Read Iloko Romans 8 Bible Online

Romans 8 - Iloko bible

Romans 8

¹Ngarud, saan a masentensiaan a madusa dagiti agbibiag ken ni Cristo Jesus.

²Ta ti linteg ti Espiritu a mangted kadatayo iti biag iti kaaddatayo ken ni Cristo Jesus, winayawayaannak iti linteg ti basol ken ti patay.

³Inaramid ti Dios ti saan a kabaelan nga aramiden ti Linteg gapu iti kinarasi ti tao. Inukomna ti basol ti kinatao. Imbaonna ti mismo nga Anakna nga addaan iti naintaoan a kasasaad tapno pukawenna ti basol.

⁴Inaramid ti Dios daytoy tapno matungpal kadatayo ti intuyang ti Linteg—kadatayo nga agbibiag a mayannurot iti Espiritu a saan nga iti naintaoan a kasasaad.

⁵Dagiti agbibiag kas mayannurot iti lasag, paiturayan ti panunotda iti kayat ti lasag. Dagiti agbibiag kas mayannurot iti Espiritu, paiturayan ti panunotda iti kayat ti Espiritu.

⁶No paiturayantayo iti tarigagay ti lasag, agtungpaltayo iti patay. No paiturayantayo iti Espiritu, agtungpaltayo iti biag ken talna.

⁷Iti kasta, no paiturayan ti tao iti kababalin ti kinatao, agbalin a kabusor ti Dios, ta saanna a tungpalen ti linteg ti Dios. Kinapudnona, saanna a matungpal daytoy a linteg.

⁸Dagiti agtungpal iti tarigagay ti lasag, saanda a maparagsak ti Dios.

⁹Ngem saankayo nga agbibiag kas mayannurot iti lasag. Agbibiagkayo ketdi kas mayannurot iti Espiritu—no pudno nga agtaeng kadakayo ti Espiritu ti Dios. No awan kenka ti Espiritu ni Cristo, saannaka a tao ni Cristo.

¹⁰Ngem no agtaeng ni Cristo kadakayo, uray no natayen ti bagiyo gapu iti basol, sibibiag ti espirituyo agsipud ta nagbalinkayo a nalinteg iti imatang ti Dios.

¹¹No agtaeng kadakayo ti Espiritu ti Dios a namagungar ken ni Jesus, itedto met daytoy a namagungar ken ni Cristo ti biag kadagiti agrupsa a bagiyo babaen iti kaadda ti Espirituna kadakayo.

¹²Ngarud, kakabsat, adda pagrebbengantayo nga agbiag, ngem saan a kas iti panangidalan ti lasag.

¹³Ta no agbiagkayo kas pagayatan ti lasag, mataykayto. Ngem no iwaksiyo dagiti dakes nga aramidyo babaen iti tulong ti Espiritu, agbiagkayto.

¹⁴Annak ti Dios dagiti idalan ti Espiritu ti Dios.

¹⁵Ta saannakayo a pagbalinen a tagabu ti Espiritu nga inted ti Dios kadakayo. Saannakayo met a pagbutngen. Pagbalinennakayo ketdi nga annak ti Dios, ket babaen iti pannakabalin ti Espiritu, umawagtayo iti Dios a kunatayo, “Ama, O Amak!”

¹⁶Makidanggay ti Espiritu ti Dios kadagiti espiritutayo a mangipakaammo nga annaknatayo ti Dios.

¹⁷Agsipud ta annaknatayo, tagikuaentayto dagiti iduldulinna a bendision nga agpaay kadagiti tattaona. Makipagtagikuatayto met ken ni Cristo kadagiti indulin ti Dios nga agpaay kenkuana. Ta no mairanudtayo iti panagsagaba ni Cristo, mairanudtayto met iti dayagna.

¹⁸Awan duaduak a ti sagsagabaentayo iti daytoy agdama a biag ket saan a maipada iti dayag a maiparangarangto kadatayo.

¹⁹Sigagagar ti sangaparsuaan nga agur-uray iti Dios a mangiparangarang kadagiti annakna.

