Read Iloko Romans 5 Bible Online

Romans 5 - Iloko bible

Romans 5

¹Itan ta napalintegtayo babaen iti pammati, naikappiatayon iti Dios gapu ken ni Apotayo a Jesu-Cristo.

²Nayasidegtayo babaen iti pammati iti parabur ti Dios ket daytoy ita ti laklak-amentayo. Agrag-otayo ngarud iti namnama a mairanudtayo iti dayag ti Dios!

³Agragsaktayo met kadagiti rigrigattayo, ta ammotayo a ti rigat pataudenna ti panagibtur.

⁴Ti panagibtur yegna ti yaanamong ti Dios. Ti yaanamongna pataudenna ti namnama.

⁵Saannatayo a paayen daytoy a namnama ta imbukbok ti Dios ti ayatna kadagiti pusotayo babaen iti Espiritu Santo a sagutna kadatayo.

⁶Iti tiempo a pinili ti Dios, idi awan pay laeng ti kabaelantayo, natay ni Cristo gapu kadagiti managdakdakes.

⁷Awan ti siasinoman a siaayat a matay gapu iti nalinteg a tao. Nalabit nga adda makaitured a matay gapu iti naimbag a tao.

⁸Ngem impakita ti Dios ti ayatna kadatayo: Idi managbasoltayo pay laeng, natay ni Cristo gapu kadatayo!

⁹Babaen iti darana, napalintegtayon iti sangoanan ti Dios. Ad-adda pay ngarud a maisalakantayto gapu kenkuana.

¹⁰Ta idi, kabusornatayo ti Dios. Ngem ita, pinagbalinnatayo a gagayyemna babaen iti ipapatay ti Anakna. Ita ta gagayyemnatayon ti Dios, ad-adda pay a maisalakantayo gapu iti biag ni Cristo!

¹¹Ngem saan la a dayta, agrag-otayo pay gapu iti inaramid ti Dios babaen ken ni Apotayo a Jesu-Cristo a namagbalin kadatayo a gagayyem ti Dios.

¹²Babaen iti maysa a tao, immay ti basol ditoy lubong ket babaen iti basol, immay met ti ipapatay. Iti kasta, nagsaknap ti ipapatay iti entero a sangkataoan, agsipud ta nagbasol amin a tattao.

¹³Addan ti basol ditoy lubong sakbay a naipaulog ti Linteg. Ngem no awan linteg, awan ti maibilang a basol.

¹⁴Nupay kasta, manipud idi tiempo ni Adan agingga iti tiempo ni Moises, nagturay ni patay kadagiti amin a tattao, uray pay no ti basolda saan a kas iti basol ni Adan idi nagsalungasing iti bilin ti Dios. Ni Adan ti ladawan ti tao nga umayto.

¹⁵Ngem aggiddiat dagitoy a dua, ta ti di mabayadan a sagut ti Dios, saan a kas iti basol ni Adan. Agpayso a natay ti adu a tattao gapu iti basol ni Adan. Ngem nawadwadwad nga adayo ti parabur ti Dios, kasta met ti sagutna iti adu a tattao babaen iti parabur ti maysa a tao nga isu ni Jesu-Cristo.

¹⁶Maigiddiat ti sagut ti Dios iti basol ti maysa a tao. Kalpasan ti pannakaaramid ti maysa a basol, naikeddeng ti sentensia: “Nakabasol.” Ngem kalpasan ti pannakaaramid ti adu a basol, umay ti di kaikarian a sagut ket maikeddeng ti sentensia: “Awan ti basolna!”

¹⁷Agpayso a gapu iti basol ti maysa a tao, nagturay ni patay, ngem ad-adda pay a gapu iti inaramid ni Jesu-Cristo, agturay iti biag dagiti amin nga umawat iti nawadwad a parabur ken sagut ti kinalinteg.

¹⁸Ngarud, kas iti pannakadusa ti sangkataoan gapu iti basol ti maysa a tao, kasta met ti pannakapakawan ken pannakaited ti biag kadagiti amin a tao gapu iti nalinteg nga aramid.

¹⁹Kas ti panagbalin a managbasol ti sangkataoan gapu iti panagsukir ti maysa a tao, kastanto met ti pannakapalinteg dagiti tattao iti imatang ti Dios gapu iti panagtulnog ti maysa a tao.

²⁰Naited ti Linteg tapno paaduenna ti dakes nga aramid. Ngem no kasano ti yaadu ti basol, ad-adda pay nga umadu ti parabur ti Dios.

²¹Ngarud, kas ti panagturay ti basol babaen ken ni patay, kasta met ti panagturay ti parabur ti Dios babaen iti kinalinteg a mangiturong kadatayo iti biag nga agnanayon babaen ken ni Jesu-Cristo nga Apotayo.