Read Iloko Romans 16 Bible Online

Romans 16 - Iloko bible

Romans 16

¹Irekomendarko kadakayo ni kabsattayo a Febe nga agserserbi iti iglesia idiay Cencrea.

²Awatenyo iti nagan ti Apo kas rumbeng nga aramiden dagiti tattao ti Dios. Tulonganyo iti aniaman a kasapulanna, ta adu a tattao ti tinultulonganna, ket maysaak kadakuada.

³Pakomustaak da Priscila ken Akila a kakaduak a nagserserbi ken ni Cristo Jesus.

⁴Nagpeggad ti biagda gapu kaniak. Saan la a siak ti agyaman kadakuada no di pay ket ti amin nga iglesia dagiti Hentil.

⁵Pakomustaak met ti iglesia nga aggigimong iti balayda. Pakomustaak ni Epeneto a patgek a gayyem. Isu ti immuna a namati ken ni Cristo iti probinsia ti Asia.

⁶Pakomustaak ni Maria a nagrigrigat a nagtrabaho para kadakayo.

⁷Pakomustaak da Adronico ken Junia a kadaraak ken kakaduak a naibalud. Am-ammo unay ida dagiti apostoles. Immun-unada ngem siak a nagbalin a Kristiano.

⁸Pakomustaak met ni Ampliato a patgek a gayyem iti pannakikadkadua iti Apo.

⁹Kasta met ni Urbano a katrabahoanmi iti panagserbi ken Cristo ken ni Estakis a patgek a gayyem.

¹⁰Pakomustaak ni Apeles a napaneknekanen ti kinapudnona ken ni Cristo. Kasta met ti familia ni Aristobulo.

¹¹Pakomustaak ni Herodion a padak a Judio ken dagiti kakabsat a Kristiano iti familia ni Narciso.

¹²Pakomustaak da Trifena ken Trifosa nga agserserbi iti Apo, kasta met ti patgek a gayyem, ni Persida nga adu ti nagapuananna a maipaay iti Apo.

¹³Pakomustaak ni Rufo a nalatak nga agserserbi iti Apo, agraman ni inana a nangibilang kaniak a kas maysa nga anakna.

¹⁴Pakomustaak da Asincrito, Flegonte, Hermes, Patrobas, Hermas ken dagiti amin a kakabsat a kakaduada.

¹⁵Pakomustaak pay da Filologo ken Julia, ni Nereo ken ti kabsatna a babai, ni Olimpas, ken amin a tattao ti Dios a kakaduada.

¹⁶Agkikinnablaawkayo iti nainkabsatan nga agek. Pakomustaandakayo dagiti amin nga iglesia ni Cristo.

¹⁷Kakabsatko, dawatek nga agannadkayo kadagiti tattao a mamagsisina ken mangyaw-awan kadakayo iti pammati ken dagiti agsao iti maibusor iti pannursuro nga inawatyo. Adaywanyo ida.

¹⁸Dagiti agaramid kadagitoy, saanda nga agserserbi ken ni Cristo nga Apotayo, no di ket iti bukodda a paggarteman. Allilawenda dagiti nasingpet a tattao babaen kadagiti napipintas a balikas ken makaay-ayo a panagsao.

¹⁹Agdindinamag ti kinapudnoyo iti ebanghelio, ket daytoy ti gapuna a maragsakanak kadakayo. Kayatko a masiribkayo a mangammo no ania ti naimbag, ngem awan koma ti ammoyo maipapan iti dakes.

²⁰Iti mabiit, ti Dios a pagtaudan ti talna, parmekennanto ni Satanas. Adda koma kadakayo ti parabur ni Apotayo a Jesus.

²¹Pakomustaannakayo ni Timoteo a katrabahoak. Agpakomusta met da Lucio, Jason ken Sosipatro a padak a Judio.

²²Siak, ni Tercio a nangisurat iti daytoy, idanonko met kadakayo ti nakristianoan a pakomusta.

²³Pakomustaannakayo ni Gayo a mangsangsangaili kaniak ken akimbalay iti paggigimongan dagiti mamati. Pakomustaannakayo met ni Erasto a tesorero ti siudad, ken ni kabsattayo a Cuarto.

²⁵Madaydayaw ti Dios! Mabalinnakayo a pagtalinaeden a natibker iti pammatiyo, kas mayannurot iti Naimbag a Damag nga ikaskasabak maipapan ken Jesu-Cristo, ken kas mayannurot iti naiparangarang a palimed ti kinapudno a nailemmeng manipud idi punganay.

²⁶Ngem ita, nailatak dayta a kinapudno. Babaen kadagiti sinuratan dagiti profeta ken kas mayannurot iti bilin ti agnanayon a Dios, naipakaammo daytoy kadagiti amin a nasion tapno mamati ken agtulnog amin a tattao.

²⁷Madaydayaw koma iti agnanayon babaen ken Jesu-Cristo ti maymaysa a Dios, isu a kakaisuna a masirib iti amin! Amen.