²⁰Ta naikeddeng nga agbalin nga awan serserbi ti sangaparsuaan, saan a gapu iti bukodna a pagayatan no di ket kasta ti nagayatan ti Dios a pagbanaganna. Nupay kasta, adda daytoy a namnama:

²¹Addanto aldaw a mawayawayaan met laeng ti amin a parsua iti nakatagabuanda a panagrupsa, ket mairanuddanto iti nagloriaan a pannakawayawaya dagiti annak ti Dios.

²²Ta ammotayo nga agpapan ita, kas iti agpasikal, agas-asug iti rigat ti entero a sangaparsuaan.

²³Ngem saan laeng a ti sangaparsuaan. Uray datayo nga addaan iti Espiritu kas umuna a sagut ti Dios, agasugtayo met iti kaunggantayo bayat ti pananguraytay iti panamagbalin kadatayo ti Dios nga annakna ken iti panangwayawayana kadatayo.

²⁴Ta naisalakantayo babaen iti namnama. Ngem no makitatayo ti namnamaentayo, saanen a pudno a namnama. Ta siasino kadi ti mangnamnama iti makitana?

²⁵Ngem no namnamaentayo ti ditay pay makita, urayentayo a siaanus.

²⁶Kasta met nga iti kinakapuytayo, umaynatayo tulongan ti Espiritu. Ta ditay ammo ti umno a panagkararag. Ti Espiritu a mismo ti mangidawdawat kadatayo iti Dios kadagiti asug a di kabaelan nga ibalikas.

²⁷Makita ti Dios ti naguneg ti puso ti tao, ket ammona ti pampanunoten ti Espiritu, agsipud ta idawdawatan ti Espiritu dagiti tattao ti Dios kas pagayatan ti Dios.

²⁸Ammotayo a kadagiti amin a banag, agtartrabaho ti Dios para iti pagimbagan a kaduana dagiti agayat kenkuana, isuda nga inayabanna kas mayannurot iti panggepna.

²⁹Dagiti pinili idin ti Dios, tinudinganna met ida nga agbalin a kas iti Anakna tapno agbalin ti Anak nga inauna kadagiti adu nga agkakabsat.

³⁰Iti kasta, inayaban ti Dios dagiti pinilina. Saanna la nga inayaban ida, no di ket pinagbalinna pay ida a nalinteg. Saanna la a pinagbalin ida a nalinteg, no di ket imbingayanna pay ida iti gloriana.

³¹Kas maibatay kadagitoy, mabalin a kunatayo a no kaduatayo ti Dios, awan ti makabael a bumusor kadatayo!

³²Dina impaidam ti mismo nga Anakna, no di ket indatonna nga agpaay kadatayo amin! No impaayna ti Anakna kadatayo, dinto kadi sisasagana a mangted met kadatayo iti isuamin?

³³Siasinonto ti mangidarum kadagiti pinili ti Dios? Ti mismo a Dios, ibilangna ida nga awan basolda!

³⁴Siasino ngarud ti makabalin a mangsentensia kadakuada? Ni Cristo Jesus kadi nga adda iti makannawan ti Dios? Saan! Ta saan la a natay no di ket isu pay ti mangibabaet kadatayo.

³⁵Siasino ngarud ti makabalin a mangisina kadatayo iti ayat ni Cristo? Ti riribuk? Ti rigat? Ti pannakaidadanes? Ti bisin? Ti kinapanglaw? Ti peggad wenno ti patay?

³⁶Kas kuna ti Nasantoan a Surat, “Gapu kenka, kanayon nga agpeggadkami a matay, Maibilangkami a kas karnero a maparti.”

³⁷Iti baet dagitoy, awan duadua a naan-anay nga agballigitayo babaen kenkuana a nagayat kadatayo!

³⁸Awan duaduak nga awan ti makaisina kadatayo iti ayatna: ti patay man wenno ti biag, dagiti angheles man wenno dagiti sabali a nailangitan nga agturay wenno pannakabalin, ti agdama man wenno ti masakbayan,

³⁹ti kangatoan a law-ang man wenno ti kaunggan ti daga. Awan a pulos iti sangaparsuaan ti makaisina kadatayo iti ayat ti Dios a kukuatayo gapu ken ni Cristo Jesus nga Apotayo!