Read Iloko Romans 3 Bible Online

Romans 3 - Iloko bible

Romans 3

¹Ngarud, adda kadi pangatiwan dagiti Judio kadagiti saan a Judio? Adda kadi pateg ti pannakakugit?

²Adu la ketdi! Umuna, intalek ti Dios ti saona kadagiti Judio.

³Ngem no kas pangarigan, saan a mapagtalkan ti sumagmamano kadakuada, kayatna kadi a sawen a saan metten a mapagtalkan ti Dios?

⁴Saan! Napudno latta ti Dios, uray naulbod ti amin a tao. Kas kuna ti Nasantoan a Surat: “Masapul a maipakita a nalintegka no agsaoka, Masapul a mangabakka iti aniaman a pangidarumanda kenka.”

⁵Ngem no ti panagaramidtayo iti dakes, nalawag a maipakita ti nalinteg nga aramid ti Dios, ania ti makunatayo? Saan kadi a nalinteg ti Dios no dusaennatayo? (Agsaoak ita kas kaugalian ti tao.)

⁶Saan! No saan a nalinteg ti Dios, kasano ngarud ti panangukomna iti lubong?

⁷Ngem no gapu iti kinaulbodko, maipakita a nalawag ti kinapudno ti Dios ket agserbi a pakaidaydayawanna, apay a maukomak pay laeng a kas maysa a managbasol?

⁸Apay ngarud a ditayo kuna, “Agaramidtayo iti dakes tapno tumaud ti imbag”? Agpayso nga adda dagiti mangpadpadakes kaniak ket pabpabasolendak a sinaok kano daytoy! Rumbeng a madusadanto.

⁹Ania ngaruden? Kayatna kadi a sawen a nasaysayaat ti sasaadenmi a Judio ngem dagiti saan a Judio? Saan! Naipakitakon nga agpadpada nga iturayan ti basol dagiti Judio ken dagiti saan a Judio.

¹⁰Kas kuna ti Nasantoan a Surat: “Awan ti uray maysa a nalinteg a tao,

¹¹Awan ti uray maysa a makaawat, wenno mangbirok iti Dios.

¹²Pinanawanda ti Dios, nagbalinda amin a dakes. Awan ti uray maysa nga agaramid iti naimbag.

¹³Kasla tanem a silulukat ti ngiwatda, agkakadakes a kinaulbod ti baliksen dagiti dilada. Makapatay a sao, kasla gita ti uleg ti yebkas dagiti bibigda.

¹⁴Napno iti napait a lunod dagiti ngiwatda.

¹⁵Napardasda a mangdangran ken mangpapatay;

¹⁶Iti sadinoman a papananda, pannakadadael ken kinakas-ang ti ibatida.

¹⁷Dida ammo a pulos ti dalan ti kappia,

¹⁸dida met nasursuro ti agbuteng iti Dios.”

¹⁹Ita, ammotayo a ti amin a linaon ti Linteg agpaayda kadagiti agbibiag iti babaen ti Linteg. Adda ti Linteg tapno sumardeng amin a pambar dagiti tattao ket idatagna ti entero a lubong tapno ukomen ti Dios.

²⁰Ta awan ti tao a mapalinteg iti imatang ti Dios babaen iti panangtungpalna iti Linteg. Agserbi ti Linteg a mangipakaammo a nakabasol ti tao.

²¹Ngem ita, naiparangarangen ti panangpalinteg ti Dios iti tao. Saan a naibatay daytoy iti linteg, uray no pinaneknekan ti Linteg ni Moises ken dagiti profeta.

²²Palintegen ti Dios dagiti tattao gapu ta mamatida ken ni Jesu-Cristo. Aramiden ti Dios daytoy kadagiti amin a mamati ken ni Cristo, ta awan a pulos ti pagdudumaanda.

²³Nagbasol amin a tattao ket agkurangda iti kinadayag ti Dios.

²⁴Ngem gapu iti parabur a siaayat nga inted ti Dios, mapalinteg ti amin a tattao iti sangoananna babaen ken ni Cristo Jesus a mangwayawaya kadakuada.

²⁵Indaton ti Dios ni Cristo Jesus tapno, babaen iti ipapatayna, isu ti pakapakawanan dagiti basol dagiti tattao babaen iti pammatida kenkuana. Inaramid ti Dios daytoy tapno ipakitana ti kinalintegna. Iti napalabas, naanus ket pinalabasna dagiti basol ti tao.

²⁶Ngem iti agdama a tiempo, dina palabasenen ti basol ti tao tapno ipakitana ti kinalintegna. Kastoy ti panangipakita ti Dios a nalinteg ti aramidna, ket palintegenna ti amin a mamati ken ni Jesus.

²⁷Ania ngarud ti mabalintayo a pagpasindayag? Awan! Agpasindayag ti tao saan a gapu ta agtulnog iti Linteg, no di ket gapu ta mamati.

²⁸Ta ibilangtayo a mapalinteg ti tao iti sangoanan ti Dios babaen iti pammati, ket saan a babaen iti panangtungpalna iti Linteg.

²⁹Dagiti Judio laeng aya ti akin-Dios iti Dios? Saan aya nga isu met ti Dios dagiti Hentil? Wen, isu met ti Diosda.

³⁰Maymaysa ti Dios, ket palintegennanto dagiti Judio babaen iti pammatida. Palintegennanto met dagiti Hentil babaen iti pammatida.

³¹Baybay-antayo kadin ti Linteg gapu iti daytoy a pammati? Saan, no di ket ipakitatayo ti pudno a kaipapanan ti Linteg.