Read Iloko Romans 7 Bible Online

Romans 7 - Iloko bible

Romans 7

¹Awan duadua a maawatanyo ti ibagak, kakabsatko, agsipud ta ammoyo amin ti maipapan iti linteg. Iturayan ti linteg ti tao bayat ti panagbiagna laeng.

²Ti naasawaan a babai ti alaentayo a pangarigan. Ikeddeng ti linteg a maisinggalut iti asawana bayat ti panagbiag ti lalaki. Ngem apaman a matay ti asawana, mawayawayaanen iti linteg a nangisinggalut kenkuana.

³Ngarud, no makikabbalay ti babai iti sabali a lalaki idinto a sibibiag pay laeng ti asawana, makikamalala iti imatang ti linteg. Ngem no matay ti asawana, siwayawaya iti imatang ti linteg ket saan nga agbasol iti pannakikamalala no makiasawa manen.

⁴Kasta met kadakayo, kakabsatko. Nataykayon iti imatang ti Linteg, ta pasetnakayo ti bagi ni Cristo. Agpaaykayo itan kenkuana a napagungar tapno nabungatayo nga agserbi iti Dios.

⁵Ta idi agbibiagtayo a mayannurot iti lasag, nagturay kadagiti bagbagitayo dagiti tarigagay a nangiturong kadatayo nga agbasol a pinarasuk ti Linteg ket nagserbitayo nga agpaay iti patay.

⁶Ngem ita, nawayawayaantayon iti Linteg, agsipud ta nataytayo—no maipapan iti linteg a nangbalud idi kadatayo. Saantayon nga agserbi iti daan a wagas ti naisurat a linteg, no di ket iti baro a wagas ti Espiritu.

⁷Ania ngarud ti kunatayo? Kunatayo kadi a dakes ti Linteg? Saan! Ngem ti Linteg ti nangipakaammo kaniak no ania ti basol. Diak koma naammoan no ania ti panagagum no di kinuna ti Linteg: “Dimo aguman ti kukua ti sabali a tao.”

⁸Ngem iti daytoy a bilin, nasarakan ti basol ti gundawayna a mangpataud kaniak iti amin a kita ti kinaagum. Ta no awan ti linteg, natay ti basol.

⁹Agbibiagak met idi iti laksid ti linteg. Ngem idi immay ti bilin, nagbiag ti basol

¹⁰ket natayak. Ti bilin a mangted koma iti biag, inyegna ketdi kaniak ti patay.

¹¹Ta babaen iti bilin, nasarakan ti basol ti gundawayna a mangallilaw ken mangpatay kaniak.

¹²Ngarud, nasantoan ti Linteg. Nasantoan, nalinteg ken naimbag met ti bilin.

¹³Ngem kayatna kadi a sawen a ti naimbag inyegna ti ipapatayko? Saan! Aramid ti basol daytoy. Inaramatna ti naimbag a pangpatay kaniak tapno maipakita no ania ti basol. Iti kasta, babaen iti bilin, maipakita ti kinadakes ti basol.

¹⁴Ammotayo a naespirituan ti Linteg. Ngem maysaak laeng a tao, ket nailakoak a kas tagabu ti basol.

¹⁵Diak maawatan ti ar-aramidek. Ta diak aramiden dagiti kayatko nga aramiden. Aramidek ketdi dagiti kagurak.

¹⁶No aramidek dagiti diak kayat nga aramiden, maipakita a bigbigek a naimbag ti Linteg.

¹⁷Saan ngarud a siak ti agaramid iti daytoy, no di ket ti basol nga adda kaniak.

¹⁸Ammok a saan nga agnaed kaniak ti kabaelan nga agaramid iti naimbag—kayatko a sawen, ti kababalinko a kas tao. Nupay kayatko ti agaramid iti naimbag, diak latta maaramid.

¹⁹Diak maaramid dagiti naimbag a kayatko nga aramiden, ngem aramidek ketdi ti dakes a diak kayat nga aramiden.

²⁰No aramidek ti diak kayat nga aramiden, kayatna a sawen a saanen a siak ti akin-aramid, no di ket ti basol nga adda kaniak.

²¹Mabigbigko ngarud daytoy a paglintegan: No kayatko ti agaramid iti naimbag, maiturongak met nga agaramid iti dakes.

²²Pagay-ayatan ti kaunggan a kinataok ti linteg ti Dios.

²³Ngem sabali a linteg ti makitak nga adda iti bagik—maysa a linteg a mangbusor iti linteg nga anamongan ti nakemko. Pagbalinennak a balud daytoy a linteg ti basol nga adda iti bagik.

²⁴Anian a kinadaksanggasatko! Siasino ti mangispal kaniak iti daytoy bagi a pakaigapuan ti ipapatayko?

²⁵Yaman pay iti Dios, ta adda ni Apotayo a Jesu-Cristo a mangisalakan kaniak! Daytoy ngarud ti kasasaadko: Ti nakemko laeng ti mabalinko a pagserbi iti linteg ti Dios, ngem ti bagik, agserbi iti linteg ti basol.