Read Iloko Romans 6 Bible Online

Romans 6 - Iloko bible

Romans 6

¹Ania ngarud ti kunatayo? Itultuloytayo kadi ti agbasol tapno umadu ti parabur ti Dios?

²Saan a mabalin! Nataytayon iti basol—kasano ti panagtuloytayo nga agbasol?

³Awan duadua nga ammoyo nga idi nabuniagantayo ken ni Cristo Jesus, nairamantayo met iti ipapatayna.

⁴Ngarud, idi nabuniagantayo, naikaduatayo ken ni Cristo a naitanem, ket nairanudtayo iti ipapatayna tapno, kas iti pannakapagungar ni Cristo babaen iti nakaskasdaaw a pannakabalin ti Ama, sumurottayo met koma iti baro a panagbiag.

⁵No nakipagmaymaysatayo kenkuana iti ipapatayna, makipagmaymaysatayto met kenkuana iti pannakapagungar.

⁶Ammotayo a ti daan a kinataotayo nairaman ken ni Cristo a nailansa iti krus tapno madadael ti managbasol a bagi. Iti kasta, saantayo koman a paadipen iti basol.

⁷Ta no matay ti maysa a tao, mawayawayaan iti pannakabalin ti basol.

⁸Gapu ta nairamantayo a natay ken ni Cristo, mamatitayo a makipagbiagtayo met kenkuana.

⁹Ammotayo a napagungar ni Cristo ket saanen a matay. Awanen ti pannakabalin ti patay kenkuana.

¹⁰Ngarud, gapu ta natay ni Cristo, awan ti pannakabalin kenkuana ti basol. Ita, agbiagen a maipaay iti Dios.

¹¹Kasta met nga ibilangyo a nataykayon iti basol ngem sibibiagkayo iti Dios, gapu ken ni Cristo Jesus.

¹²Masapul a saanen nga agturay ti basol kadagiti narukop a bagiyo tapno diyo pabus-oyan dagiti dakes a tarigagayyo.

¹³Kasta met a diyo itulok nga agbasol ti uray ania a paset ti bagiyo a maaramat kadagiti dakes a panggep. Mayarigkayo kadagiti tattao a natay ngem napagungar. Ipaayyo ketdi ti bagiyo iti Dios ket itulokyo kenkuana ti entero a bagiyo a maaramat kadagiti nalinteg a panggep.

¹⁴Saan a rumbeng nga agturay ti basol kadakayo ta saankayon nga agbibiag iti sakup ti linteg, no di ket iti sakup ti parabur ti Dios.

¹⁵Ania ngaruden? Ituloytayo latta kadi ti agbasol? Total, awantayo iti sakup ti linteg, no di ket addatayo iti sakup ti parabur ti Dios. Saan!

¹⁶Awan duadua nga ammoyo a no patagabukayo, isukoyo ti bagiyo iti apoyo. No tungpalenyo ti basol, agtungpalkayto iti patay. No tungpalenyo ti Dios, mapalintegkayto iti sangoanan ti Dios.

¹⁷Ngem yaman pay iti Dios! Ta nayarigkay idi iti tagabu a simmuko kadagiti dakes a tarigagayyo nga agbasol ngem itan, nagtulnogkayo a naimpusoan kadagiti pudno a pannursuro nga inawatyo.

¹⁸Nawayawayaankayo iti basol ket tagabunakayon ti kinalinteg.

¹⁹Agsaoak iti kadawyan a panagsao tapno nalaka a maawatanyo. Intulokyo ti bagiyo idi a tinagabu ti kinarugit ken kinadakes nga agpaay kadagiti dakes a panggep. Masapul nga agtulokkayo met ita a patagabu iti kinalinteg nga agpaay iti pannakapasantoyo.

²⁰Idi tagabunakayo ti basol, saan a masapul nga agtulnogkayo iti kinalinteg.

²¹Ngem ania ti nagunggonayo kadagiti inar-aramidyo a pagbabainanyo ita? Patay ti banagda!

²²Ngem ita, nawayawayaankayon iti basol, ket tagabunakayon ti Dios. Nagun-odyo ti biag a naan-anay a naidaton kenkuana, ket biag nga agnanayon ti banagna.

²³Ta patay ti supapak ti basol. Ngem biag nga agnanayon ti isagut ti Dios gapu iti pannakikaykaysatayo ken ni Cristo Jesus nga Apotayo.