Read Iloko Romans 4 Bible Online

Romans 4 - Iloko bible

Romans 4

¹Ania ngarud ti makunatayo ken ni Abraham nga amatayo? Ania ti padasna?

²No napalinteg ni Abraham iti sangoanan ti Dios gapu kadagiti inaramidna, adda koma pagtangsitna. Ngem saan a makapagtangsit iti sangoanan ti Dios.

³Kuna ti Nasantoan a Surat, “Namati ni Abraham iti Dios, ket gapu iti pammatina, inawat ti Dios a kas nalinteg.”

⁴Ti agtrabaho, matangdanan. Saan a maibilang a sagut ti tangdanna no di ket tineggedna.

⁵Ti tao nga agtalek iti pammatina a saan nga iti aramidna, ngem mamati iti Dios a mangibilang iti nakabasol nga awan basolna, bigbigen ti Dios ti pammati dayta a tao tapno maibilang a nalinteg.

⁶Daytoy ti kayat a sawen ni David idi kinunana a nagasat ti tao nga awaten ti Dios a kas nalinteg iti sangoananna, saan a gapu kadagiti aramidna:

⁷“Nagasat dagiti pinakawan ti Dios ti kinadakesda, dagiti inabbongan ti Dios ti basolda!

⁸Nagasat ti tao a ti basolna ket lipaten ti Apo!”

⁹Agpaay laeng kadi kadagiti nakugit daytoy a kinagasat a sarsaritaen ni David? Saan! Agpaay met kadagiti saan a nakugit. Ta inaramattayo daytoy a paset ti Nasantoan a Surat nga agkuna: “Namati ni Abraham iti Dios, ket gapu iti pammatina, inawat ti Dios a kas nalinteg.”

¹⁰Kaano a napasamak daytoy? Sakbay kadi wenno kalpasan a nakugit ni Abraham? Sakbay ti pannakakugitna, saan nga iti kalpasanna.

¹¹Naud-udi ti pannakakugitna, ket ti pannakakugitna ti mangpaneknek nga inawat ti Dios a kas nalinteg ni Abraham gapu iti pammatina sakbay a nakugit. Iti kasta, ni Abraham ti naespirituan nga ama dagiti amin a mamati iti Dios, ket awaten ti Dios a kas nalintegda uray pay no saanda a nakugit.

¹²Isu met ti ama dagiti nakugit, saan laeng a gapu ta nakugitda, no di ket gapu ta agbibiagda iti pammati a kas iti panagbiag ni amatayo nga Abraham sakbay a nakugit.

¹³Inkari ti Dios ken ni Abraham ken kadagiti kaputotanna a tagikuaendanto ti lubong. Inaramidna daytoy, saan a gapu ta nagtulnog ni Abraham iti Linteg, no di ket gapu ta namati ket inawat ti Dios a kas nalinteg.

¹⁴Ta no maited ti inkari ti Dios kadagiti agtulnog iti Linteg, awanen ti serserbi ti pammati ti tao ket awan metten ti pagmamaayan ti kari ti Dios.

¹⁵Ta ti Linteg pataudenna ti pungtot ti Dios. Ngem no awan linteg, awan met panagsalungasing.

¹⁶Naibatay ngarud ti kari iti pammati tapno mapatalgedan ti kari a kas sagut ti Dios kadagiti amin a kaputotan ni Abraham. Saan laeng nga agpaay daytoy a kari kadagiti agtulnog iti Linteg, no di pay ket kadagiti mamati a kas iti panamati ni Abraham. Ta ni Abraham ti naespirituan nga amatayo amin.

¹⁷Kas kuna ti Nasantoan a Surat, “Pinagbalinka nga ama ti adu a nasion.” Iti kasta, naimbag ti kari iti imatang ti Dios a pinati ni Abraham, ti Dios a mamagungar kadagiti natay ken mangparsua kadagiti bambanag nga awan babaen iti panagsaona.

¹⁸Namati ni Abraham ket nangnamnama uray idi awan pangnamnamaanna. Isut' gapuna a nagbalin “nga ama ti adu a nasion.” Kas kuna ti Nasantoan a Surat, “Kas ti kaadu dagiti bituen ti kaadunto ti kaputotam.”

¹⁹Agsangagasuten idi ti tawen ni Abraham. Ngem saan a kimmapuy ti pammatina uray idi ibilangna ti bagina a kasla natayen ken saan a mabalin nga aganak ni Sara.

²⁰Saan a napukaw ti pammatina, ket di nagduadua iti kari ti Dios. Ti pammatina ti nangpabileg kenkuana ket indaydayawna ti Dios.

²¹Kapkapnekanna unay a tungpalen ti Dios ti inkarina.

²²Gapu iti daytoy a pammati, naibilang ni Abraham a nalinteg.

²³Saan a naisurat dagiti balikas a “naibilang a nalinteg” nga agpaay laeng ken ni Abraham.

²⁴Agpaay met kadatayo a maibilangto a kas nalinteg, datayo a mamati iti Dios a namagungar ken ni Jesus nga Apotayo.

²⁵Nayawat ni Jesus a matay gapu kadagiti basoltayo, ket napagungar tapno mapalintegtayo iti sangoanan ti Dios.