koma nga ukomen ti mangan iti uray ania, gapu ta inawat ti Dios daytoy a tao.

⁴Siasinoka kadi a mangukom iti adipen ti sabali? Ti apona met laeng ti mangikeddeng kenkuana no agballigi wenno saan. Ket agballiginto gapu iti Apo.

⁵Kuna ti maysa a tao nga adda aldaw a napatpateg ngem dagiti dadduma nga aldaw. Kuna met ti sabali nga agpapadada amin. Awan koma ti panagduadua ti tunggal maysa iti kapanunotanna maipapan iti daytoy a banag.

⁶Ti siasinoman a mangngilin iti maysa nga aldaw, ngilinenna a kas pammadayaw iti Apo. Ti siasinoman a mangan iti uray ania, kanenna a kas pammadayaw iti Apo, ta agyaman daytoy a tao iti Dios gapu iti taraon. Ti siasinoman a di mangan kadagiti dadduma a taraon, aramidenna daytoy a kas pammadayaw iti Apo, ket agyaman ti Dios.

⁷Awan kadatayo ti agbiag a maipaay iti bagina laeng. Awan met kadatayo ti matay a maipaay iti bagina laeng.

⁸No agbiagtayo, agbiagtayo a maipaay iti Apo, ket no mataytayo, mataytayo a maipaay iti Apo. Ngarud, agbiagtay man wenno mataytayo, kukuanatayo ti Apo.

⁹Natay ken nagungar ni Cristo tapno isu ti Apo dagiti sibibiag ken dagiti natay.

¹⁰Sika, apay ngarud nga ukomem ti kabsatmo? Ket sika met, apay nga umsiem ti kabsatmo? Agtakdertayto amin iti sangoanan ti Dios tapno ukomennatayo.

¹¹Ta kuna ti Nasantoan a Surat, “Kas sibibiagak, kuna ti Apo, agparintumengto ti amin a tattao iti sangoanak, ket ipaduyakyakdanto a siak ti Dios.”

¹²Ngarud, dumatagto ti tunggal maysa kadatayo iti sangoanan ti Dios.

¹³Ngarud, saantayon nga agiinnukom. Ikeddengyo ketdi a dikay agaramid iti aniaman a pakaitibkolan wenno pakaigapuan ti kabsatyo nga agbasol.

¹⁴Iti pannakikaysak ken ni Apo Jesus, patiek nga awan ti taraon a narugit iti imatang ti linteg. Ngem no patien ti maysa a tao nga adda taraon a narugit, agbalin a narugit kenkuana.

¹⁵No madangran ti kabsatmo gapu iti kanem, saanka nga agbibiag iti ayat! Gapu iti kanen, dimo dadaelen ti tao a nakaigapuan ti pannakatay ni Cristo!

¹⁶Agannadka tapno saan a dakes ti pakasarsaritaan ti ibilangmo a naimbag.

¹⁷Ta ti Pagarian ti Dios saan a maipapan iti pannangan ken panaginum no di ket maipapan iti kinalinteg, kappia ken rag-o nga ited ti Espiritu Santo.

¹⁸Ket no kastoy ti panagserbi ti maysa a tao ken Cristo, paragsakenna ti Dios ket magun-odna ti panagraem ti padana a tao.

¹⁹Ngarud, masapul nga aramidentayo dagiti makaited iti kappia ken makatulong a mangpapigsa iti maysa ken maysa.

²⁰Dimo dadaelen ti inaramid ti Dios gapu iti taraon. Mabalin a kanen ti amin a taraon, ngem dakes a kanen ti uray ania a pakaigapuan ti panagbasol ti maysa a tao.

²¹Nasayaat koma no saankan nga agsida iti karne, wenno aginum iti arak, wenno agaramid iti aniaman a pakaigapuan ti panagbasol ti kabsatmo.

²²Salimetmetam ngarud ti patiem maipapan iti daytoy iti biangmo laeng ken iti Dios. Nagasat ti tao a di mariribuk ti konsensiana a mangaramid kadagiti banag nga ammona a nasayaat!

²³No agduadua iti kanenna, sana met la kanen, dusaen ti Dios ta saan a maibatay ti aramidna iti pammati. Ta basol ti uray ania a saan a maibatay iti pammati.