Read Iloko Romans 15 Bible Online

Romans 15 - Iloko bible

Romans 15

¹Datayo a napigsa ti pammatina, rebbengtayo a tulongan dagiti nakapuy a mangawit kadagiti pakadagsenanda. Saan la a ti bukodtayo a pagragsakan ti pampanunotentayo.

²Paragsakentayo ketdi ti padatayo a tao tapno mapapigsa iti pammati.

³Ta ni Cristo saan a ti bukodna a bagi ti pinampanunotna, no di ket, kas kuna ti Nasantoan a Surat, “Pinadpadakesdaka dagiti tattao ngem iti kinapudnona, siak ti nagtinnagan dagiti pammadpadakesda.”

⁴Ta amin nga adda iti Nasantoan a Surat, naisuratda tapno isurodatayo a mangnamnama babaen iti anus ken pammaregta nga ited ti Nasantoan a Surat.

⁵Sapay koma ta tulongannakayo ti Dios a paggapuan ti anus ken pammaregta, tapno agtutunoskayo a mangsurot iti ulidan nga impakita ni Cristo Jesus.

⁶Iti kasta, agmaymaysa ti timekyo a mangidaydayaw iti Dios ken Ama ni Apotayo a Jesu-Cristo.

⁷Ngarud, kas iti panangawat ni Cristo kadakayo, awatenyo ti maysa ken maysa tapno maidaydayaw ti Dios.

⁸Ta ibagak kadakayo a nagbalin ni Cristo nga adipen dagiti Judio tapno paneknekanna a napudno ti Dios, ket tungpalenna dagiti karina kadagidi amma.

⁹Iti kasta, agdaydayaw met dagiti Hentil iti Dios gapu iti asina. Kas kuna ti Nasantoan a Surat, “Ngarud, idaydayawkanto kadagiti Hentil; Ikantakto dagiti pagdaydayaw iti naganmo.”

¹⁰Kunana pay, “Makipagrag-okayo, dakay a Hentil, kadagiti tattao a pinili ti Dios!”

¹¹Kunana manen, “Idaydayawyo ti Apo, dakay amin a Hentil; Ipigsayo ti panagdaydayawyo iti Apo, dakay amin a tattao!”

¹²Kuna pay ni Isaias, “Addanto umay nga agtaud iti kaputotan ni Jesse; Mapadakkelto a mangituray kadagiti Hentil, Ket isunto ti pangnamnamaanda.”

¹³Sapay koma ta ti Dios a paggapuan ti namnama, punnoennakayo iti amin a rag-o ken talna iti pammatiyo kenkuana tapno dumakkel a dumakkel ti namnamayo iti pannakabalin ti Espiritu Santo.

¹⁴Iti biangko, kakabsatko, awan duaduak a napnoankayo iti kinaimbag, addaankayo iti amin nga ammo ket makapagsisinnurokayo.

¹⁵Nupay kasta, naturedak nga agsurat ita maipapan iti sumagmamano a bambanag nga impalagipkon kadakayo. Wen, naturedak gapu iti gundaway nga inted ti Dios kaniak,

¹⁶kas adipen ni Cristo Jesus nga agtrabaho kadagiti Hentil. Agserbiak a kas padi a mangikaskasaba kadakuada ti Naimbag a Damag nga aggapu iti Dios, tapno agbalin dagiti Hentil a daton a makaay-ayo iti Dios, ken naidaton kenkuana babaen iti Espiritu Santo.

¹⁷Ngarud, iti pannakikaysak ken ni Cristo Jesus, mabalinko nga itangsit ti aramidko a maipaay iti Dios.

¹⁸Agturedak ket sawek laeng ti inaramid ni Cristo, ta inaramatnak a mangidalan kadagiti Hentil tapno agtulnogda iti Dios, babaen iti sao ken iti aramid,

¹⁹babaen iti pannakabalin dagiti pagilasinan ken milagro, ken babaen iti pannakabalin ti Espiritu. Isut' gapuna nga iti panagbibiahek manipud Jerusalem agingga idiay Ilirico, inaramidko amin a kabaelak a nangikasaba iti Naimbag a Damag maipapan ken ni Cristo.

²⁰Panggepko nga ikasaba ti Naimbag a Damag kadagiti lugar a saan pay a nakangngeg iti maipapan ken ni Cristo, tapno saanak a mangbangon iti rabaw ti fondasion nga insaad ti sabali.

²¹Kas kuna ti Nasantoan a Surat, “Makakitanto dagiti saan pay a nakadamag maipapan kenkuana, Ket makaawatto dagiti saan pay a nakangngeg.”

²²Daytoy ti gapuna a namin-adun a nalapdanak nga umay kadakayo.

²³Ngem ita ta nalpaskon ti trabahok kadagitoy a lugar, ken yantangay ta nabayagen a panggepkayo a bisitaen,

²⁴namnamaek a matungpalkon daytoy a tarigagay. Kayatko ti dumagas dita a kumita kadakayo inton agpa-Espaniaak ket agpatulongakto kadakayo a mapan sadiay kalpasan ti bassit a tiempo a pannakiinniliwko kadakayo.

²⁵Nupay kasta, innak ita idiay Jerusalem a mangted iti tulong kadagiti tattao ti Dios sadiay.

²⁶Ta siaayat dagiti iglesia idiay Macedonia ken Grecia a nangted iti sagut a pangtulong kadagiti napanglaw a tattao ti Dios idiay Jerusalem.

²⁷Isuda met laeng ti akinnakem a tumulong. Kinapudnona, rebbengda ti tumulong kadagiti napanglaw idiay Jerusalem, ta no nakiranud dagiti Hentil kadagiti naespirituan a bendision dagiti Judio, rebbeng met ngarud dagiti Hentil a pagserbi kadagiti Judio dagiti material a bendisionda.

²⁸Inton malpasko daytoy annongko ket mayawatkonton ti amin a naur-or a kuarta nga agpaay kadakuada, agrubbuatakton nga agpa-Espania ket dumagasakto dita.

²⁹Ammok nga inton umayak, umayakto a napno iti bendision ni Cristo.

³⁰Dawatek kadakayo, kakabsat, gapu ken ni Apotayo a Jesu-Cristo ken gapu iti ayat nga ited ti Espiritu a buyogandak iti nasged a panangikararagyo kaniak iti Dios.

³¹Dawatenyo a mailisiak kadagiti saan a mamati idiay Judea. Dawatenyo met nga awaten dagiti tattao ti Dios idiay Jerusalem ti panagserbik sadiay.

³²Iti kasta, no ipalubos ti Apo, umayakto a napnoan iti rag-o, ket ammok a maragsakan ken mabang-aranakto iti isasarungkarko kadakayo.

³³Sapay koma ta adda kadakayo amin ti Dios a mangted iti talna. Amen.