Read Iloko 1 Corinthians 10 Bible Online

1 Corinthians 10 - Iloko bible

1 Corinthians 10

¹Kakabsatko, kayatko a lagipenyo ti napasamak kadagiti kapuonantayo a simmurot ken ni Moises. Addada amin idi iti salinong ti ulep. Awan ti napagpagtengda iti ilalasatda iti Nalabaga a Baybay.

²Iti salinong ti ulep ken iti baybay, nabuniaganda amin a kas pasurot ni Moises.

³Nanganda amin iti maymaysa a naespirituan a tinapay.

⁴Imminumda amin iti maymaysa a naespirituan a danum. Imminumda manipud iti naespirituan a bato a kimmuykuyog kadakuada. Ni Cristo dayta a bato.

⁵Ngem uray no kasta, saan a naay-ayo ti Dios iti kaaduan kadakuada, ket naiwarawara dagiti bangkayda iti let-ang.

⁶Agbalin koma dagitoy pagwadan a pakaballaagantayo tapno ditay aggartem kadagiti dakes a banag, a kas iti inaramidda.

⁷Ditay koma agrukbab kadagiti didiosen, a kas iti inaramid ti sumagmamano kadakuada. Kas kuna ti Nasantoan a Surat: “Nagtugaw dagiti tattao a mangan ken uminum; timmakderda tapno agsasalada.”

⁸Masapul a ditay agaramid iti immoralidad, a kas iti inaramid ti sumagmamano kadakuada—ket iti maysa nga aldaw, natay ti 23,000 kadakuada.

⁹Ditay suoten ti Apo, kas iti inaramid ti sumagmamano kadakuada—ket pinatay ida dagiti uleg.

¹⁰Ditayo met koma agreklamo a kas iti inaramid ti sumagmamano kadakuada—ket dinadael ida ti Anghel ni Patay.

¹¹Napasamak dagitoy kadakuada a pagulidanan dagiti dadduma, ket naisuratda a kas pakaballaagantayo. Ta dandanin ti kanibusanan ti tiempo.

¹²Siasinoman a mangipagarup a natalged ti panagtakderna, agannad koma amangan no matnag.

¹³Tunggal sulisog nga umay kadakayo, gagangay a dumteng iti tao. Ngem tungpalen ti Dios ti karina; dina ipalubos a masulisogkayo iti nalabes a diyo kabaelan a sarangten. No masulisogkayo, ikkannakayo iti pigsa a mangibtur, ket iti kasta, makalisikayo.

¹⁴Isut' gapuna a dikay agrukbab kadagiti didiosen, patgek a gagayyem.

¹⁵Agsaoak kadakayo a kas nanakman a tattao. Dakayo ti mangeddeng no pudno wenno saan ti ibagbagak.

¹⁶No uminumtayo iti kopa ti bendision a nagyamanantayo iti Dios, ditayo kadi mairaman iti dara ni Cristo? Ket ti tinapay a pisientayo, ditayo kadi mairaman met iti bagi ni Cristo?

¹⁷Gapu ta maymaysa a tinapay ti pagbibingayantayo, maymaysatayo a bagi uray no adutayo.

¹⁸Kitaenyo ti ugali dagiti nagkauna a Hebreo; dagiti mangan iti naidaton a taraon, makipagserbida met iti altar.

¹⁹Ania ti kayatko a sawen? Adda aya kaipapanan ti didiosen wenno adda kadi pateg ti kanen a maidaton iti didiosen?

²⁰Awan! Daytoy ti kayatko a sawen: Saan nga iti Dios ti pakaidatonan dagiti taraon iti altar dagiti pagano, no di ket kadagiti demonio. Ket diak kayat a makikaduakayo kadagiti demonio.

²¹Diyo mabalin nga inuman ti kopa ti Apo ket kalpasanna, inumanyo met ti kopa dagiti demonio. Diyo mabalin ti sumango iti panganan ti Apo ket kalpasanna, sumangokayo iti lamisaan dagiti demonio.

²²Wenno, pagimonentayo kadi ti Apo? Napigpigsatayo kadi ngem isu?

²³“Siwayawayakami nga agaramid iti kaykayatmi,” kunada. Wen, ngem saan nga amin a banag ket nasayaat. “Siwayawayakami nga agaramid iti aniaman a banag”—ngem saan nga amin a banag ket makatulong.

²⁴Masapul a biroken ti tunggal maysa ti pagimbagan ti sabali, saan la a ti bukodna a pagsayaatan.

²⁵Siwayawayakayo nga agsida iti aniaman a magatang iti paglakoan iti karne a dikay agsaludsod gapu ta mariribuk ti konsensiayo.

²⁶Kas kuna ti Nasantoan a Surat: “Ti Apo ti akinkukua iti daga ken amin a linaonna.”

²⁷No awisennaka a makipangan ti maysa a pagano ket mapanka, manganka iti aniaman a maipasango kenka a dika agsaludsod gapu ta mariribuk ti konsensiam.

²⁸Ngem no adda agkuna kenka, “Naidaton daytoy a taraon kadagiti didiosen,” saanmo a kanen gapu iti nangibaga kenka ken gapu ta maburibor ti konsensiam—

²⁹kayatna a sawen, saan a ti konsensiam, ngem ti konsensiana. Adda agsaludsod, “Apay a makedngan ti wayawayak gapu iti konsensia ti sabali a tao?

³⁰No agyamanak iti Dios gapu iti taraonko, apay a mababalawak?”

³¹Daytoy ti sungbatko: No adda aniaman nga aramidenyo, mangan man wenno uminumkayo, aramidenyo a pakaidayawan ti Dios.

³²Dikay agaramid iti aniaman a pakaigapuan nga agbasol dagiti Judio wenno Hentil wenno ti iglesia ti Dios.

³³Siak a maysa, ikagumaak a pagustoan ti amin a tattao iti aniaman nga aramidek. Saan a ti pagsayaatak ti pampanunotek, no di ket ti pagimbagan ti amin tapno maisalakanda.