Read Iloko Romans 2 Bible Online

Romans 2 - Iloko bible

Romans 2

¹Gayyem, uray ania ti katataom, awan a pulos ti panggapuam a mangukom iti sabali. No ukomem dagiti sabsabali, ngem aramidem met dagiti ar-aramidenda, ta bagim met laeng ti uk-ukomem.

²Ammotayo a nalinteg ti panangukom ti Dios kadagiti agaramid kadagitoy.

³Sika a mangukom kadagiti sabsabali ngem aramidem met dagiti ar-aramidenda, ipagarupmo kadi a malisiam ti panangukom ti Dios?

⁴Wenno, tagibassitem kadi ti aglaplapusanan a kinaimbag, panagibtur ken kinaanus ti Dios? Awan duadua nga ammom a manangngaasi ti Dios gapu ta ikalkalikagumna a maiturongka nga agbabawi.

⁵Ngem gapu ta natangken ti panagul-ulom ken nasukirka, nakarkaronto ti pannakadusam inton Aldaw a maiparangarang ti pungtot ti Dios ken ti nalinteg a panangukomna.

⁶Gunggonaanto ti Dios ti tunggal tao kas maitutop iti aramidna.

⁷Adda tattao a naanus nga agaramid iti naimbag tapno magun-odda ti dayag, dayaw ken biag nga awan patinggana. Itedto ti Dios kadakuada ti biag nga agnanayon.

⁸Adda dagiti tattao a ti laeng bukodda a pagimbagan ti sapsapulenda ken laksidenda ti pudno tapno surotenda ti dakes. Idissuorto ti Dios kadakuada ti pungtot ken gurana.

⁹Agrigat ken agtuokto ti amin a tattao nga agaramid iti dakes, umuna dagiti Judio kasta met dagiti Hentil.

¹⁰Ngem itedto ti Dios ti dayag, dayaw ken talna kadagiti amin nga agaramid iti naimbag, umuna kadagiti Judio kasta met kadagiti Hentil.

¹¹Awan ti idumduma ni Apo Dios.

¹²No agbasol dagiti Hentil, saan a maipakat kadakuada ti Linteg ni Moises gapu ta saan a nairanta kadakuada daytoy. No agbasol dagiti Judio, maipakat kadakuada ti Linteg gapu ta isuda ti nakairantaanna.

¹³Ta saan a mapalinteg ti tao iti imatang ti Dios babaen iti panagdengngegna iti Linteg, no di ket babaen iti panagtungpalna iti Linteg.

¹⁴Awan ti Linteg kadagiti saan a Judio. Ngem no gapu iti nakaisigudanda a kababalin, aramidenda dagiti ibilin ti Linteg nupay dida ammo ti Linteg, agbalin a linteg dayta kadakuada.

¹⁵Babaen kadagiti aramidda, maiparangarang a naisurat dagiti bilin ti Linteg iti pusoda. Patalgedan met ti konsensiada a pudno daytoy, ta no maminsan pabasolen ida ti panunotda, ket no dadduma, ikalinteganna ida.

¹⁶Kas mayannurot iti Naimbag a Damag nga ikaskasabak, kastoyto ti maaramid iti dayta nga Aldaw inton ukomen ti Dios babaen ken ni Jesu-Cristo, ti amin a nalimed a pampanunot dagiti tattao.

¹⁷Ket sika? Kunam a Judioka. Agtalekka iti Linteg ket pagpasindayagmo ti Dios.

¹⁸Ammom ti kayat ti Dios nga aramidem, ket nasursurom iti Linteg a pilien ti nasayaat.

¹⁹Kapkapnekam a maidalanmo dagiti bulsek, a masilawam dagiti adda iti sipnget,

²⁰a maisurom dagiti nengneng, ken maadalam dagiti awan ammona. Gapu ta adda kenka ti Linteg, ipagarupmon nga ammom ti amin ket pudno aminen a sawem.

²¹Kasano nga isurom dagiti sabali no dimo pay maisuro ta bagim? Ikasabam ti saan a panagtakaw, ngem apay nga agtakawka?

²²Ibagam a maiparit ti pannakikamalala, ngem apay a makikamalalaka met? Kaguram dagiti didiosen, ngem apay a takawam met dagiti temploda!

²³Pagpalangguadmo ti kaadda kenka ti linteg ti Dios, ngem apay nga ibabainmo ti Dios gapu iti panangsalungasingmo iti lintegna?

²⁴Kuna ti Nasantoan a Surat, “Gapu kadakayo a Judio, agsao dagiti Hentil iti dakes a maibusor iti Dios.”

²⁵Adda pateg ti panangannurotmo iti tulag ti pannakakugit no tungpalem ti Linteg. Ngem no salungasingem, naim-imbag la koman a dika nagpakugit.

²⁶No tungpalen ti maysa a Hentil ti bilin ti Linteg idinto a saan a nakugit daytoy, dinto kadi ibilang ti Dios a kas maysa metten a nakugit?

²⁷Ket dakayo a Judio, uray no adda kadakayo ti naisurat a Linteg, ken nakugitkayo, no salungasingenyo ti Linteg, ukomendakayto dagiti saan a Judio ta agtulnogda iti Linteg uray no dida nakugit.

²⁸No nakugit ti maysa a Judio, saanna kayat a sawen nga isu ket napaypayso a Judio. Saan a Judio ti maysa a tao gapu laeng ta nakugit.

²⁹Ngem ti pudno a Judio, isu ti Judio iti uneg, kayatna a sawen, nakugit ti pusona babaen iti Espiritu ti Dios a saan ket a babaen iti naisurat a Linteg. Ti pannakaidaydayaw ti kasta a tao aggapu iti Dios, saan a kadagiti tattao.